Կուվելերի արգանդ
10137
Կուվելերի արգանդը հղիության կամ ծննդաբերական ծանր բարդություն է: Այս համախտանիշի ժամանակ տեղի է ունենում ընկերքի վաղաժամ շերտազատում՝ առատ արյունահոսությամբ, ինչի արդյունքում արգանդի մկանային հյուսվածքը ներծծվում է արյունով, և վերջինս ներթափանցում է որովայնի խոռոչ: Այս համախտանիշի զարգացման վտանգն էապես մեծանում է ընկերքի ամրացման անոմալիաների, ընկերքի առաջադրման, բազմապտուղ հղիության դեպքում: Այս պաթոլոգիան պահանջում է բուժման խիստ անհատական մոտեցում, քանի որ ուշ ախտորոշման պարագայում կրում է լուրջ վտանգներ:
Հղիության բնականոն ֆիզիոլոգիական ընթացքի և բնական ծննդաբերության դեպքում ընկերքը պտղի համար սնուցողական և շնչառական ֆունկցիա է կատարում մինչ նրա ծնունդը, հետևաբար ընկերքի շերտազատում տեղի է ունենում ծննդաբերական պրոցեսի 3-րդ փուլում՝ պտղի ծնվելուց անմիջապես հետո: Եթե այս կամ այն պատճառներով ընկերքի՝ արգանդից շերտազատումը տեղի է ունենում ավելի վաղ ժամկետում, ապա առաջանում է ռետրոխորիալ հեմատոմա, Կուվելերի արգանդ, իսկ պտղի մոտ զարգանում է հիպոքսիա (թթվածնաքաղց): Բնականոն տեղակայման դեպքում ընկերքի վաղ շերտազատման պատճառներն են՝
- բազմապտուղ հղիություն կամ մանկաբարձական անամնեզում մեծ թվով ծննդաբերություններ,
- հղի կնոջ հիպերտոնիկ հիվանդություն,
- ուշ գեստոզ և պրեէկլամպսիա,
- հղիության ընթացքում ծխախոտի, թմրանյութերի, ալկոհոլի օգտագործում:
Կլինիկական պատկերը
Կուվելերի արգանդի համախտանիշի դեպքում կլինիկական պատկերն արագ է զարգանում: Ախտորոշիչ կարևոր նշաններից մեկը արյունահոսությունն է: Սակայն բոլոր դեպքերում չէ, որ արտաքին արյունահոսություն է դիտվում, քանի որ արյունը հնարավոր է միայն կուտակվի արգանդի պատի և ընկերքի միջև՝ առաջացնելով հեմատոմա: Շերտազատման այս տեսակը նպաստում է արյան ներծծմանն արգանդի պատի մեջ և դրա միջով որովայնի խոռոչ ներթափանցելուն: Եթե արգանդի պալպացիայի ժամանակ կինը ցավ է զգում, ապա մեծ հավանականությամբ միոմետրիումն արդեն ներծծվել է արյամբ և զարգացել է Կուվելերի արգանդ:
Պտղի վարքի փոփոխությունները՝ նրա կտրուկ, հանկարծակի ուժգնացող շարժումները, կամ հակառակը՝ դանդաղ շարժումները և դրանց բացակայությունը վկայում են հիպոքսիայի առաջացման մասին: Վտանգի առկայության պարագայում ծննդաբերության ընթացքում պարտադիր կատարվում է պտղի վիճակի գնահատում` կարդիոտոկոգրաֆիայի հսկողությամբ:
Հղիության ընթացքում բժիշկը հաշվի է առնում հնարավոր վտանգի գործոնները, որոնց հայտնաբերումն օգնում է ընտրել հղիությունը և ծննդաբերությունը վարելու ճիշտ մոտեցում: Եթե հղիության ընթացքում ախտորոշվում է զարկերակային հիպերտենզիա կամ պրեէկլամպսիա, կատարվում է պտղի հիպոքսիայի կանխարգելում և ընտրվում է ծննդալուծման օպտիմալ տարբերակ:
Հղիության ցանկացած բարդության կանխարգելման համար խորհուրդ է տրվում նախքան հղիանալը կանոնավոր այցելել գինեկոլոգիական խորհրդատվության, ժամանակին բուժել արգանդի բորբոքային հիվադությունները և էնդոմետրիոզը, քանի որ հետագայում դրանք կարող են ընկերքի ամրացման անոմալիաներ առաջացնել և հրահրել ընկերքի վաղաժամ շերտազատում:
