Արգանդափողի քաղցկեղն ըստ էության ադենոկարցինոմա է, որը դրսևորվում է հավելումների ուռուցքի տեսքով։ Արգանդափողի առաջնային քաղցկեղը հազվադեպ է հանդիպում։ Սովորաբար ախտորոշվում է պոստմենոպաուզայի ընթացքում։

Ռիսկի գործոններն են՝

• տարիքը, 
• քրոնիկ սալպինգիտ, 
• անպտղություն։ 

Կլինիկական դրսևորումները

Ֆալոպյան փողի քաղցկեղ ունեցող բուժառուների մեծամասնությունը հավելումների հատվածում ուռուցք է ունենում կամ նշում է որովայնի խոռոչում կամ կոնքում զգացվող ոչ հստակ ախտանշաններ՝ փքվածություն, ցավ, դիսկոմֆորտ և այլն։

Ամենաբնորոշ ախտանշանը ցավն է, որն ուղեկցվում է առատ արտադրությամբ և հավելումների ուռուցքանման գոյացության առկայությամբ։

Ախտորոշումը

Ախտորոշումը կատարվում է սոնոգրաֆիայի, համակարգչային տոմոգրաֆիայի և վիրահատական միջամտության ժամանակ ինտրաօպերացիոն էքսպրես պաթոհիստոլոգիական պատասխանի հիման վրա (ախտորոշումը հաստատելու, ծանրության աստիճանը և վիրահատական ծավալըորոշելու համար)։

Բուժումը

Բուժումը ենթադրում է՝

• աբդոմինալ ամբողջական հիստերէկտոմիա և երկկողմանի սալպինգոօֆորէկտոմիա, 
• ըստ ցուցման՝ սուպրակոլիկ օմենէկտոմիա, 
• երբեմն՝ ցիտոռեդուկտիվ վիրահատական միջամտություն, եթե բժիշկը կասկածում է քաղցկեղի տարածվածության հարցում և այլն։ 

Այսօր լայն կիրառություն է գտել լապարասկոպիկ բուժումը: Այն բժիշկներին թույլ է տալիս մանրակրկտորեն գնահատել կոնքի, բարակ և հաստ աղիների, որովայնի վերին հատվածի, ստոծանու մակերեսի և որովայնի այլ հատվածների վիճակը։

Հետվիրահատական բուժումը նման է ձվարանի քաղցկեղի հետվիրահատական բուժմանը։ Հազվադեպ է ներքին ճառագայթային թերապիա նշանակվում։

 

Աղբյուրը՝ likar.info