Կարո՞ղ է հակաբեղմնավորիչ հաբերի երկարատև ընդունումը անդրադառնալ հղիանալու կարողության վրա
18214
Հակաբեղմնավորիչների երկարատև ընդունումը չի անդրադառնում հղիանալու կարողության վրա: Հակաբեղմնավորիչ հաբերի ընդունումը դադարեցնելուց հետո ձեր օրգանիզմին հարկավոր է որոշ ժամանակ, որպեսզի կարգավորի հորմոնային համակարգը: Սովորաբար դաշտանային ցիկլը կարգավորվում է մի քանի ամսում: Ընդ որում՝ նշանակություն չունի դուք հաբերն ընդունել եք պարբերաբար, թե մշտապես և առհասարակ ունեցել եք դաշտան, թե ոչ:
Կարդացեք. 6 մտավախություն բեղմնականխիչների վերաբերյալ
Համակցված օրալային հակաբեղմնավորիչներ ընդունող կանանց մեծամասնությունը հղիանում է դեղորայքը դադարեցնելուց հետո մեկ տարվա ընթացքում: Եթե ընդունել եք հակաբեղմնավորիչ հաբեր, ապա հղիանալու ձեր հնարավորությունները գրեթե նույնն են, ինչ բոլորինը, նույնիսկ բարձր միջինից:
Մի ուսումնասիրության արդյունքում պարզվել է, որ կանանց, ովքեր երկար ժամանակ հակաբողմնավորիչներ են ընդունել, ավելի շուտ է հաջողվել հղիանալ, քան նրանց, ովքեր չեն ընդունել հորմոնալ դեղամիջոցներ:
Հնարավոր է դա պայմանավորված լինի նրանով, որ նման դեղամիջոցների ընդունումը կանխարգելում է անպտղության հանգեցնող որոշ հիվանդություններ և բարդություններ, այդ թվում՝
- արգանդի և ձվարանների քաղցկեղ,
- էնդոմետրիոզ,
- փոքր կոնքի օրգանների ոչ սպեցեֆիկ բորբոքային պրոցեսներ,
- արտարգանդային հղիություն:
Հակաբեղմնավորիչ դեղամիջոցների ընդունումն օգնում է նվազեցնել արգանդում և ֆալոպյան փողերում ցանկացած տեսակի բորբոքման զարգացումը՝ կապված էնդոմետրիոզի կամ փոքր կոնքի օրգանների բորբոքման հետ: Իսկ դա իր հերթին նվազեցնում է կպումների զարգացումը:
Կարդացեք. Հակաբեղմնավորիչ հաբերն ունեն նաև բուժիչ ազդեցություն
Որոշ բժիշկներ խորհուրդ են տալիս հակաբեղմնավորիչ հաբերից հրաժարվելուց հետո մեկ կամ երկու ամիս սպասել նախքան հղիանալու փորձերը: Դա թույլ կտա օրգանիզմին վերականգնել բնականոն ցիկլը: Այլ մասնագետներ կարծում են, որ հաբերում պարունակվող հորմոնները դուրս են գալիս օրգանիզմից առաջին դաշտանային ցիկլերի ժամանակ: Այդ պատճառով էլ նրանք պնդում են, որ եթե շատ եք ցանկանում երեխա լույս աշխարհ բերել, ամենևին սպասել պետք չէ:
Մի խոսքով, եթե սպասեք գոնե մինչև բնականոն դաշտանի սկսվելը, ձեր առողջական վիճակը ստուգելու ժամանակ կունենաք: Բացի այդ, դուք կարող եք նախօրոք սկսել ընդունել ֆոլաթթու:
Եթե մինչև հղիանալն սպասեք առաջին դաշտանին, ապա ձեր բժշկին կամ մանկաբարձին ավելի հեշտ կլինի որոշել ծննդաբերության ենթադրյալ ժամկետները: Իսկ ՈՒՁ հետազոտությունը վաղ ժամկետներում կօգնի ավելի հստակ որոշել այն: Եթե հակաբեղմնավորիչներից հրաժարվելուց անցել է երեք ամիս և դաշտանային ցիկլը դեռ չի սկսել, ապա անհրաժեշտ է հղիության ստուգման թեստ անել: Հնարավոր է դուք արդեն հղի լինեք:
Եթե թեստի արդյունքները բացասական են՝ դիմեք բժշկի: Դա կարող է կապված լինել ինչ-որ թաքնված խնդրի հետ, որն անհրաժեշտ է բացահայտել: Այն, որ դուք ընդունել եք հակաբեղմնավորիչ հաբեր, չէր կարող ազդել ձեր հղիանալու կարողության վրա, սակայն կարող էր քողարկել որոշ խնդիրներ՝ օրինակ ձվարանի պոլիկիստոզի հետևանքով առաջացած անկանոն դաշտան և այլն:
