Վերականգնումը ծննդաբերությունից հետո

Վերականգնումը ծննդաբերությունից հետո

Ոչ միշտ է ծննդաբերությունից հետո գեղեցկությունը վերադառնում: Երբեմն հղիությունից հետո խնդիրներ են մնում, որոնք անհանգստացնում են երիտասարդ մայրերին. ավելորդ քաշ, կախ ընկած որովայն, պիգմենտային բծեր, հղիության զոլեր կամ վարիկոզային աստղիկներ: Այս բոլոր խնդիրներն էլ լուծելի են: Անդրադառնանք դրանց առանձին-առանձին:

Ավելորդ քաշ

Կանանցից շատերը կրծքով կերակրման շրջանում ոչ թե նիհարում են, այլ գիրանում՝ դա արդարացնելով այն բանով, թե սնունդը երեխային է անհրաժեշտ: Իսկապես, ձեր մեծ ախորժակն ապացուցում է, որ երեխան «խմում» է կալորիաներով հագեցած ձեր բոլոր ճաշերն ու ընթրիքները: Նա ստանում է այն ամենը, ինչ անհրաժեշտ է իր աճի համար, իսկ դուք հանգիստ շարունակում եք ճարպ կուտակել: Ինչու՞ է այդպես լինում: Որովհետև պարտադիր չէ շատ ուտել, գլխավորը որակյալ և առողջ սնունդ ուտելն է: Ճիշտ սննդակարգի դեպքում դուք ոչ միայն չեք գիրանա, այլև կնիհարեք ոչ ի վնաս երեխայի. չէ՞ որ կրծքով կերակրումն ավելի մեծ էներգիա է խլում, քան հղիությունը: Այժմ ձեր օրգանիզմին օրական սովորականից 500 կալորիա ավել է պետք: Այդ պատճառով էլ բավարար քանակով կալորիաներ ընդունեք, բայց խուսափեք դատարկ՝ առանց սպիտակուցների, վիտամինների և հանքանյութերի սննդամթերքներից: Շատ հեղուկ խմեք: Այն կօգնի բթացնել քաղցի զգացումը, այդ պատճառով էլ խորհուրդ է տրվում ուտելուց առաջ կում-կում մեկ բաժակ հանքային ջուր խմել: Փորձեք օրվա ընթացքում մի քանի անգամ ուտել՝ փոքր չափաբաժիններով, և որպեսզի գիշերը քաղցի զգացում չունենաք, քնելուց առաջ մեկ բաժակ կեֆիր կամ կաթ խմեք:

Ձգտելով նիհարել՝ մի չափազանցրեք ֆիզկուլտուրայի դերը, հատկապես, եթե կեսարյան հատմամբ եք ծննդաբերել: Խուսափեք փորի հատվածում լարվածություն առաջացնող բոլոր տեսակի գործերից: Եթե ծննդաբերությունը բնական ճանապարհով է կատարվել և առանց բարդությունների, կարելի է ծննդաբերությունից մեկ շաբաթ անց սկսել պարզագույն վարժություններ անել: Կարելի է նաև Կեգելի վարժություններն անել՝ հեշտոցի մկանների լարում և թուլացում:

Նիհարելու հարցում կօգնի նաև ձեր երեխան, եթե հաճախակի գրկեք նրան և քայլեք: Սա հրաշալի մարզանք է ձեռքերի մկանների համար: Հրաշալի նախավարժանք կարող է լինել մանկասայլակով զբոսանքը:

Կախ ընկած որովայն

Հղիության ընթացքում որովայնի առաջնային պատը խիստ ձգվում է, իսկ ծննդաբերությունից հետո կախ ընկնում: Որպեսզի այդպես չլինի, անհրաժեշտ է որոշակի վարժություններ անել: Եթե չեք արել, հոգ չէ, փորի մկանների ձգման հատուկ վարժությունների միջոցով արագ կվերականգնեք նախկին տեսքը:

Արյան շրջանառության բարելավման համար օգտակար է լոգանքի ժամանակ սառը կամ կոնտրաստային ջրով մերսումը՝ ժամացույցի սլաքի ուղությամբ, ամեն օր, 10-15 րոպե: Կարելի նաև օգտագործել կոսմետիկ միջոցներ, որոնք շատ են այսօր: Դրանցից են առաձգականությունն ու ձգությունը պահող մարմնի քսուքներն ու լոսյոնները:

Պիգմենտային բծեր

Հղիության երկրորդ կեսում ի հայտ եկող պիգմենտային բծերը երբեմն անհանգստացնում են կանանց: Դրանք լինում են ոչ միայն դեմքի վրա, այլև մարմնի և սովորաբար անհետանում են ծննդաբերությունից հետո 3-4 ամսվա ընթացքում: Պիգմենտային բծերն առաջանում են հորմոնային փոփոխությունների հետևանքով, ավելի կոնկրետ՝ նպաստում է հատուկ հորմոնի ակտիվացումը, որն ազդում է մելանինի ձևավորման վրա: Որպեսզի դրանք արագ անհետանան, կարող եք հատուկ դիմակներ օգտագործել: Բացի այդ, գոյություն ունեն գունային հետքերն անցկացնելու այլ կոսմետիկ միջոցներ, օգնում են նաև պեպենների դեմ քսուքները: Չանցնելու դեպքում կարելի է դիմել ուլտրաձայնային մաքրման:

Հղիազոլեր (ստրիաներ)

Զոլերը ծննդաբերության անբաժան ուղեկիցներն են: Դրանք մնում են որովայնի և ազդրերին: Եթե բաց գույնի մաշկ ունեք և զոլերը նկատելի չեն, ապա կարող եք հեշտությամբ վերացնել դրանք կոլագեն և А ու Е վիտամին պարունակող հատուկ քսուքներով, իսկ ոչ շատ մեծ զոլերը՝ կոսմետիկ կենտրոններում կատարվող հատուկ միջամտություններով:

Երակների վարիկոզային լայնացում

Շատ կանանց ոտքերի վրա ծննդաբերությունից հետո անոթային աստղիկներ են հայտնվում, որոնք վարիկոզային լայնացման նշաններ են: Վառ արտահայտված վարիկոզ են ունենում հատկապես երկվորյակ լույս աշխարհ բերած կանայք: Այս հիվանդության հետքերը վերացնելու նպատակով ծննդաբերությանը հաջորդող 6 ամսվա ընթացքում կարող եք հատուկ հակավարիկոզային քսուքներ և բուժական զուգագուլպաներ օգտագործել: Այս միջոցները հաճախ նշանակում է բժիշկը:

Գոյություն ունեն նաև վարիկոզի բուժման վիրահատական մեթոդներ, որոնք կիրառվում են միայն լակտացիայից հետո, իսկ եթե չեք կերակրում երեխային՝ ծննդաբերությունից հետո 3 ամսից ոչ շուտ: Բուժման վիրահատական մեթոդի ընտրությունը կախված է լայնացած երակների ձափից: Փոքր երակներն աննկատելի են դարձնում հատուկ ներարկումների միջոցով: Առավել լուրջ դեպքերում վարիկոզային երակները հեռացնում են: Պետք չէ թույլ տալ, որ բանը հասնի վիրահատության: Ավելի լավ է կանխարգելել երակների լայնացումը՝ հղիության ընթացքում կատարելով հատուկ պահանջները, սակայն ծննդաբերությունից հետո էլ ամեն բան կորած չէ: Երակների լայնացման հակում ունեցող կանանց համար օգտակար է «Հեծանիվ» վարժությունը. մեջքի վրա պառկելով պետք է շարժել ոտքերը հեծանիվ քշելու նման: Այս վարժությունը պետք է կատարել ամեն օր, գոնե 20 անգամ, բայց ծննդաբերությունից հետո 2 ամսից ոչ շուտ:

Ինչպես տեսնում եք, չկան անելանելի իրավիճակներ: Կարևոր է, որ կարողանաք ճիշտ կազմակերպել ձեր օրվա ռեժիմը, երեխայի խնամքով տարված չմոռանաք ձեր մասին և փորձեք այնպես անել, որ լավ լինի բոլորի համար: Իհարկե, ամեն բան միանգամից չի հաջողվի, բայց աստիճանաբար կսովորեք հիանալի մայր և անկրկնելի կին լինել: Համբերատար եղեք, թույլ մի տվեք ձեզ անհանգստանալ և հանգստությունը փնտրել սառնարանում: Ավելի լավ է նայեք ձեր հրաշք փոքրիկին և վայելեք երջանկությունը:

Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար