Ինչո՞ւ են եղունգների վրա սպիտակ բծեր հայտնվում 

Բժիշկները եղունգների վրա առաջացող սպիտակ բծերն անվանում են լեյկոնիխիա։  Եղունգների վրա հաճախ առաջացող հստակ լուսավոր բծերը և շերտերը միայն կոսմետիկ թերություն են և առողջության համար վտանգավոր չեն, սակայն, եթե դա լեյկոնիխիա է, ուրեմն՝ ազդանշան է, որ դուք որևէ խնդիր ունեք  օրգանիզմում: 

Ինչ է լեյկոնիխիան 

Առողջ, չվնասված եղունգն ունի կիսաթափանցիկ կառուցվածք և սերտ տեղավորված է ճիշտ դիրքում: Դրա շնորհիվ թիթեղները  վարդագույն են, իսկ մաշկը՝ թափանցիկ։ Սակայն երբեմն օդային պղպջակ է հայտնվում մաշկի և եղունգի միջև, եղունգը հետ է գնում արյունոտ մաշկից, իսկ վարդագույն ֆոնի վրա հայտնվում է սպիտակ կետ: Այն ճշգրտորեն կրկնում է օդի պղպջակի ձևը. կարող է լինել փոքր, կլորացված կամ նմանվել երկարացված շերտի: Սա լեյկոնիխիան  է... Իսկ ինչպե՞ս են օդի պղպջակները հայտնվում եղունգի տակ: Պատասխանը որոշ չափով ավելի բարդ է: 

Ինչո՞ւ են հայտնվում եղունգների սպիտակ բծերը 

Միշտ չէ, որ հնարավոր է հաստատել եղունգի տակ օդի պղպջակների առաջացման պատճառը: Բայց կան իրավիճակներ, երբ պատճառները հաստատվել են։ 

Եղունգների վրա սպիտակ բծերի առաջացման պատճառները. 

1. Վնասվածքներ.           

Եղունգի հիմքի կամ ամբողջական եղունգի վնասում 

Շատ հաճախ վնասվածքի պատճառը հետևյալն է. 

• եղունգները կրծելու սովորություն  

• պատահական հարվածներ. օրինակ՝  ծանր իրով պատահաբար հարվածում ես եղունգիդ կամ անգիտակցաբար մատներով շատ ուժեղ ես թխկթխկացնում սեղանին, երբ նյարդայնանում ես 

• հաճախակի  եղունգի լաք  քսելը 

• սեղմող կոշիկներ. հանգեցնում է ոտքի մատների լեյկոնիխիայի 

2. Որոշակի դեղամիջոցների ընդունում կամ թունավորում 

Երբեմն լեյկոնիխիայի առաջացման  պատճառներից են՝  

• Սուլֆոնամիդների  ընդունումը: Սրանք սինթետիկ հակաբիոտիկ դեղեր են, որոնք օգտագործվում են մանրէային վարակների՝ մաշկի, միզուղիների, սեպսիսի բուժման ժամանակ: 

• Քիմիաթերապիա՝ քաղցկեղի բուժման նպատակով։ 

• Թունավորում ծանր մետաղներից, ինչպիսիք են՝ կապարը և մկնդեղը: 

3. Օրգանիզմի համակարգային խանգարումներ 

Այս կամ այն օրգանի աշխատանքի խանգարումները  կամ հիվանդությունները բավականին հազվադեպ ունենում են   եղունգների սպիտակ բծերով արտահայտված ախտանիշ:  

Գծավոր (լայնակի) լեյկոնիխիան կարող է  առաջանալ. 

• երկաթի պակասից՝ սակավարյունություն. երբ օրգանիզմը բավարար քանակությամբ երկաթ չի ստանում 

• ցինկի կամ կալցիումի պակասից 

• երիկամային հիվանդության դեպքում 

• սրտի անբավարարության դեպքում 

• լյարդի հիվանդությունների դեպքում (մասնավորապես՝ ցիռոզ) 

• հիպերթիրեոզի՝ գերակտիվ վահանաձև գեղձի դեպքում 

• աղեստամոքսային տրակտի՝ սպիտակուցների մարսման հետ կապված խնդիրների 

• մաշկի հիվանդությունների՝ պսորիազի կամ էկզեմայի դեպքում 

• եղունգների սնկային հիվանդության վաղ փուլում։ 

Ինչպես ազատվել եղունգների սպիտակ բծերից 

Շատ դեպքերում բավական է պարզապես սպասել. եղունգը նորից կաճի, և սպիտակ բիծն ինքնուրույն կանհետանա: Բայց եթե առկա է  լայնակի գծերով լեյկոնիխիա, և շերտերը պարբերաբար հայտնվում են  ոչ թե մեկ, այլ միանգամից մի քանի եղունգների վրա, ապա անհրաժեշտ է դիմել թերապևտին՝ պարզելու բծերի իրական պատճառը: Եթե պատճառը լինի օրգանիզմի աշխատանքի համակարգային խանգարումը, ապա անհրաժեշտ կլինի զբաղվել հիմնական հիվանդության բուժմամբ։ Իսկ եթե ընդունվող դեղորայքն է պատճառը, կարող եք փոխարինել այն մեկ ուրիշով։