Վտանգավոր վիճակներ հղիության 3-րդ եռամսյակում
Հղիության վերջին եռամսյակն սկսում է 29-րդ շաբաթից և շարունակվում մինչև ծննդաբերություն (սովորաբար մինչև 42-րդ շաբաթ)։ Այդ շրջանի վտանգավոր վիճակների շարքում առաջինը գեստոզն է, որը կարող է սկսել արտահայտվել հղիության երկրորդ եռամսյակից սկսած։ Որքան գեստացիայի ժամկետը մեծ է լինում, այնքան առաջացման վտանգը մեծանում է։ Երկրորդ տեղում պտուղընկերքային անբավարարությունն է, երրորդում՝ ընկերքի վաղաժամ շերտազատումը։
Կարդացեք՝ Վտանգավոր վիճակներ հղիության 1-ին եռամսյակում
Ախտանշանները
Գեստոզի նշանները
Գեստոզի սիմպտոմատիկան որոշվում է հետևյալ նշաններով՝
- արյան բարձր ճնշում,
- պրոտեինուրիա (մեզում սպիտակուցի առկայություն),
- ոտքերի, ձեռքերի, որովայնի առաջնային պատի և դեմքի այտուցվածություն և այլն։
Նախակլինիկական պատկերը բնորոշվում է քաշի պաթոլոգիկ ավելացմամբ և արյան մակարդելիության համակարգի փոփոխություններով (թրոմբոցիտների նվազում, հեմատոկրիտի բարձրացում և այլն)։
Գեստոզի ծանր դրսևորումներ են պրեէկլամպսիան և էկլամպսիան։ Պրեէկլամպսիայի դեպքում միկրոշրջանառության խանգարման արդյունքում գլխուղեղում ի հայտ են գալիս հետևյալ ախտանշանները՝ գլխացավ և գլխապտույտ, ականջում աղմուկ, ցավ աջ կողատակում, սրտխառնուք և փսխում, անքնություն կամ քնկոտություն։ Պրեէկլամպսիան չբուժելու դեպքում այն արագ անցնում է էկլամպսիայի փուլի, որը բնորոշվում է դողէրոցքի առաջացմամբ և գիտակցության անկմամբ։
Կարդացեք՝ Վտանգավոր վիճակներ հղիության 2-րդ եռամսյակում
Պտուղընկերքային անբավարարության նշանները
Պտուղընկերքային անբավարարությունը կարող է սուր լինել, օրինակ՝ ընկերքի շերտազատման ֆոնին, և քրոնիկական։ Վերջինս կարող է չունենալ կլինիկական վառ արտահայտված դրսևորումներ։ Ախտորոշումը հաստատվում է ՈւՁՀ-ի, դոպլերագրաֆիայի, կարդիոտոկոգրաֆիայի, պլացենտագրաֆիայի տվայլների հիման վրա։ Պտուղընկերքային անբավարարությունը հանգեցնում է պտղի ներարգանդային հիպոքսիայի զարգացման։
Ընկերքի շերտազատման նշանները
Ընկերքի վաղաժամ շերտազատումն արտահայտվում է արտաքին (հազվադեպ) և ներքին արնահոսությամբ, հեմոռռագիկ շոկով, ներարգանդային սուր հիպոքսիայով, ցավային սինդրոմով և արգանդի հիպերտոնուսով։
Պատճառները
Գեստոզի առաջացման պատճառները մինչ այժմ պարզ չեն։ Նախատրամադրող գործոններն են՝
- կնոջ տարիքը (18-ից փոքր և 30-ից մեծ),
- բազմապտուղ հղիությունը,
- առաջին հղիությունը,
- ժառանգականությունը,
- նախորդ հղիության ընթացքում ի հայտ եկած գեստոզը,
- քրոնիկական սոմատիկ հիվանդությունները (շաքարային դիաբետ, ավելորդ քաշ, հիպերտոնիկ հիվանդություն, հորմոնային խանգարում)։
Ֆետոպլացենտար անբավարարությունը հաճախ պայմանավորված է լինում գեստոզով, սակայն կարող է ի հայտ գալ նաև հետևյալ գործոնների ազդեցությամբ՝
- կնոջ տարիքը (18-ից փոքր և 30-ից մեծ),
- կենցաղային անբարենպաստ պայմանները,
- թերսնուցումը,
- վնասակար սովորությունները,
- սթրեսը,
- հղիության բարդացումները,
- սոմատիկ քրոնիկական պաթոլոգիան (սրտանոթային հիվանդություններ, երիկամների և էնդոկրին գեղձերի հիվանդություններ),
- բազմապտուղ հղիություն,
- արգանդի զարգացման անոմալիաներ, անպտղություն, իսթմիկացերվիկալային անբավարարություն անամնեզում և այլն։
Ընկերքի վաղաժամ շերտազատումը բազմագործոն բարդություն է և առաջանում է հետևյալ վիճակների ֆոնին՝
- գեստոզ,
- ռեզուս-կոնֆլիկտ,
- հակաֆոսֆոլիպիդային համախտանիշ,
- էնդոկրինային պաթոլոգիա,
- կարճ պորտալար,
- որովայնի մեխանիկական վնասվածք,
- արյան մակարդման համակարգի հիվանդություններ,
- միոմատոզ հանգույցներ և դրանց ամրացում ընկերքին,
- բազմապտուղ հղիություն և այլն։
Հետևանքները
Վերոնշյալ վտանգավոր վիճակները, որոնք կարող են զարգանալ վերջին եռամսյակում, նպաստում են հետևյալ բարդությունների առաջացմանը՝
- պտղի ներարգանդային հիպոքսիա,
- պտղի ներարգանդային զարգացման հապաղում,
- վաղաժամ ծննդաբերություն,
- թոքի այտուց կամ երիկամային սուր անբավարարություն գեստոզի ֆոնին,
- հեմոռռագիկ շոկ և հետհեմոռռագիական անեմիա շերտազատման ֆոնին,
- սակավաջրություն և գերջրություն պտուղընկերքային անբավարարության ֆոնին,
- ծննդաբերական ուժի անոմալիաներ,
- պտղի անտենատալ մահ։
Բուժումը
Նշված բոլոր վտանգավոր վիճակների ի հայտ գալուն պես հարկավոր է հիվանդին տեղափոխել հիվանդանոց, որտեղ համապատասխան հետազոտությունների հիման վրա բուժում կնշանակվի։