Դեպրեսիան հղիության ընթացքում

Դեպրեսիան հղիության ընթացքում

Հղիության թեստը դրական արդյունք է ցույց տվել և այդ հրաշալի նորությունը կիսել եք մտերիմ բարեկամների հետ: Բոլորը շնորհավորում են ձեզ՝ ենթադրելով, որ ինքներդ էլ երջանիկ եք: Այո, իհարկե ուրախ եք, որ երեխա եք ունենալու, բայց լիարժեք երջանկություն չեք զգում: Ավելին, երբեմն ձեզ անգամ դժբախտ եք զգում և արդյունքում ավելի հակվում դեպրեսիայի:

Դեպրեսիայի նշանները

Հղիությունը յուրաքանչյուր կնոջ կյանքի ամենաերջանիկ փուլերից մեկն է: Սակայն ոչ բոլորի համար և ոչ միշտ: Ապագա մայրերի առնվազն 10%-ը հղիության ընթացքում տառապում է դեպրեսիայից: Կարող էինք շրջանցել այս խնդիրը. չէ՞ որ մեզ մշտապես ասել են, որ հղիությունը կնոջ կյանքի հրաշալի շրջանն է:

Կարող էինք հայտնի չէ, թե որտեղից առաջ եկած թախիծը վերագրել տրամադրության հաճախակի փոփոխություններին, որոնք հատուկ են հղիությանը: Որոշ կանանց համար, սակայն, տխրությունն իսկապես լուրջ խնդիր է դառնում երեխային սրտի տակ կրելու շրջանում:

Դեպրեսիայի դրսևորումները տարբեր են, այդ պատճառով էլ դժվար է նշել բոլոր բնորոշ նախանշանները: Որոշ կանայք մշտապես վատ տրամադրություն ունեն, մյուսները դյուրագրգիռ են և հաճախ են լաց լինում կամ անպետքության զգացում են ունենում: Ոմանք անգամ ինքնասպանության մտքեր են ունենում: Դեպրեսիան ազդում է ինչպես հուզական և ֆիզիկական վիճակի վրա, այնպես էլ ապագա մոր պահվածքի վրա:

Ահա նոր սկսվող դեպրեսիայի մի քանի նախանշան.

  • կենտրոնանալու անկարողություն,
  • տագնապ, վախեր,
  • դյուրագրգռություն,
  • քնի խանգարումներ,
  • քրոնիկ հոգնածություն,
  • քաղցի մշտական զգացում կամ ախորժակի բացակայություն,
  • ոչինչ այլևս չի ուրախացնում և հաճույք չի պատճառում,
  • անընդհատ տխուր եք և միայնակության զգացում ունեք և այլն:

Ինչպե՞ս հաղթահարել դեպրեսիան

Հանգստացեք, թուլացեք: Մի տրվեք ամեն բան մինչև երեխայի ծնունդն անել-ավարտելու ցանկությանը: Ձեզ թվում է, թե պետք է կարգի բերեք և անհրաժեշտ պարագաներով զինեք մանական սենյակը, մաքրեք և դասավորեք ամբողջ բնակարանը կամ որքան հնարավոր է շատ աշխատեք և հասցնեք ամեն բան ավարտել նախքան արձակուրդ գնալը, սակայն այդպես չէ: Արվելիք գործերի ցուցակում առաջին տեղում պետք է լինի ձեր հոգեկան և ֆիզիկական առողջության մասին հոգ տանելը: Երեխայի ծնունդից հետո դուք բավարար ժամանակ չեք կարողանա հատկացնել ինքներդ ձեզ: Գիրք կարդացեք, նախաճաշեք անկողնում, ավելի շատ ժամանակ անցկացրեք ընկերների հետ: Ձեր նկատմամբ խնամքը երեխայի խնամքի ամենակարևոր մասն է:

Ֆիզիկական վարժություններ կատարեք: Հղիության ընթացքում բնականաբար պետք չէ մարզվել ամբողջ ուժով, սակայն փոքրիկ ֆիզիկական վարժությունները կբարձրացնեն տրամադրությունը և կօգնեն հաղթահարել ընկճվածությունը: Լողը, զբոսանքները և ապագա մայրերի խմբում դասերը հանձնարարելի են հղիության ընթացքում: Հղիության ընթացքում օգտակար վարժությունների մասին տեղեկություններ քաղեք, խորհրդակցեք հղիությունը վարող բժշկի հետ և փորձեք կատարել դրանք շաբաթական նվազագույնը երեք անգամ:

Ձեր խնդիրների մասին խոսեք մտերիմների և հոգեբանի հետ: Բաց և անկեղծ եղեք սիրած մարդու հետ: Նա կարող է աջակցել ձեզ, եթե նրա հետ անկեղծ լինեք: Եթե չունեք երկրորդ կես, ձեր վախերի և տագնապների մասին խոսեք մտերիմ ընկերների, բարեկամների: Դիմեք մասնագիտական, հոգեբանական խորհրդատվության, նրանք կօգնեն ավելի հեշտ հաղթահարել դեպրեսիան:

Դիմեք հոգեբանական մասնագիտական աջակցության: Եթե երկու շաբաթվա ընթացքում փորձել եք ամեն բան, սակայն չեք կարողացել հաղթահարել ընկճախտը, ապա հոգեբանին դիմելն անհրաժեշտություն է: Շատ դեպքերում հոգեբանական խորհրդատվությունը միակ ճիշտ տարբերակն է լինում, քանի որ դեպրեսիան պարզապես թույլ սթրես չէ կամ տրամադրության ժամանակավոր փոփոխություն, որից հնարավոր լինի ազատվել ինքնուրույն:

Հոգացեք ապագայի մասին

Հետազոտությունները վկայում են, որ նախածննդաբերական և հետծննդաբերական դեպրեսիան փոխկապակցված են, սակայն դա չի նշանակում, որ ընկճվածությունը, որից տառապում եք հղիության ընթացքում, ինքնաբերաբար շարունակվելու է նաև երեխայի ծնունդից հետո: Դեպրեսիան բուժելի է և այժմ հանուն երեխայի և հանուն ընտանեկան երջանկության նրանից ազատվելու ժամանակն է:

Հոգացեք ձեր ապագայի մասին հենց այսօր և աջակիցներով շրջապատեք ձեզ, նրանց մեջ կլինեն ձեր ընկերները, հարազատ մարդիկ, ձեր սիրելին, բժիշկը և հոգեբանը: Այդ դեպքում օգնություն կստանաք ճիշտ ժամանակին և կխուսափեք հետագայում սպառնացող խնդիրներից:

Բարձրացնում ենք իմունիտետը, որպեսզի պաշտպանվենք վարակներից

Բարձրացնում ենք իմունիտետը, որպեսզի պաշտպանվենք վարակներից

Սթրեսը, քրոնիկ հոգնածությունը, առողջարար սննդի ու առհասարակ օրգանիզմին անհրաժեշտ սննդանյութերի պակասը դառնում են իմունիտետի անկման հիմնական պատճառ․․․․

Հոմոցիստեին

Հոմոցիստեին

Հոմոցիստեինի փոխանակության գործում կարևոր դեր են խաղում В6, В12 վիտամինները և ֆոլաթթուն․․․

Հուզականությունը հղիության ընթացքում․ ի՞նչ անել

Հուզականությունը հղիության ընթացքում․ ի՞նչ անել

Հղիությունն իր ամբողջ էությամբ նոր փորձ է կնոջ համար, նոր փորձ իր հոգեբանական և ֆիզիկական դրսևորումներով։ Ընդ որում յուրաքանչյուր հղիություն տարբերվում է իր նախորդից և միշտ էլ կարող է անակնկալներ մատուցել․․․

Ինչպե՞ս զսպել վնասակար սնունդ ուտելու ցանկությունը

Ինչպե՞ս զսպել վնասակար սնունդ ուտելու ցանկությունը

Մարդիկ, ովքեր ցանկանում է հրաժարվել վատ սովորություններից և սկսել առողջ սնվել, գիտեն, որ ամենադժվարը սիրելի, բայց վնասակար ուտելիքների գայթակղությանը դիմանալն է․․․