Ենթադրվում է, որ նմանատիպ բորբոքումը կարող է պայմանավորված լինել հետևյալ գործոններով.

Ինչու  են առաջանում բշտիկները 

Ենթադրվում է, որ նմանատիպ բորբոքումը կարող է պայմանավորված լինել հետևյալ գործոններով. 

• Մեծ քանակությամբ թթու (ներառյալ մրգերն ու բանջարեղենը, ինչպիսիք են՝ ցիտրուսը և լոլիկը) կամ քաղցր սննդի ընդունում, 

• Կծվի հանդեպ սերը, շատ կծու ուտելիքին օրգանիզմը պատասխանում է նման տարօրինակ բորբոքային երևույթով, 

• Լեզուն կծելու սովորություն:  

Դա երբեմն հանգեցնում է միկրովնասվածքների, որոնք էլ դառնում են բորբոքման պատճառ, 

• Մարսողական համակարգի հետ կապված ցանկացած խնդիր, օրինակ լեզվի վրա բշտիկների առաջացումը կապված է փորկապության հետ: 

• Սննդային ալերգիա, 

Ինչ անել, եթե բշտիկներ են հայտնվել լեզվի վրա 

Մի՛ անհանգստացեք 

Չնայած այն հանգամանքին, որ ժամանակավոր բշտիկները բավարար չափով չեն ուսումնասիրվել, բժիշկները հավաստիացնում են, որ դրանք չեն վնասում առողջությանը: 

Շատ դեպքերում, լեզվի վրա առաջացած բշտիկները՝ նույնիսկ ամենացավոտները, 2-3 օրվա ընթացքում ինքնուրույն անցնում են: 

Այս գործընթացը արագացնելու համար կատարեք հետևյալը՝ 

• Որոշ ժամանակ հրաժարվեք թթու, քաղցր և կծու սննդից: Սա կարևոր է, որպեսզի չգրգռեք արդեն իսկ բորբոքված լեզուն: 

• Ավելի հաճախ խմեք սառը ջուր կամ ոչ քաղցր յոգուրտ։  

Ըմպելիքը ձեր բերանում պահեք՝ նախքան կուլ տալը․ սա կօգնի նվազեցնելու ցավը: 

Կարող եք բերանում պահել սառցե խորանարդներ. այն կնվազեցնի տհաճությունը: 

• Մաքրեք ձեր ատամները սննդի յուրաքանչյուր  ընդունումից հետո:  

Այսպիսով՝ դուք նվազեցնում եք մանրէների վերարտադրության ռիսկը, որը կարող է ուժեղացնել և տարածել բորբոքումը: 

• Օգտագործեք բերանի խոռոչի ողողման հեղուկ:  

Պատճառը նույնն է` մանրէների քանակը նվազեցնել բերանի խոռոչում: 

•  Բերանի խոռոչը օրը 2-3 անգամ ողողեք աղաջրով՝ 30-40 վայրկյան պահելով բերանում: Պատրաստման ձևը՝  ½ թեյի գդալ աղ ավելացրեք մեկ բաժակ տաք ջրին: Սա կնվազեցնի բորբոքումը: 

• Բերանի խոռոչի համար օգտագործեք ցավազրկողներ: Օրինակ՝ ցողիչ (спрей) կամ սառնաշաքար` ցավազրկող ազդեցությամբ: 

• Եթե կասկածում եք, որ պատճառը սննդային ալերգիան է, օգտագործեք  հակահիստամին դեղամիջոց՝ խստորեն հետևելով ցուցումներին: 

Երբ է անհրաժեշտ խորհրդակցել բժշկի հետ 

Լեզվի վրա առաջացած բշտիկները տհաճ են, բայց անվնաս: Այնուամենայնիվ, կան մի քանի նշաններ, որոնք վկայում են ավելի լուրջ հիվանդությունների մասին: 

Անպայման դիմեք բժշկի (թերապևտի կամ ատամնաբույժի), եթե՝ 

• Ցավոտ բշտիկները չեն անհետանում մեկ շաբաթվա ընթացքում կամ ավելի երկար ժամանակահատվածում՝ չնայած տնային խնամքին: 

• Լեզվի վրա բորբոքումները բավականին հաճախ են հայտնվում: Օրինակ՝ մի քանի շաբաթը մեկ։ 

• Նրանք այնքան ուժգին են ցավում, որ չեք կարողանում ուտել կամ խմել: 

• Բերանում զգում եք արյան համ, և բշտիկներն արյունահոսում են, երբ շոշափում եք: 

Բժիշկը կստուգի և անհրաժեշտության դեպքում կուղղորդի լրացուցիչ ստուգումների` ճշգրիտ ախտորոշման համար: 

Մի՛ փորձեք դիմանալ և հետաձգել այցը բժշկին: Վերը նկարագրված ախտանիշների դեպքում բշտիկները կարող են լինել շատ վատ հիվանդությունների նախանշան. օրինակ՝ մարդկային պապիլոմա վիրուս (HPV), սիֆիլիս և նույնիսկ բերանի խոռոչի քաղցկեղ:  

Հետևաբար, բժշկի հետ խորհրդակցությունը պարտադիր է: