Այլ նյութեր
Սեռական հարաբերությունից հետո արյունահոսություն․ ե՞րբ է դա պատճառ, իսկ ե՞րբ՝ ազդանշան
Սեռական հարաբերությունից հետո նկատված արյունային արտադրությունը շատ կանանց համար անհանգստացնող երևույթ է։ Երբեմն այն կարող է ունենալ բավականին պարզ և անվնաս պատճառ, սակայն որոշ դեպքերում արյունահոսությունը կարող է լինել գինեկոլոգիական խնդրի առաջին նշանը և պահանջել հետազոտություն։
Որո՞նք կարող են լինել պատճառները
Արյունահոսությունը կարող է առաջանալ հեշտոցի կամ արգանդի վզիկի լորձաթաղանթի փոքր վնասումից, հատկապես եթե սեռական հարաբերությունը եղել է ինտենսիվ, առկա է եղել չորություն կամ անբավարար խոնավացում։
Այլ հնարավոր պատճառներից են՝
- արգանդի պարանոցի բորբոքային փոփոխությունները,
- արգանդի պարանոցի էկտոպիան,
- սեռավարակները,
- հեշտոցի լորձաթաղանթի վնասվածքները,
- պոլիպները,
- հեշտոցի կամ արգանդի վզիկի այլ կառուցվածքային փոփոխությունները։
Հատկապես կարևոր է հիշել, որ արգանդի պարանոցից կրկնվող արյունահոսությունը պետք չէ ինքնուրույն վերագրել «էրոզիային» կամ պարզապես բորբոքմանը։ Պատճառը պետք է պարզել զննման միջոցով։
Ե՞րբ պետք է անպայման դիմել գինեկոլոգի
Եթե արյունահոսությունը կրկնվում է, առաջանում է նույնիսկ թեթև սեռական հարաբերությունից հետո, ուղեկցվում է ցավով, տհաճ հոտով կամ անսովոր արտադրությամբ, անհրաժեշտ է գինեկոլոգիական հետազոտություն։
Հատուկ ուշադրություն է պահանջում նաև այն դեպքը, երբ կինը երկար ժամանակ չի ունեցել նման խնդիր, և հանկարծ առաջացել է արյունահոսություն։
Կախված տարիքից, գանգատներից և զննման արդյունքներից՝ բժիշկը կարող է առաջարկել արգանդի վզիկի հետազոտություն, ՊԱՊ թեստ, HPV թեստ, սեռավարակների հետազոտություն, ուլտրաձայնային հետազոտություն կամ այլ անհրաժեշտ քննություններ։
Կարևոր է խուճապի չմատնվել, բայց նաև չանտեսել
Սեռական հարաբերությունից հետո արյունահոսությունը ինքնին չի նշանակում, որ առկա է լուրջ հիվանդություն։ Շատ դեպքերում պատճառը բուժելի և համեմատաբար պարզ է։
Սակայն կրկնվող կամ անհասկանալի արյունահոսությունը այն ախտանշաններից է, որը ճիշտ չէ երկար ժամանակ անտեսել։ Գինեկոլոգիական զննումը թույլ է տալիս պարզել իրական պատճառը և անհրաժեշտության դեպքում ժամանակին սկսել բուժումը։Ձեր օրգանիզմի ցանկացած նոր և կրկնվող փոփոխություն արժանի է ուշադրության, հատկապես եթե այն կապված է արյունահոսության հետ։
5
