Ինչպես 4 քայլով վերացնել կախվածությունը շաքարից

Ինչպես 4 քայլով վերացնել կախվածությունը շաքարից 

Շաքարավազը սննդի թիվ մեկ հավելումն է. այն հանդիպում է խմիչքների  (հաճախ օշարակների տեսքով), հացի, սոուսների, համեմունքների և տարբեր սննդամթերքների մեջ՝ ներառյալ ցածր յուղայնությամբ սննդամթերքները: 

Նիհարելու  և առողջությունը բարելավելու համար լավագույն քայլերից մեկը սննդի մեջ շաքարավազի չափաբաժնի նվազեցումն է: Սա չի պահանջում ահռելի կամքի ուժ կամ քաղցրավենիքից կտրուկ հրաժարվելու որոշում (եթե, իհարկե, ինքներդ չեք ցանկանում): 

Ընդամենը չորս քայլ՝ ձեր սննդակարգից շաքարը բացառելու համար 

Դա արեք ըստ հերթականության 

1. Կազմեք ծրագիր մեկ ամսվա համար (կամ ավելի) 

Բազմաթիվ ապացույցներ կան, որ շաքարավազը կախվածություն է առաջացնում: Բայց նույնիսկ եթե դուք չեք կարող ապրել առանց քաղցրավենիքի և սովոր եք շաքարավազին, ապա մի հուսահատվեք: 

Շատերը կփորձեն ձեզ համոզել, որ կախվածությունից ազատվելը բավականին դժվար է ուղեղի վրա հորմոնների և նեյրոհաղորդիչների ազդեցության պատճառով: Բայց նման դիրքորոշումը միանշանակ չէ: Փաստորեն, ճիշտ մոտեցմամբ կարող եք ազատվել շաքարից։ 

Շաքարավազից հրաժարվելու որոշում կայացնելիս մարդիկ սխալվում են, երբ  միանգամից  բացառում են շաքարի օգտագործումը: Դա կարող է գործել չափազանց ուժեղ հակումներ ունեցող մարդկանց դեպքում, բայց չափավոր հակումների պարագայում, փորձը ցույց է տվել, որ նուրբ մոտեցումը շատ ավելի լավ է գործում: Վստահ եղեք, որ կկարողանաք կարգավորել այն և խոստացեք ինքներդ ձեզ անել առավելագույնը նշված ժամկետում:  

2. Գտեք շաքարի թիվ մեկ աղբյուրը ձեր սննդակարգում 

Մտածեք, թե ինչ եք ուտում և խմում, և գտեք շաքարի հիմնական աղբյուրը: Հիմնական  կասկածելի աղբյուրներն են՝ սոդայով ըմպելիքները, գազավորված ըմպելիքները, խմորեղենը։ Միգուցե շատ եք խմում պատրաստի մրգահյութեր, գնում եք լիտրերով լիմոնադ, յուրաքանչյուր բաժակ թեյի մեջ չորս ճաշի գդալ շաքարավազ եք ավելացնում կամ անընդհատ ուտում եք քաղցր յոգուրտ և աղանդեր, բլիթներ կամ կեքս: 

Երբ ձեզ համար պարզ է, թե ինչն է անհրաժեշտ հեռացնել ընտրացանկից, կազմեք ծրագիր: Եթե թեյ եք խմում երեք ճաշի գդալ շաքարավազով, ապա աստիճանաբար կրճատեք քանակությունը, որպեսզի մեկ շաբաթ անց խմեք երկու գդալ շաքարավազով: Եվս մեկ շաբաթ անց` մեկով:

Եթե շաբաթական 4 լիտր գազավորված ըմպելիք եք խմում, առաջին յոթ օրվա ընթացքում պակասեցրեք երկու բաժակով, ապա նորից ու նորից: Աստիճանաբար հրաժարվելը անհանգստություն չի պատճառի: Հաջողություն ունենալու համար հարկավոր է  մոռանալ ցանկության մասին, անընդհատ չմտածել  զրկանքի մասին։ 

3. Ընտրեք բնական մթերքներ 

Իհարկե,  պատրաստի   ուտելիքների  ընտրությունը բազմազան է: Իսկ շաքարավազը թաքնվում է տորթերի, թխվածքաբլիթների, պաղպաղակի, ադիբուդիի, մյուսլիի, սալիկների, համեմունքների և սոուսների մեջ: 

Ցածր յուղայնությամբ մթերքները հաճախ գովազդվում են որպես առողջարար, բայց դրանք նաև հաճախ  վերամշակվում են, և յուղի փոխարեն պարունակում են շաքար կամ քաղցրացուցիչներ: 

Պատրաստի կերակուրներն ու կիսաֆաբրիկատները աստիճանաբար փոխարինեք բնական սնունդով: Ինքնուրույն ճաշ պատրաստելը կօգնի  զգալիորեն կրճատելու շաքարի ընդունումը: Գործեք այս ուղղությամբ 30 օր՝ օգտագործելով նույն փուլային անցումը, ինչպես նախկինում: 

4. Կախվածության դեմ պայքարեք քնի միջոցով 

Ի՞նչ կապ կա քնի և շաքարի օգտագործման միջև: Հանգիստը կօգնի ձեզ հաղթահարելու կախվածությունը այնպես, ինչպես քաղցրավենիքն օգնեց ձեզ այն ձեռք բերելու: 

Բազմաթիվ ուսումնասիրությունների արդյունքում պարզվել է, որ երկու ժամ քնի պակասը (անհրաժեշտ է հանգստանալ օրական 7-9 ժամ) հանգեցնում է չափազանց շատ ուտելու և սննդային կախվածության: Պատանիները, ովքեր ավելի քիչ են քնում, քաղցրավենիք օգտագործում են երկու անգամ ավելի հաճախ, քան մյուսները, և դա մեծահասակների մոտ ախորժակի բարձրացման և բարձր կալորիականությամբ մթերքներից կախվածության է հանգեցնում: 

Հետևաբար, ավելի քիչ շաքար օգտագործելու և  կախվածությունը հաղթահարելու համար անհրաժեշտ է բավականաչափ քնել: