Վիտամին E-ն հղիության պլանավորման փուլում

04.05.2016 29390
Ինչպես բազմիցս նշել ենք, հղիությանը պետք է նախապես պատրաստվել։ Կատարյալ կլինի, եթե նախապատրաստումն սկսեք պլանավորվող բեղմնավորումից 3-6 ամիս առաջ։ Ինչպես կնոջ օրգանիզմի, այնպես էլ երեխայի զարգացման համար կարևոր դեր են խաղում վիտամինները։ Պետք է հատուկ ուշադրություն դարձնել և ապահովել, որ վիտամին E-ի քանակությունն օրգանիզմում պակաս չլինի։ Այն կարևորագույն վիտամիններից է, որոնք պետք է ընդունել հղիությունից առաջ և դրա ընթացքում։

Վիտամին E-ն կարելի է անվանել հակաօքսիդանտ, որը վերացնում է բոլոր բորբոքումները, լավացնում է արյան շրջանառությունը, միկրոշրջանառությունը, ինչպես նաև զգալիորեն լավացնում է հյուսվածքների սնուցումը։ Այն մասնակցում է փոխանակման պրոցեսներին, լավացնում է արյան մակարդելիությունը և առհասարակ դրական ազդեցություն ունենում արյունատար համակարգի ընդհանուր վիճակի վրա։ Մկաններն սկսում են ավելի ինտենսիվ աշխատել, իսկ վերքերն ավելի արագ են ապաքինվում։ Բացի այդ, վիտամին E-ն անվանում են երիտասարդության վիտամին, քանի որ այն զգալիորեն դանդաղեցնում է տարիքային պիգմենտացիայի առաջացումը, ինչպես նաև կարևոր դեր խաղում հղիության պլանավորման փուլում։

Օգտակար հատկությունները

Այդ վիտամինը ձվարաններին օգնում է լիարժեք կատարել իրենց ֆունկցիաները։ Հղիության ամբողջ ըթացքում ապահովում է հորմոնային ֆոնի բնականոն վիճակը, ինչպես նաև պտղին պաշտպանում է ինքնաբեր վիժումից։ Ունենում է նաև դրական այլ ազդեցություն՝ դաշտանային ցիկլի վերականգնում, չզարգացած արգանդի հասունացում, ձվարանների դիսֆունկցիայի բուժում, վերարտադրողական ֆունկցիայի բարելավում, սեռական գեղձերի աշխատանքի կարգավորում և այլն։

Վիտամին E-ն անհրաժեշտ է, որպեսզի պտղի շնչառական համակարգը բնականոն զարգանա։ Այդ պատճառով իր կարևորությամբ այն կարելի է համեմատել ֆոլաթթվի հետ։

Վիտամին E-ն նպաստում է ընկերքի ձևավորմանը, ապահովում վերջինիս լիարժեք աշխատանքը, աջակցում է պրոլակտինի արտադրմանը, որն անհրաժեշտ է լակտացիային, ինչպես նաև կանխում է նորածնի հեմոլիտիկ սակավարյունությունը։ Դրական ազդեցություն է թողնում ծայրամասերի արյան շրջանառության վրա՝ մեծացնելով էրիթրոցիտների կայունությունը քայքայման հանդեպ, որն առաջանում է մոր և պտղի արյան անհամատեղելիության պատճառով։

Հղիության ընթացքում վիտամին E-ն թույլ չի տալիս, որ արգանդի մկաններն ուժեղ կրճատվեն, դրանով հանդերձ հաճախ նորածինները կամ ժամանակից շուտ ծնված երեխաներն ունենում են դրա պակաս, ինչը պայմանավորված է այն բանով, որ վիտամինը շատ վատ է հաղթահարում ընկերքի խոչընդոտը։

Վիտամին E պարունակող դեղապատրաստուկներ և մթերքներ

Վիտամին E-ն պարտադիր առկա է լինում պոլիվիտամինային դեղապատրաստուկների կազմում։ Եթե չգիտեք, թե ինչ համալիր ընտրեք, խորհրդակցեք բժշկի հետ։

Վիտամին E-ն պարունակվում է բուսական յուղերի (արևածաղկի, եգիպտացորենի և այլն), մարգարինի որոշ տեսակների, նուշի, գետնընկույզի, ցորենի եւ նրա սերմի, եղինջի, մասուրի պտուղների, ազնվամորու տերևների, առվույտի, կտավատի սերմերի մեջ, հնդկաձավարի (գրեչկա), վարսակաձավարի, խիստ օգտակար` ցորենի թեփի, թարմ կանաչ ոլոռի, թարմ սպանախի և բրոկկոլիի, լոլիկի, ընկուզեղենի, սաղմոն ձկան (լոսոս), հացահատիկային բույսերի սաղմնային հատիկների, մսի, ավոկադոյի, կանաչեղենի, կաթի, կարագի մեջ:

Կենդանական ծագում ունեցող սննդատեսակներում գրեթե չի լինում, կա միայն լյարդի, ձվի դեղնուց և կաթի մեջ։ Ակտիվ ձևը`ալֆա-տոկոֆերոլը, թարմ բանջարեղենի մեջ է: Սառեցված բանջարեղենի մեջ դրա քանակությունը կրկնակի քիչ է, իսկ պահածոյացված տարբերակում գրեթե չկա: Չի պարունակվում գազարի, սոխի, կարտոֆիլի, վարունգի, հացի, մակարոնեղենի մեջ:

Օգտագործմանը ձևը և հակացուցումները

Վիտամին E-ի օրական չափաբաժինը 7-10 մգ է հղիության պլանավորման փուլում, հղիության ընթացքում՝ առավելագույնը 15մգ։ Հաշվի առեք, որ վիտամին E-ի քանակը տարբեր է լինում։ Ուստի այն պետք է ընդունել միայն բժշկի նշանակած դեղաչափով։

Վիտամին E-ն հաբերի տեսքով ընդունելու դեպքում անպայման պետք է հետևել, որ ստամոքսը դատարկ չլինի, խմեք ուտելուց հետո: Ցանկալի է ճարպեր պարունակող որևէ սննդամթերք ուտելուց հետո խմել, օրինակ` ընկույզ, մրգեր, արևածաղիկ և այլն. չէ՞ որ վիտամին E-ն ճարպերը քայքայող հատկություն ունի:

Վիտամին E-ն երբեմն կողմնակի ազդեցություն է թողնում, հատկապես, երբ նշանակած քանակից շատ եք օգտագործում։ Կարող է, օրինակ, ալերգիկ ռեակցիա առաջանալ, փորլուծություն կամ սրտխառնոց։ Մեծ քանակությամբ օգտագործելու դեպքում ճնշումը խիստ բարձրանում է։ Շատ զգույշ պետք է լինեն նրանք, ովքեր սրտամկանի ինֆարկտի առաջացման վտանգ ունեն։ Մեծ քանակությունը կարող է լրջորեն վնասել նաև պտղին՝ առաջացնելով տարաբնույթ արատներ և դառնալով մահվան պատճառ։ Վիտամինն օգտագործելուց առաջ անպայման խորհրդակցեք բժշկի հետ: