Վտանգավոր վիճակներ հղիության 2-րդ եռամսյակում
34328
Հղիության երկրորդ եռամսյակն ընդգրկում է 14-րդ շաբաթից մինչև 26-րդ շաբաթն ընկած ժամանակահատվածը։ Այդ շրջանում հաճախակի հանդիպող վտանգավոր վիճակներն են հղիության ընդհատումը կամ ուշ վիժումը, ընկերքի առաջադրությունը, անեմիան (երկաթդեֆիցիտային սակավարյունություն) և այլն։
Կարդացեք՝ Վտանգավոր վիճակներ հղիության 1-ին եռամսյակում
Պատճառները
Ուշ վիժման նպաստող գործոններն են՝
- իսթմիկացերվիկալային անբավարարության զարգացում (ինչպես անատոմիական, այնպես էլ ֆունկցիոնալային),
- ռեզուսկոնֆլիկտային հղիություն,
- բորբոքումներ, սեռավարակներ,
- պտղապարկի վաղաժամ պատռում և պտղաջրի արտահոսք և այլն։
Սակավարյունության պատճառներն են՝
- կենցաղային վատ պայմաններ,
- վատ սնուցում,
- քրոնիկական ինտոքսիկացիա (աշխատանքային վնասակար պայմաններ, աղտոտված միջավայր),
- քրոնիկական սոմատիկ հիվանդություններ (երիկամների հիվանդություն, գաստրիտ, շաքարային դիաբետ, քրոնիկական վարակներ, սրտանոթային հիվանդություններ),
- նախքան հղիությունն ունեցած սակավարյունություն,
- արնահոսություն հղիության ընթացքում,
- բազմապտուղ հղիություն,
- բազմակի ծննդաբերություններ և այլն:
Ընկերքի առաջադրությանը նախատրամադրող գործոններն են՝
- մանկաբարձական-գինեկոլոգիական անամնեզ (աբորտներ, արգանդի խոռոչի բազմակի քերումներ, բարդացած ծննդաբերություն),
- արգանդի վիրահատական միջամտություններ,
- գենիտալային ինֆանտիլիզմ,
- գինեկոլոգիական հիվանդություն (միոմա, էնդոմետրիոզ, քրոնիկական էնդոմետրիտ և այլն)։
Ախտանշանները
Հղիության ընդհատման վտանգի նշաններն են՝
- որովայնի ստորին հատվածի ձգող ցավ,
- արգանդի հիպերտոնուս ինչպես մշտական, այնպես էլ պարբերաբար,
- արյունային մուգ արտադրություն,
- արգանդի պարանոցի զննման ընթացքում այն կարող է անցանելի լինել մատի համար։
Սակավարյութնությունը բնորոշվում է՝
- հոգնածությամբ, թուլությամբ,
- համի փոփոխությամբ,
- ցածր անոթային ճնշմամբ, գլխապտույտով և գիտակցության կորստով,
- մաշկի և մազերի չորությամբ,
- մազերի և եղունգների դյուրաբեկությամբ,
- գունատությամբ, աչքերի շուրջ կապտավուն շրջանակներով։
Ընկերքի առաջադրության դեպքում սեռական ուղիներից արնահոսություն է նկատվում։ Արնահոսության ինտենսիվությունը կախված է հղիության ժամկետից և առաջադրության բնույթից (կողքային կամ ամբողջական)։ Անցավ է, երբեմն ի հայտ է գալիս հանգիստ վիճակում և բնորոշվում է ալ կարմիր գույնով։
Բարդացումները
Վերոնշյալ բոլոր վիճակները նպաստում են հետևյալ բարդացումների առաջացմանը՝
- պտուղընկերքային անբավարարություն,
- պտղի ներարգանդային զարգացման հապաղում,
- պտղի քրոնիկական հիպոքսիա,
- հղիության ինքնաբեր ընդհատում,
- ծննդաբերական ուժերի անոմալիաներ,
- հետծննդաբերական շրջանի ծանր ընթացք,
- գեստոզ,
- պտղի սխալ դիրք կամ առաջադրություն ընկերքի առաջադրության դեպքում։
Բուժումը և կանխարգելումը
Հղի կանանց անեմիայի բուժումը ենթադրում է հատուկ սննդակարգ՝ հարուստ սպիտակուցներով և երկաթով։ 2-րդ և 3-րդ աստճանի անեմիայի դեպքում հիվանդը տեղափոխվում է հիվանդանոց և ստանում երկաթի դեղամիջոցներ հաբերի տեսքով, քանի որ այդ կերպ այն ավելի լավ է յուրացվում օրգանիզմում։ Ծանր անեմիայի դեպքում նշանակվում է էրիթրոցիտային զանգվածի հեմոտրանսֆուզիաներ։
Ընկերքի առաջադրության ֆոնին արնահոսության դեպքում հիվանդը պարտադիր տեղափոխվում է հիվանդանոց։ Ստացիոնարում նրան նշանակում են անկողնային խիստ ռեժիմ։ Անցկացվում է արգանդի տոնուսի և հղիության ընդհատման վտանգի նվազեցմանն ուղղված թերապիա։
Ուշ վիժման վտանգի դեպքում ևս բուժումն անցկացվում է ստացիոնարում՝ անկողնային խիստ ռեժիմի պահպանմամբ, վիտամինների և մետաբոլիկ դեղամիջոցների նշանակմամբ։
Իսթմիկացերվիկալային անբավարարության դեպքում ցուցվում է վիրաբուժական միջամտություն՝ արգանդի պարանոցի սերկլյաժ (պարանոցի վրա կար է դրվում)։
Սակավարյունության կանխարգելման նպատակով հատուկ ուշադրություն է դարձվում ճիշտ, հավասարակշռված սնվելուն, պոլիվիտամինների և հանքանյութերի պրոֆիլակտիկ օգտագործմանը, ինչպես նաև հանգստի ռեժիմի կարգավորմանը։
Ընկերքի առաջադրության դեպքում արնահոսությունների կանխարգելման նպատակով խորհուրդ է տրվում խուսափել սթրեսային իրավիճակներից, ֆիզիկական ծանրաբեռնվածությունից և ծանր իրեր բարձրացնելուց։
Կարդացեք՝ Վտանգավոր վիճակներ հղիության 3-րդ եռամսյակում
