Կպումներ կարող են առաջանալ ինչպես արգանդում, այնպես էլ փոքր կոնքում՝ խոչընդոտ հանդիսանալով հղիության համար: Կպումների մասին հաճախ ենք լսում, սակայն չենք պատկերացնում, թե ինչ երևույթ է և ինչի հետևանքով է առաջանում:

Արգանդի խոռոչի կպումներ կամ ներարգանդային սինեխիաներ

Առաջացման պատճառները տարբեր են: Հիմնականում առաջանում են արգանդի խոռոչի քերման, աբլացիայի (արգանդի խոռոչի այրում), տուբերկուլյոզի հետևանքով և այլն:

Ախտորոշվում է ուլտրաձայնային հետազոտության, հիստերոսալպինգոգրաֆիայի, ինչպես նաև հիստերոսկոպիայի միջոցով:

Փոքր կոնքում առաջացած կպումներ

Փոքր կոնքի կպումների առաջացման պատճառները ևս տարաբնույթ են: Այստեսակ կպումները վտանգավոր են, որովհետև կարող են հանգեցնել արգանդափողերի լուսանցքների փակման, շարժունակության (պերիլստատիկայի) նվազման, անցանելիության խանգարման, ինչը, ի վերջո, հանգեցնում է անպտղության (սպերմատոզոիդին չի հաջողվում հասնել ձվաբջջին և բեղմնավորել այն):

Փոքր կոնքում կպումներ են առաջանում դրանում առկա բորբոքումների, վարակների, օրինակ՝ քլամիդիայի, կանանց սեռական օրգանների տուբերկուլյոզի, պերիտոնիտի հետևանքով և այլն:

Ախտորոշում

Ախտորոշվում է՝ հիմնվելով հիվանդության պատմության, հիստերոսալպինգոգրաֆիայի, ուլտրաձայնային հետազոտության և լապարասկոպիայի արդյունքների վրա:

Բուժում

Արգանդի խոռոչի կպումների բուժման նպատակով իրականացվում է հիստերոսկոպիա, արգանդի խոռոչի քերում, իսկ փոքր կոնքի կպումների ժամանակ՝ լապարասկոպիա կամ լապարատոմիա: Կատարվում է կպումների անջատում և արգանդափողերի անցանելիության վերականգնում: Եթե չի հաջողվում վերականգնել արգանդափողերի անցանելիությունը, ապա հղիանալու նպատակով դիմում են արտամարմնային բեղմնավորման: