Առողջ սննդակարգը հղիության պլանավորման շրջանում

Առողջ սննդակարգը հղիության պլանավորման շրջանում

Սնունդը կարող է և՛ դրական, և՛ բացասական ազդեցություն թողնել բեղմնավորման կարողության վրա: Ահա մի քանի խորհուրդ, որոնք կօգնեն մեծացնել հղիանալու և առողջ երեխա լույս աշխարհ բերելու հավանականությունը:

Վերանայեք ձեր սննդակարգը

Վերանայեք ձեր սննդակարգը ենթադրյալ հղիությունից դեռևս երեք ամիս կամ մեկ տարի առաջ: Սնունդն ազդում է ինչպես կանանց, այնպես էլ տղամարդկանց պտղաբերության վրա: Եթե երկուսդ էլ հավասարակշռված սննդակարգ եք պահպանում, ապա հղիանալու և առողջ երեխա ունենալու ձեր հնարավորությունները մեծ են:

Կարգավորեք ձեր քաշը

Նախքան հղիանալը կարելի է մի փոքր նիհարել կամ, ընդհակառակը, գիրանալ, եթե կարիքը կա: Լավագույն տարբերակը ձեր բնականոն քաշը պահպանելն է, քանի որ քաշի ավելցուկը կամ պակասը նվազեցնում է հղիանալու հավանականությունը: Նախքան որևէ դիետայի անցնելը խորհրդակցեք բժշկի հետ: Եթե ավելորդ քաշ ունեք, ապա պետք է ուտեք ոչ թե ճարպով, այլ բջջանյութով հարուստ սնունդ և զբաղվեք մարմնամարզությամբ: Խիստ դիետայի արդյունքում քաշի կտրուկ անկումը կարող է հանգեցնել օրգանիզմի հյուծման, ինչը նպաստավոր պայման չէ հղիության համար:

Հետևեք առողջ սննդի կանոններին

Առողջ սննդակարգը հավասարակշռված դիետան է: Հղիության պլանավորման ընթացքում խորհուրդ է տրվում բազմազան սնվել: Այդպիսի դիետան ներառում է.

  • Բանջարեղեն և մրգեղեն՝ թարմ, սառեցված, պահածոյացված, չորացված կամ հյութի ձևով: 
  • Ածխաջրերով հարուստ սննդամթերք՝ հաց, մակարոնեղեն, բրինձ և կարտոֆիլ: 
  • Սպիտակուցներով հարուստ սննդամթերք՝ հավի, ձկան, տավարի միս, ձու և լոբի: 
  • Կաթնամթերք՝ կաթ, պանիր, մածուն, յոգուրտ, որոնք հարուստ են կալցիումով: 
  • Սննդամթերք՝ հարուստ երկաթով, օրինակ՝ կարմիր միս, լոբի, չրեղեն, հաց, կանաչ բանջարեղեն և այլն: 
  • Մթերքներ և ըմպելիքներ՝ հարուստ վիտամին C-ով, օրինակ՝ մրգեր և բանջարեղեն: Վերջիններս օրգանիզմին օգնում են լավ յուրացնել երկաթը: 
  • Անհրաժեշտ է կրճատել ճարպերով և շաքարով հարուստ ուտելիքների քանակը (թխվածք, շոկոլդ, գազավորված ըմպելիքներ և արագ սնունդ): 
  • Փորձեք ամեն օր միևնույն ժամին նախաճաշել: Ուշադրություն դարձրեք ուտելիքի քանակին:

Վիտամինային հավելումներ օգտագործեք

Հավասարակշռված դիետան ի զորու է բավարարել օրգանիզմում սննդարար նյութերի ամբողջ պահանջը, սակայն մի շարք մասնագետներ կարծում են, որ վիտամինային հավելանյութերն անհրաժեշտ են նաև նրանց, ովքեր առողջ են սնվում: Պետք է նկատի ունենալ, որ հավելանյութերը միայն օժանդակ նյութեր են և չեն կարող փոխարինել լիարժեք առողջ սննդին: Խելամիտ կլինի նաև հղիների համար նախատեսված վիտամիններ օգտագործել բեղմնավորումից առաջ, հղիության և կրծքով կերակրման ընթացքում: Անպայման խորհրդակցեք բժշկի հետ և նրա օգնությամբ ընտրեք համապատասխան հավելանյութը:

Ֆոլաթթու օգտագործեք

Ֆոլաթթուն նախատեսված է ոչ միայն կանանց համար: Շնորհիվ վիտամին B-ի այն նվազեցնում է ինսուլտի, քաղցկեղի և դիաբետի վտանգը, կանխում է նաև երեխայի նյարդային համակարգի բնածին արատների զարգացումը և այլն:

Կարդացեք

Ֆոլաթթվի դերն ու նշանակությունը առողջության համար

Ո՞ր մթերքներն են ֆոլաթթու պարունակում

Ֆոլաթթվի օրական պահանջը

Ֆոլաթթվի անբավարարություն. հետևանքները և կանխարգելումը

Ֆոլաթթվի ավելցուկ կամ գերդոզավորում

 

Հրաժարվեք ոգելից խմիչքներից

Ընդհանրապես հրաժարվեք ալկոհոլից կամ խիստ հազվադեպ օգտագործեք: Կարելի է շաբաթվա ընթացքում մեկ-երկու անգամ մեկից երկու բաժին ալկոհոլ ընդունել: Գինու գավաթը պարունակում է երկու բաժին, իսկ թույլ ալկոհոլայիններինը՝ մեկ ու կես բաժին: Ալկոհոլի չարաշահման հիմնական վտանգը պտղի զարգացման խանգարումներն են:

Խուսափեք կոֆեին պարունակող ըմպելիքներից

Օրական 200 մգ կոֆեինը կարող է հանգեցնել վիժման կամ փոքր քաշով երեխայի ծնունդի: Հղիության պլանավորման շրջանում անհրաժեշտ է սահմանափակել կոֆեինի օգտագործումը, պակասեցնել կամ առհասարակ հրաժարվել շոկոլադից, կակաոյից, գազավորված ըմպելիքներից և սուրճից, որպեսզի արդեն իսկ հղիության ժամանակ սովոր լինեք փոքր չափաբաժիններին: 

200 մգ կոֆեինը համապատասխանում է՝

  • 2 բաժակ լուծվող սուրճի (100մգ յուրաքանչյուրը) 
  • 2 բաժակ եփվող սուրճի (100մգ յուրաքանչյուրը) 
  • 4 բաժակ թեյի (50 մգ յուրաքանչյուրը) 
  • 5 թիթեղյա տարայով կոլա (մոտավորապես 40 մգ յուրաքանչյուրը) 
  • 4 (50գր) սալիկ դառը շոկոլադ (մոտավորապես 50 մգ յուրաքանչյուրը): Կաթնային շոկոլադում կոֆեինի քանակը երկու անգամ պակաս է, քան դառը շոկոլադում:

Ինչն է պետք բացառել սննդակարգից

Խորհուրդ է տրվում խուսափել հետևյալ սննդամթերքներից և հավելանյութերից:

  • Մեծ քանակությամբ վիտամին А: Ուստի հարկավոր է խուսափել լյարդից և դրանից պատրաստված սննդամթերքներից, օրինակ՝ պաշտետից և վիտամին А, ինչպես նաև ձկան յուղ պարունակող հավելանյութերից: Իհարկե, հղիության ընթացքում անհրաժեշտ է վիտամին А-ն, սակայն այստեղ խոսքը վերջինիս մեծ քանակության մասին է, որը կարող է վնասել երեխայի առողջությանը: 
  • Սնդիկ պարունակող ձկնատեսակներ՝ շնաձուկ, մարլին, երկու կտորից ավել թունա: Սնդիկի մեծ քանակությունը կարող է անդրադառնալ պտղի նյարդային համակարգի ձևավորման վրա: 

Հղիություն պլանավորելիս խորհրդակցեք բժշկի հետ, ով հաշվի առնելով ձեր օրգանիզմի առանձնահատկությունները՝ ձեզ համապատասխան ցուցումներ կտա:

Ինչպե՞ս բարձրացնել լիբիդոն

Ինչպե՞ս բարձրացնել լիբիդոն

Չկա «նորմալ» և «ոչ նորմալ» լիբիդո, քանի որ յուրաքանչյուրի սեռական ցանկությունը տարբեր է

Ինչո՞ւ է դաշտանը ավելի վաղ սկսվում և ինչպե՞ս այն կարգավորել

Ինչո՞ւ է դաշտանը ավելի վաղ սկսվում և ինչպե՞ս այն կարգավորել

Միջինում դաշտանը տեղի է ունենում 28 օրը մեկ, ավելի ճիշտ՝ 21-ից 35-րդ օրերին

Շաքարային դիաբետի պատճառները, որոնց մասին գուցե չգիտեք

Շաքարային դիաբետի պատճառները, որոնց մասին գուցե չգիտեք

Շաքարային դիաբետը հիվանդություն է, որի դեպքում գլյուկոզան չի թափանցում բջիջներ

Ի՞նչ կպատահի, եթե թթված կաթ կամ ժամկետանց կեֆիր խմեք

Ի՞նչ կպատահի, եթե թթված կաթ կամ ժամկետանց կեֆիր խմեք

Թարմ կաթը գործնականում զերծ է բակտերիաներից