Քլամիդիոզ. սեռական ճանապարհով փոխանցվող հիվանդություն

Քլամիդիոզ. սեռական ճանապարհով փոխանցվող հիվանդություն

Միզասեռական քլամիդիային վարակը սեռական ճանապարհով փոխանցվող ամենատարածված հիվանդություններից մեկն է: Հիվանդները հիմնականում վերարտադրողական տարիքի կանայք և տղամարդիկ են (20-ից 40 տարեկան):

Միզասեռական քլամիդիոզի հարուցիչը Chlamidia trachomatis մակաբույծ միկրոօրգանիզմն է: Թաքնված՝ ինկուբացիոն շրջանը վարակումից հետո տևում է 5-7 օրից մինչև 3-6 շաբաթ: Բավականին հաճախ վարակն արտահայտված ախտանշաններ չի ունենում կամ էլ ընթանում է սեռական ճանապարհով փոխանցվող այլ հիվանդություններին զուգընթաց՝ սրելով միմյանց ախտածին ազդեցությունը:

Փոխանցման ուղիները և նախանշանները

Միզասեռական քլամիդիոզը փոխանցվում է շփման (սեռական, կենցաղային), ինչպես նաև հորիզոնական ուղղով՝ հղիության և ծննդաբերության ընթացքում մորից պտղին: Ընթանում է ինչպես սուր, այնպես էլ անախտանիշ կամ քրոնիկական՝ պարբերաբար կրկնվելով: Մի շարք դեպքերում օրգանիզմի դիմադրողականությունը ճնշում է միկրոօրգանիզմների բազմացում: Դրա շնորհիվ քլամիդիաները պահպանվում են լորձաթաղանթներում և հայտնաբերվում են միայն բարձր ճշգրտություն ունեցող ախտորոշիչ մեթոդներով:

Վարակը կարող է ախտահարել միզասեռական համակարգի բացառապես ստորին հատվածը՝ նպաստելով բարթոլինիտի, էնդոցերվիցիտի, միզուկաբորբի, վագինիտի (հեշտոցաբորբ) առաջացմանը կամ էլ կարող է թափանցել այլ օրգան-համակարգեր՝ նպաստելով սալպինգիտի կամ սալպինգաօֆորիտի, էնդոմետրիտի, պերիհեպատիտի, պելվիապերիտոնիտի զարգացմանը: Դրա հետևանքով առաջացած բարդություններն են.

Կոնքային քրոնիկական ցավի համախտանիշ
Կպումներ փոքր կոնքում
Արտարգանդային հղիություն
Արգանդափողերի ամբողջական անանցանելիություն կամ մասնակի անցանելիություն Չզարգացող հղիություն
Երկարատև անպտղություն

Տղամարդկանց համար՝ էպիդիդիմիտ, շագանակագեղձի բորբոքում, վեզիկուլիտ:

Միզասեռական քլամիդիոզի ախտանշանները տարաբնույթ են և կախված են հիվանդության տևողությունից, ախտահարման տեղակայումից և օրգանիզմի դիմադրողական համակարգի վիճակից:

Կանանց քլամիդիոզն արտահայտվում է հետևյալ ախտանշաններով.

  • Հեշտոցից եկող լորձային կամ թարախային, դեղնավուն, տհաճ հոտով արտադրություն
  • Սեռական օրգանների և միզուկի շրջանում քոր ու այրոց 
  • Ցավեր միզարձակման ընթացքում 
  • Փորի ստորին հատվածի ցավեր, որոնք սրվում են դաշտանից առաջ 
  • Դաշտանից դաշտան ընթացքում բեկումնային արյունահոոություններ 
  • Օրգանիզմի ջերմության մի փոքր բարձրացում և թուլություն

Տղամարդկանց քլամիդիոզը կարող է ուղեկցվել հետևյալ նախանշաններով.

  • Երկարատև միզուկաբորբ՝ միզուղիների թեթև բորբոքում 
  • Միզելիս ցավ, քոր և այրոց 
  • Ցավեր գոտկատեղի, ձվարանների, ամորձապարկի (փոշտ) շրջանում 
  • Ընդհանուր թուլություն, ջերմության բարձրացում 
  • Պղտոր մեզ 
  • Արյունային արտադրություն միզելիս կամ սերմնաժայթքման ժամանակ

Ինչպես է ախտորոշվում

Միզասեռական համակարգի քլամիդիոզի հարուցչի հայտնաբերման նպատակով կիրառվում են ուղղակի և անուղղակի մեթոդներ: Դրանք են.

  • Բջջային կուլտուրաների ցանքս (համարվում է ճշգրիտ) 
  • Պոլիմերազշղթայական ռեակցիա (ևս ճշգրիտ է) 
  • Ֆլուորեսցենտ հակամարմինների ուղիղ փորձ (DFA) 
  • Շիճուկաբանական հետազոտություն (արյան շիճուկում քլամիդիաների նկատմամբ հակամարմինների հայտնաբերում, ինչը թույլ կտա պարզել հիվանդության ծանրության աստիճանը)

Ինչպես է բուժվում

Քլամիդիոզի բուժումը պետք է համալիր լինի՝ ներառելով հարուցչի դեմ պայքարին ուղղված թերապիա, աղիների դիսբիոզի վերացում, միզասեռական համակարգի վարակների բուժում և դիմադրողականության բարձրացում: Նշանակվում են հակաբիոտիկներ՝ ազիտրոմիցին, դոքսիցիկլին, լեվոֆլոկսացին և այլն, ինչպես նաև հակամիկոտինային միջոցներ և էուբիոտիկներ: Հիվանդության կրկնվող ձևի դեպքում կիրառվում են իմունամոդուլյատորներ և ֆերմենտային պատրաստուկներ:

Բուժման տևողությունը կախված է հիվանդության ծանրության աստիճանից, բարդությունների առաջացման հավանականությունից և կարող է ձգվել երկու շաբաթից մինչև մի քանի ամիս: Թերապիայի ընթացքում խորհուրդ է տրվում սեռական ժուժկալություն պահպանել և չօգտագործել կաթից ըմպելիքներ: Ընդ որում՝ բուժում պետք է անցնի նաև հիվանդի սեռական զուգընկերը:

Ինչպես կանխել վարակումը

Քլամիդիոզի վարակման կանխարգելումը ոչնչով չի տարբերվում այլ սեռավարակների կանխարգելման միջոցներից: Նախ և առաջ հարկավոր է ընտրողաբար մոտենալ սեռական զուգընկերների հարցում, իսկ պատահական սեռական կապերի դեպքում պահպանակ օգտագործել: Կանխարգելման անուղղակի միջոցներն են առողջ ապրելակերպը և սեռական օրգանների հիգիենայի պահպանումը:

Բացի այդ, անհրաժեշտ է ժամանակ առ ժամանակ այցելել բժշկի և հետազոտվել սեռավարակների հայտնաբերման նպատակով: Դա հատկապես կարևոր է այն զույգերի համար, ովքեր պատրաստվում են երեխա ունենալ, քանի որ քլամիդիոզը հղիության ընթացքում կարող է բացասաբար ազդել պտղի ներարգանդային զարգացման և լույս աշխարհ գալուց հետո նորածնի առողջության վրա: Սա նշանակում է, որ սեփական առողջության նկատմամբ պատասխանատու մոտեցումը ձեր ապագա երեխայի առողջական խնդիրների կանխարգելման լավագույն միջոցն է:

Լորձային արտադրություն հեշտոցից

Լորձային արտադրություն հեշտոցից

Հեշտոցից արտահոսող լորձային արտադրությունը, եթե նորմալ բնույթի է, բնական երևույթ է։ Վերարտադրողական տարիքի բոլոր կանայք էլ ունենում են...

Տրամադրությունը պայմանավորող հորմոնները

Տրամադրությունը պայմանավորող հորմոնները

Պատասխանատու են մեր հոգեհուզական վիճակի համար։ Ահա այն հիմնական հորմոնները, որոնք պայմանավորում են մեր լավ տրամադրությունը․․․

Գեղեցկության և առողջության երաշխիքները

Գեղեցկության և առողջության երաշխիքները

Տարիքին համընթաց օրգանիզմում բազմաթիվ փոփոխություններ են կատարվում, ոմանք, այնուամենայնիվ, շարունակում են պահպանել իրենց գեղեցիկ տեսքն ու առողջությունը․․․

Ե՞րբ պլանավորել հղիությունը վիժումից հետո

Ե՞րբ պլանավորել հղիությունը վիժումից հետո

Հաճախ է պատահում, որ կանայք, որոնց դեպքում վիժումը եղել է հղիության վաղ ժամկետում, ցանկանում են հղինալ վիժումից անմիջապես հետո․․․․