Դեղորայքի ընդունումը հղիության ընթացքում

Դեղորայքի ընդունումը հղիության ընթացքում

Բոլոր ապագա մայրերը հղիության ինն ամիսների ընթացքում գոնե մեկ անգամ ստիպված են եղել դեղորայք ընդունել: Մի կողմից դա կապված է կնոջ առողջական վիճակի ցածր ցուցանիշների և քաղաքներում ոչ բարենպաստ էկոլոգիայի հետ: Մյուս կողմից էլ դրան նպաստում է դեղորայքային միջոցների լայն հասանելիությունը. չէ՞ որ այսօր կարելի է համացանցում կարդալ և մոտակա դեղատնից ձեռք բերել համապատասխան դեղամիջոցը և արագ ու հեշտորեն ինքնուրույն «բուժվել»: Այնինչ պետք է հիշել, որ գրեթե յուրաքանչյուր դեղորայք հղիության ընթացքում ընդունելիս վտանգավոր է ինչպես պտղի, այնպես էլ մոր համար, այդ պատճառով դեղորայքի ընդունման անհրաժեշտությունը պետք է որոշի միայն բժիշկը: Ինչու՞: Պարզենք միասին:

Մասնագետները հղիության վրա դեղորայքի ազդեցությունների ուսումնասիրմանը սկսել են լուրջ վերաբերվել անցյալ դարի կեսերից: Դա կապված էր նրա հետ, որ ապագա մայրերի համար անվտանգ համարված հանգստացնող միջոցը՝ տալիդոմիտը, պարզվեց, որ դարձել էր ավելի քան 10 հազար նորածինների մոտ լուրջ ֆիզիկական արատների պատճառ: Այս դեպքից հետո բժիշկներն սկսեցին բոլոր դեղորայքային միջոցները համարել պտղի համար վտանգավոր, և խորհուրդ տալ հղի կանաց հնարավորինս խուսափել դրանց ընդունումից հղիության ամբողջ ընթացքում:

Ընդհանուր առմամբ այս կամ այն դեղորայքի վնասակար ազդեցությունն արտահայտվում է հետևյալ կերպ՝

  • սաղմը մահանում է նախքան արգանդի պատին ամրանալը կամ դրանից հետո (սաղմի մահվան ազդեցություն),
  • ի հայտ են գալիս պտղի օրգանների և համակարգերի աշխատանքի խանգարումներ, բայց լուրջ դեֆորմացիաներ տեղի չեն ունենում (էմբրոտոքսիկ ազդեցություն),
  • պտղի օրգանիզմում ի հայտ են գալիս ֆունկցիոնալ, կառուցվածքային և կենսաքիմիական խանգարումներ՝ հիմնականում հանգեցնելով լուրջ հետևանքների (թունավորման ազդեցություն):

Դեղարայքը հղիության ընթացքում

Որոշ դեղամիջոցներ բացասաբար են անդրադառնում հղիության վրա նույնիսկ նախքան հղիանալը. դրանք կազմափոխում են կնոջ և տղամարդու սեռական բջիջները (օրինակ՝ ֆենոբարբիտալը, հակացնցումային միջոցները և այլն): Այդ պատճառով դրանց ընդունման ընթացքում, ինչպես նաև բուժման կուրսի ավարտից մի քանի ամիս անց դեռ անհրաժեշտ է հուսալիորեն պաշտպանվել: Հղիության ընթացքում դեղորայքն առավել վտանգավոր է առաջին եռամսյակում (հատկապես ներարգանդային զարգացման առաջինից ութերորդ շաբաթներում), երբ տեղի է ունենում ապագա երեխայի օրգանների և համակարգերի սկզբնավորումը և ձևավորումը: Ավելի ուշ ժամկետներում դրանք սովորաբար չեն առաջացնում արտահայտված անոմալիաներ, սակայն կարող են հանգեցնել օրգանիզմի ֆունկցիաների, ինչպես նաև ծնունդից հետո փոքրիկի ֆիզիկական և հոգեկան վիճակի խանգարմանը:

Կարդացեք՝ Սպազմալիտիկ դեղորայքը՝ նո-շպան և պապավերինը հղիության ընթացքում

Բացի այդ, դեղամիջոցները կարող են բացասաբար ազդել նաև ապագա մայրիկի վրա: Դա կապված է նրա հետ, որ այդ առանձնահատուկ ժամանակահատվածում նրա բոլոր օրգան-համակարգերը փոքր-ինչ այլ կերպ են աշխատում, փոխվում են դեղանյութերի ներծծման, դուրսբերման և օրգանիզմի վրա ներգործության պրոցեսները, դրանք կարող են դառնալ ավելի թունավոր, ընդհանրապես «չաշխատել», առաջացնել ալերգիա, խանգարել այլ օրգանների աշխատանքը և այլն:

Ինքնաբուժումը վտանգավոր է

Տալիդոմիդի ողբերգությունից և լայնածավալ հետազոտություններից հետո մասնագետները բոլոր դեղամիջոցներն ըստ պտղի համար ռիսկի աստիճանի պայմանականորեն բաժանեցին մի քանի խմբերի՝ հարաբերականորեն անվտանգներից մինչև հղիության ընթացքում հակացուցվածները: Այդ տեղեկատվությունը հայտնի է բոլոր բժիշկներին և դեղամիջոց ընտրելիս նրանք ղեկավարվում են դրանով: Բացի այդ, պտղի վրա դեղամիջոցների ազդեցությունը կախված է նաև չափաբաժնից, ընդունման տևողությունից, ընդունման   եղանակից, հղիության ժամկետից, ապագա մայրիկի օրգանիզմի վիճակից: Այդ պատճառով բժիշկները, ունենալով հատուկ գիտելիքներ, կարող են հարաբերակցել պտղի համար բոլոր ռիսկերը և մոր համար օգուտը՝ նշանակելով անհրաժեշտ դեղեր:

Հղիության ընթացքում արգելված դեղամիջոցներ

Օրինակ՝ շատ կանայք հղիության տարբեր ժամկետներում սուր վիճակների առաջացման դեպքում ընդունում են ասպիրին՝ չիմանալով այն մասին, որ ուշ ժամկետներում այն կարող է ճնշել արգանդի կրճատվելու ունակությունը, ինչպես նաև արյունահոսություն առաջացնել երեխայի և մոր օրգանիզմում: Ստրեպտոմիցինը հանգեցնում է լսողության խանգարման, իսկ հազի դեմ որոշ դեղամիջոցներ պարունակում են յոդ, որը կարող է պտղի մոտ առաջացնել վահանաձև գեղձի ֆունկցիայի խանգարումներ: Վիժման վտանգը մեծացնում և արգանդի տոնուսն ուժեղացնում է հալվեն (алоэ) և այլն: Տետրացիկլինային շարքի հակաբիոտիկները փոխում են ատամների գույնը, հանգեցնում կատարակտի առաջացման և պտղի կմախքի զարգացման հապաղման:

Ոչ պակաս կարևոր դեր է խաղում նաև վիտամինների ավելցուկային օգտագործումը: Այսպես, A վիտամինի շատ մեծ չափաբաժինները հանգեցնում են վիժման, պտղի սրտի ախտահարումների և հիդրոցեֆալիայի, իսկ D վիտամինի ավելցուկը կարող է դառնալ նորածնի հոգեկան զարգացման հապաղման պատճառ: Հղիության ընթացքում դեղերի վնասակար ազդեցությունը կարելի է անվերջ թվարկել, սակայն ամեն դեպքում մենք ինքներս հազիվ թե կարողանանք կշռադատել այս կամ այն դեղամիջոցի բոլոր ռիսկերը և օգուտները, այդ պատճառով այդ բարդ գործն ավելի լավ է վստահել բժշկին:

Բուժումը հղիության ընթացքում, անվտանգության տեխնիկա

Չի կարելի ընդունել ցանկացած դեղամիջոց առանց բժշկի նշանակման, եթե նույնիսկ դրանք նախկինում ձեզ օգնել են:

Այլ բժիշկների դիմելիս անմիջապես զգուշացրեք ձեր հղի լինելու (կամ հղիություն պլանավորելու) մասին, որպեսզի նա անվտանգ դեղամիջոցներ նշանակի:

Ոչ մի դեպքում չի կարելի չարաշահել չափաբաժինը, որը նշանակել է բժիշկը:

Փորձեք փոփոխություններ մտցնել ապրելակերպում՝ ավելի քիչ նյարդայնանալ, ավելի շատ հանգստանալ, ճիշտ սնվել:

Սահմանափակեք մեծաքանակ մարդկանցով լի վայրեր այցելելը, ավելի քիչ օգտվեք տրանսպորտային միջոցներից:

Մի ընդունեք նոր սնունդ և մի օգտագործեք նոր կոսմետիկ միջոցներ ալերգիաներից խուսափելու համար:

Սնվեք միայն որակյալ մթերքներով և ցանկալի է՝ ձեր կողմից պատրաստված, որպեսզի բացառվեն սննդային վարակները:

Կարդացեք՝ Կուրանտիլի (դիպիրիդամոլ) ընդունումը հղիության ընթացքում:

Ամփոփում

Բարեբախտաբար հղիության ընթացքում դեղորայքի ընդունումը վնասակար լինելուց բացի կարող է նաև օգտակար լինել: Այդպես՝ անեմիայի, մալարիայի, տուբերկուլյոզի, երիկամների քրոնիկ հիվանդությունների, սրտանոթային համակարգի և այլ հիվանդությունների, ինչպես նաև վիտամինների և արգանդաընկերքային արյան հոսքի բարելավման համար ընդունվող դեղերը ոչ միայն բարելավում են ապագա մայրիկի վիճակը, այլև նպաստում են պտղի բնականոն զարգացմանը, իսկ ծննդաբերության ժամանակ դեղորայքի ողջամիտ ընդունումը կարող է նվազեցնել ցավերը և ծննդաբերական ու մանկաբարձական վնասվածքների հավանականությունը:

Պետք է հիշել՝ ցանկացած դեպքում դեղորայքի ընդունումը հղիության ընթացքում պետք է լինի միայն անհրաժեշտության դեպքում և միայն բժշկի նշանակմամբ:

Կեղծ հղիության նշանները

Կեղծ հղիության նշանները

Հղիության բոլոր նշաններն առկա են, իսկ ՈւՁՀ մասնագետը հետազոտությունից հետո հայտնում է, որ պտղաձուն բացակայում է։ Տարօրինա՞կ է։ Գուցե, բայց բժշկությանն այդպիսի դեպքեր հայտնի են։ Այդ կոչվում է կեղծ հղիություն․․․․

Կրծքի կաթի պահպանումը

Կրծքի կաթի պահպանումը

Որքա՞ն ժամանակ է հնարավոր սենյակային ջերմաստիճանում պահել կրծքի կաթը։ Կարելի՞ է այն սառնարանում պահել...

Սեքսը կրծքով կերակրման շրջանում

Սեքսը կրծքով կերակրման շրջանում

Մի շարք կանայք ԿԿ ֆոնին բախվում են լիբիդոյի նվազման խնդրին․․․

Օրգազմը հղիության դեպքում

Օրգազմը հղիության դեպքում

Հղիությունը չի նվազեցնում սեռական ցանկությունը, սակայն շատերը խուսափում են օրգազմից՝ մտածելով, որ այն կարող է վիժում առաջացնել...