Երեխայի ծնունդից որոշ ժամանակ անց ամուսինները վերադառնում են իրենց բնականոն սեռական կյանքին: Ոմանք զգալի փոփոխություններ են զգում, ոմանք էլ շարունակում են այնպես, ինչպես նախկինում: Սեռական հարաբերության ընթացքում հաճույքի գագաթնակետին հասնելու հնարավորության մասին կարծիքները տարբեր են: Արդյո՞ք ճիշտ է, որ ծննդաբերությունից հետո օրգազմն ավելի վառ է արտահայտվում, անգամ ի հայտ է գալիս առաջին անգամ կամ էլ ընդհանրապես բացակայում է:

Այո, պատահում է այդպես: Երբեմն լինում են դեպքեր, երբ սեռական կյանքում եղած անհարմարություններն ու թույլ օրգազմը սրվում են ծննդաբերությունից հետո: Լինում է նաև հակառակը. սեռական կյանքը զգալիորեն բարելավվում է ծննդաբերությունից հետո, որոշ դեպքերում օրգազմը ընդհանրապես առաջին անգամ է ի հայտ գալիս:

Այս հանգամանքը պայմանավորված է տարբեր գործոններով՝ և՛ արտաքին, և՛ ներքին բնույթի: Հաճախ պատճառը կնոջ օրգանիզմի հյուսվածքների զգայունության աստիճանի և հորմոնային համակարգի փոփոխություններն են դառնում, հեշտոցի մկանային տոնուսի նվազումը, ինչպես նաև մայրանալու հոգեբանական կողմն ու ամուսնու հետ հարաբերությունների բարելավումը և այլն: Պետք է ասել, որ սա պարտադիր պայման չէ և գիտականորեն էլ ապացուցված չէ: