Հիպոֆիզի գլիկոպրոտեիդային գոնադոտրոպային հորմոն։ Խթանում է տղամարդկանց սպերմատոգենեզը և կանանց ֆոլիկուլների զարգացումը։

Սինթեզվում է հիպոֆիզի առաջնային բլթի բազոֆիլային բջիջների կողմից գոնադալիբերինի, սեռական հորմոնների և ինհիբինի վերահսկողությամբ։ ՖԽՀ-ն արյան մեջ արտանետվում է իմպուլսներով (1 - 4 ժամ դադարով)։ Արձակման պահին հորմոնի խտությունը 1,5 - 2,5 անգամ գերազանցում է միջին մակարդակը․ արտանետումը տևում է մոտ 15 րոպե։

Նախապատրաստում

Հետազոտությունն անցկացվում է դաշտանային ցիկլի 6 - 7-րդ օրը, եթե բուժող բժիշկն այլ ժամկետ չի նշել։ Արյուն հանձնելուց 3 առաջ անհրաժեշտ է դադարեցնել սպորտային մարզումները, 1 ժամ առաջ՝ ծխելը։ Արյուն հանձնելուց անմիջապես առաջ հարկավոր է հանգստանալ։

Խորհուրդ է տրվում արյունը հանձնել առավոտյան (ժամը 8-ից 11-ն ընկած հատվածում), քաղցած վիճակում (առնվազն 8 և առավելագույնը 14 ժամ քաղցած մնալուց հետո, կարելի է ջուր խմել)։ Պետք է նախօրեին խուսափել սննդի ծանրաբեռնումից։ ՖԽՀ-ի և լյուտեինիզացնող հորմոնների քիչ արտադրմանը նպաստող վիճակներում նրանց դադարներով արտադրման բնույթի հետևանքով հարկավոր է վերցնել արյան երեք նմուշ՝ յուրաքանչյուրը նվազագույնը 30 րոպե հետո։

Կանանց օրգանիզմում ՖԽՀ-ն խթանում է ֆոլիկուլների ձևավորումը։ Հասնելով կրիտիկական մակարդակի՝ ՖԽՀ-ն հանգեցնում է ձվազատման: Կարևոր է ԼՀ-ի և ՖԽՀ-ի հարաբերակցությունը։ Նորմայում մինչև մենարխեն այն հավասար է 1-ի, մենարխեից մեկ տարի անց՝ 1-1,5, մենարխեի սկսվելուց երկու տարվանից մինչև մենոպաուզան ընկած ժամանակահատվածում՝ 1,5-2։

Որոշման սահմաններն են՝ 0,05 մԵդ/մլ-750 մԵդ/մլ։

Ցուցումներ

• Լիբիդոյի՝ սեռական հակման, և պոտենցիայի նվազում։ 
• Անպտղություն։ 
• Անօվուլյացիա՝ ձվազատման բացակայություն։ 
• Օլիգոմենորեա և ամենորեա։ 
• Դիսֆունկցիոնալ արգանդային արյունահոսություն։ 
• Չզարգացող հղիություն։ 
• Վաղաժամ սեռական հասունացում և սեռական զարգացման հապաղում։ 
• Աճի հապաղում։ 
• Ձվարանների պոլիկիստոզային համախտանիշ։ 
• Էնդոմետրիոզ։ 
• Ներքին սեռական օրգանների քրոնիկական բորբոքման համախտանիշ։ 
• Հորմոնաթերապիայի արդյունավետության վերահսկում։