Եղունգները և մազերը ամրացնելու ամիս

Ձմռան վերջերին, երբ սովորաբար վիտամինների ու սննդարար նյութերի պակաս ենք ունենում, էներգիայի ընդհանուր մակարդակը նվազում է: Առաջին հերթին տուժում են մազերը և եղունգները, մեր օրգանիզմի այն մասերը, որոնք գոյատևման առումով այնքան էլ կարևոր չեն: Դրանց վերականգնումն ավելի լավ է սկսել սննդակարգի փոփոխությունից: Ափսեում անպայման պետք է լինի երկաթ, ցինկ, վիտամիններ, ամինաթթուներ և անփոխարինելի ճարպաթթուներ:

Սնունդ

Երկաթ: Այս միկրոտարրի պակասից մազերը դառնում են թույլ ու բարակ, իսկ եղունգները կորցնում են առողջ վարդագույն երանգը: Սննդակարգը համալրեք երկաթով հարուստ սնկով, ծովակաղամբով, ոսպով, սիսեռով, լոբով, հնդկացորենով, ինչպես նաև մսով և ձվի դեղնուցով: Ցանկալի է դրանք ուտել թարմ բանջարեղենի հետ, որոնցում, հատկապես կաղամբի բոլոր տեսակներում, սպանախում և կանաչեղենում մեծ է վիտամին С-ի քանակությունը, որը լավացնում է երկաթի յուրացումը:

Կարդացեք՝ Որքա՞ն վիտամին С է անհրաժեշտ մեր օրգանիզմին

Ցինկ: Կարգավորում է գլխի մաշկի վիճակը, նվազեցնում է մազաթափությունը: Այս արժեքավոր միկրոտարրով հարուստ է ոստրեն, ավելի մատչելի մթերքներից՝ լյարդը, ձվի դեղնուցը, կտավատի սերմերը, քունջութը, դդումը և շոկոլադը:

В խմբի վիտամիններ: Ամրացնում են եղունգները և մազի ֆոլիկուլները: B3-ը լավացնում է գլխամաշկի միկրոշրջանառությունը՝ բարելավելով մազերի սնուցումը: B6-ը խթանում է սեփական կերատինի արտադրությունը: B8-ը կարգավորում է մաշկային ճարպի արտազատումը:

Լավագույն աղբյուրներն են՝ խմորիչները (հատկապես գարեջրի), ամբողջական վարսակաձավարը, բանանը, ավոկադոն, եգիպտացորենը, լյարդը, ձուն և լոբին:

Բետա կարոտին: Գլխամաշկի թեփոտումը և քորը վկայում են, որ օրգանիզմն ունի բետա կարոտինի պակաս, որն անհրաժեշտության դեպքում կարող է փոխակերպվել վիտամին А-ի: Դրա պակասը լրացնելու համար պետք է սննդակարգը համալրել դդումով, գազարով, բատատով, չիչխանով, նարնջով, մանդարինով, ինչպես նաև մուգ կանաչ բանջարեղենով և կանաչեղենովё սպանախ, թրթնջուկ, մաղադանոս, նեխուր:

Օմեգա 3, վիտամին Е և D: Այս նյութերն առատորեն առկա են կտավատի և գետնանուշի յուղում, սերմերում և չրերում: Ահա թե ինչու են այս մթերքները մազերը փափկեցնում, ամրացնում և նպաստում մաշկի բնական խոնավացմանը:

Հավելումներ

Բազմաթիվ արտադրողներ կենսաբանորեն ակտիվ հավելումներ են առաջարկում, սակայն հնարավոր է իրավիճակը բարելավել նաև առանց դրանց: Կարելի է որոշ շրջան վիտամինային համալիրներ ընդունել:

Ավելի շատ ակտիվություն

Մազերի վիճակը, որքան էլ որ տարօրինակ թվա, լավացնում է նաև սպորտը և մարմնի մերսումը: Բանն այն է, որ դրանք թուլացնում են պարանոցի և ուսերի լարվածությունը, խթանում են արյան շրջանառությունը նաև գլխամաշկում, իսկ դա նշանակում է, որ մազերը հարստացնում են սննդանյութերով և թթվածնով` արագացնելով դրանց աճը:

Համալիր թերապիա

Ցավոք մազերը թափվում են ոչ միայն սննդանյութերի պակասի հետևանքով: Սթրեսները և հորմոնային անհավասարակշռությունը ևս հաճախադեպ պատճառներից են: Եթե սննդակարգի փոփոխությունից մեկ ամիս անց վիճակի բարելավում չնկատելու դեպքում հարկավոր է դիմել մասնագետի և պարզել իրական պատճառը: Քանի դեռ խնդրի իսկական պատճառը վերացված չէ, կոսմետիկական միջոցները՝ մազերի աճը խթանող ամպուլաները, միայն ժամանակավոր ազդեցություն կգործեն:

Նուրբ խնամք

Որքան էլ որ խնամքի ժամանակակից միջոցները խնայող լինեն, միևնույն է ամենօրյա լվացումն ու հարդարումը սթրես է վարսերի համար։ Դրա հետևանքով մազերը դառնում են չոր, դյուրաբեկ ու բարակ։ Որքան հաճախ ենք շամպույն օգտագործում, այնքան ակտիվ են գործում ճարպագեղձերը։ Ըստ այդմ՝ մաշկը փորձում է վերականգնել վնասված պաշտպանչ շերտը։ Հարկավոր է շամպույնն օգտագործելուց առաջ այն խառնել ջրով՝ մեղմելու մաշկի վրա թողնելիք ազդեցությունը։ Չոր շամպույնը, ինչպես նաև հատուկ շիճուկները, որոնք կարգավորում են ճարպի արտադրությունը, կօգնեն նվազեցնել գլուխը լվանալու հաճախականությունը։