Կալցիում․ հատկություններն ու դերն օրգանիզմում

03.05.20194224

Օրգանիզմում կալցիումի (Ca) ընդհանուր քանակը կազմում է մարմնի զանգվաի մոտ 2%-ը, ընդ որում՝ նրա 99%-ը կենտրոնացած է ոսկրային հյուսվածքում, դենտինում և ատամների էմալում, իսկ մնացած մասը՝ փափուկ հյուսվածքներում և նյարդերում։

Օրական պահանջը

Օրգանիզմի օրական պահանջը մեծահասակների դեպքում 800-1000մգ է, 60-ն անց անձանց դեպքում՝ 1200 մգ։ Պահանջը մեծանում է փոքր տարիքում, հղիության և կերակրման շրջանում, սպորտով զբաղվելու և առատ քրտնարտադրության դեպքում։

Օգտակար հատկությունները և դերն օրգանիզմում

Կալցիումը ոսկորների և ատամների ձևավորման կարևորագույն նյութն է, այն մտնում է նաև արյան, բջջային և հյուսվածքային հեղուկների կազմի մեջ։

Մասնակցում է արյան մակարդման գործընթացին, նվազեցնում է անոթների պատերի թափանցելիությունը՝ խոչընդոտելով օտարածին ալերգենների ու վիրուսների ներթափանցմանը։

Խթանում է որոշ ֆերմենտների ու հորմոնների ֆունկցիան, ինսուլինի արտազատումը, թողնում հակաբորբոքային և հակաալերգիկ ազդեցություն, ուժեղացնում է օրգանիզմի պաշտպանական ֆունկցիաները, ազդում է մկաններում նուկլեինաթթուների և սպիտակուցների սինթեզի, ջրային հավասարակշռության վերականգնման վրա և այլն։

Անհրաժեշտ է նյարդային իմպուլսները փոխանցելու համար, ուղղակիորեն ազդում է մկանների կրճատման վրա, կարևոր է սրտի և նյարդային համակարգի համար։

Կալցիումով հարուստ սննդամթերքներ

Ստորև ներկայացված է 100 գրամ մթերքում պարունակվող կալցիումի չափը։

  • Հալած պանիր՝ 760-1005 մգ 
  • Բրինզա պանիր՝ 630 մգ 
  • Նուշ՝ 273 մգ 
  • Մանանեխ` 254 մգ 
  • Պիստակ՝ 250 մգ 
  • Սխտոր` 180 մգ 
  • Պնդուկ՝ 170 մգ 
  • Կաթնաշոռ՝ 154 մգ 
  • Լոբի՝ 150 մգ 
  • Թթվասեր՝ 90-120 մգ 
  • Վարսակի փաթիլներ՝ 117 մգ 
  • Ոլոռ՝115 մգ 
  • Ընկույզ՝ 93 մգ 
  • Սերուցք՝ 86մգ 

Վիտամին D-ն նպաստում է ստամոքսում կալցիումի յուրացմանը։