Կիսաչհագեցած ճարպաթթուները հղիության ընթացքում (օմեգա-3 և օմեգա-6)
23985
Կիսաչհագեցած ճարպաթթուների (օմեգա-3 և օմեգա-6) կանխարգելիչ դերը հղիության բարդությունների առաջացման հարցում թերագնահատել անհնար է: Կիսաչհագեցած ճարպաթթուներն օրգանիզմում մի շարք կարևորագույն գործառույթներ են իրականացնում.
- մասնակցում են բջջապատի կազմավորմանը,
- բարելավում են նյութափոխանակությունը,
- լավացնում են անոթապատերի վիճակը,
- իջեցնում են արյան մեջ խոլեստերինի մակարդակը,
- բարելավում են արյան մակարդելիությունը՝ ի հաշիվ մածուցիկության նվազեցման և նպաստում են թրոմբոցիտների՝ հեմոստազն ապահովող արյան գնդիկների ագրեգացիային:
Այս հատկանիշները նպաստում են ընկերքում միկրոշրջանառության բարելավմանը, արյան բարձր մակարդելիության նվազմանը և, ըստ այդմ, հեստոզի զարգացման և ընկերքային անբավարարության, հիպոկսիայի և պտղի հիպոտրոֆիայի կանխարգելման արդյունավետ միջոցներ են:
Կիսաչհագեցած ճարպաթթուներ կան հիմնականում բուսական յուղերում և չեն սինթեզվում օրգանիզմում: Այդ պատճառով էլ անփոխարինելի են համարվում: Սննդի մեջ կիսաչհագեցած ճարպաթթուների լիակատար բացակայության դեպքում պտղի աճը կանգնում է, փոխվում է մանր անոթների թափանցելիությունը:
Կիսաչհագեցած ճարպաթթուների առավել արդյունավետ պատրաստուկներից են օմեգա-3-ը և օմեգա-6-ը: Օմեգա-3-ը բնական սննդային հավելում է, որը ձկան յուղի խտանյութից ստացված կիսաչհագեցած ճարպաթթուներ է պարունակում:
Ինչպիսի ազդեցություն է ունենում
Մտնում է ուղեղի գորշ նյութի բջիջների մեմբրանի և աչքի եղջերաթաղանթի կազմության մեջ: Ապահովում է ուղեղի բջիջների միջև նյարդերի փոխանցումները:
Թափանցում է ընկերքից այն կողմ և ապահովում է պտղի կենտրոնական նյարդային համակարգի լիարժեք զարգացումը:
Բարելավում է կալցիումի և մագնիումի յուրացումը՝ ապահովելով այդ հանքանյութերի տեղափոխումը բջջապատով:
Արյան մեջ նվազեցնում է խոլեստերինի և լիպիդների մակարդակը:
