Դաշտանը յուրաքանչյուր կնոջ մոտ կարող է որոշակիորեն տարբերվել․ մեկի մոտ այն տևում է մի քանի օր, մյուսի մոտ՝ ավելի երկար, և միայն այդ տարբերությունը դեռևս չի նշանակում, որ առկա է խնդիր։

Սակայն եթե նախկինում կայուն դաշտանային ցիկլը հանկարծ փոխվում է՝ դաշտանը դառնում է շատ առատ, երկարատև կամ, հակառակը, արտասովոր սակավ, արժե հասկանալ՝ ինչն է դրա պատճառը։

Որքա՞ն արյունն է համարվում չափից ավելի

Առատ դաշտանը միայն «շատ արյուն գալը» չէ։ Կարևոր է նաև, թե որքան է դա ազդում կնոջ առօրյայի վրա։

Ուշադրության արժանի նշաններ են՝

• դաշտանի ընթացքում միջադիրի կամ տամպոնի շատ հաճախակի փոխելու անհրաժեշտությունը,
• գիշերվա ընթացքում հիգիենիկ միջոցը փոխելու համար արթնանալը,
• հագուստի կամ անկողնային պարագաների հաճախակի կեղտոտվելը,
• մեծ չափերի արյան մակարդուկների կրկնվող առկայությունը,
• դաշտանային արյունահոսության երկարատևությունը,
• արտահայտված թուլությունը, հոգնածությունը, գլխապտույտը։

Երկարատև կամ առատ դաշտանները կարող են հանգեցնել երկաթի պակասի և անեմիայի, ուստի խնդիրը միայն անհարմարությունը չէ։

Իսկ եթե դաշտանը դարձել է շատ սակավ
Դաշտանի քանակի նվազումը նույնպես կարող է ունենալ տարբեր պատճառներ։ Այն երբեմն կապված է սթրեսի, քաշի կտրուկ փոփոխության, ինտենսիվ ֆիզիկական ծանրաբեռնվածության կամ հորմոնալ հակաբեղմնավորման հետ։

Սակայն եթե դաշտանը երկար ժամանակ փոխված է մնում կամ սկսում է բացակայել, անհրաժեշտ է գնահատել նաև վահանաձև գեղձի, ձվարանների ֆունկցիայի և այլ հորմոնալ գործոնների հնարավոր ազդեցությունը։

Իսկ դաշտանի տևողության փոփոխությո՞ւնը
Եթե դաշտանը նախկինում ունեցել է ձեզ համար սովորական տևողություն, իսկ վերջին ամիսներին դարձել է զգալիորեն ավելի երկար կամ սկսում է կրկնվել միջդաշտանային արյունահոսությունը, պատճառը պետք է պարզել։

Դաշտանային արյունահոսության փոփոխությունների պատճառ կարող են լինել ինչպես հորմոնալ խանգարումները, այնպես էլ արգանդի միոմաները, պոլիպները, ադենոմիոզը, վահանաձև գեղձի որոշ խնդիրներ և այլ գինեկոլոգիական վիճակներ։

Ե՞րբ  չսպասել

Եթե արյունահոսությունն այնքան առատ է, որ շատ արագ թրջվում են հիգիենիկ միջոցները, կամ առաջանում են ուժեղ թուլություն, գլխապտույտ, շնչահեղձություն, սրտխփոց կամ ուշագնացության զգացում, անհրաժեշտ է շտապ բժշկական գնահատում։

Իսկ եթե փոփոխությունը կրկնվում է մի քանի ցիկլ շարունակ, նույնիսկ առանց արտահայտված ցավի, ճիշտ է դիմել գինեկոլոգի և չսահմանափակվել միայն «հորմոնների անալիզով»։Դաշտանային ցիկլի ցանկացած փոփոխություն հիվանդություն չէ, բայց կայուն փոփոխությունը պատճառ է՝ հասկանալու, թե ինչ է փոխվել օրգանիզմում։