Մաշկաբանը և այուրվեդայի փորձագետը միավորել են ջանքերը և կազմել ակնեի քարտեզ։ Այն կօգնի հասկանալ դեմքի մաշկի չորության, կնճիռների և ցանավորման պատճառը։

Ըստ այուրվեդայի՝ մարմնի տարբեր մասերն արտացոլում են օրգանիզմի ներքին վիճակը։ Այուրվեդայի մասնագետ Մոնիկա Վաթերսը և մաշկաբան Ջոշուա Ցայխերը, ով ղեկավարում է Նյու Յորքի Մաունթ Սինա հիվանդանոցի մաշկաբանության բաժանմունքը, առաջարկում են անգիր իմանալ ակնեի քարտեզը․ այն ցանավորման պատճառը հասկանալու և վերացնելու արագ միջոց է։ Խնդրի լուծման առաջին քայլը սնունդը փոխելն է։

Դիտեք՝ Ակնե․ բժշկական անիմացիա

Կզակ, պարանոց, այտոսկրերի հատված

Այս հատվածում ակնե առաջանում է հիմնականում հորմոնային անհավասարակշռության հետևանքով, հաճախ՝ դաշտանային ցիկլի որոշակի փուլում։ Այտոսկրերի գծով տարածված կորյակները ևս առաջանում են ստամոքսում խմորիչների մեծ ավելցուկից (քաղցրեղենի և հացեղենի չարաշահում)։ Բժիշկ Ցայխերը խորհուրդ է տալիս օգտագործել սալիցիլաթթվով և պերոքսիդով պատրաստված կոսմետիկական միջոցներ, իսկ Մոնիկա Վաթերսը՝ կրճատել ծանր, կրեմային, կրախմալային, խոնավ և քաղցր ուտելիքների քանակը (շաքար, չրեղեն, կաթնամթերք, սպիտակ ալյուր, սոյա, խաղող, բանան, գինի)։

Այտեր

Այս հատվածում առաջացաց ակնեի հիմնական պատճառը ձեռքերն են։ Ուստի փորձեք որքան հնարավոր է քիչ ձեռք տալ դեմքին։ Բացի այդ լավ կլինի սովորություն դարձնել բջջային հեռախոսը հակամանրէային անձեռոցիկով մաքրելը։ Հաճախ փոխեք բարձի երեսը և դեմքի սրբիչը։ Հակառակ դեպքում կեղտի և յուղի կուտակումը մաշկի վրա կարող է խցանել փոքրիկ անցքերը։ Ըստ այուրվեդայի՝ այտերը կապված են շնչառության օրգանների հետ (թոքերի), այդ պատճառով ծխելը ևս կարող է ակնեի պատճառ դառնալ։

Քթի և ճակատի հատված

Ճարպային գեղձերն ամենից շատ կենտրոնացած են քթի և ճակատի հատվածում։ Ցանավորման հիմնական պատճառը դեռահասության տարիքում հորմոնային «պայթյունն» է և տևական սթրեսը։ Ըստ այուրվեդայի՝ ճակատը կապված է նյարդային և մարսողական համակարգերի հետ, այդ պատճառով էլ արյան շրջանառության վատացումը, ճնշման տատանումները և ստամոքսի հետ կապված խնդիրները ևս կարող են ակնե առաջացնել։

Վաթերսը խորհուրդ է տալիս շատ ջուր խմել և քիչ ուտել վերամշակված սննդամթերքներ ու ուտեստներ, ինչպես նաև նվազեցնել ճարպերի քանակը, որ օրգանիզմն ստանում է այնպիսի աղբյուրներից, ինչպիսիք են պանիրը, կաթը և հիդրոգենեզիրացված բուսական ճարպերը (խանութից գնված թխվածք և քաղցրեղեն)։ Հարկավոր է մարսողությունը լավացնելու նպատակով սննդակարգը համալրել պրոբիոտիկներով և պրեբիոտիկներով։ Սթրեսը հաղթահարելուն և նյարդային համակարգն ամրապնդելուն կօգնի յոգան, մեդիտացիան և շնչառական վարժությունները։

Քթի վրա կորյակների առաջացումը կարող է վկայել ճնշման խնդիրների մասին։ Այդ դեպքում նվազեցրեք կծու ուտելիքների, մսի, ալկոհոլի և սուրճի քանակությունը՝ միաժամանակ սննդակարգում մեծացնելով օմեգա երեք ճարպաթթուների պարունակությունը (հունական ընկույզ, ավոկադո, ձիթայուղ և կտավատի ձեթ)։