Վիժման ամենաբարձր ռիսկը սովորաբար լինում է մինչև 14-րդ շաբաթական ժամկետը, սակայն երբեմն պատահում է նաև ուշ ժամկետներում։ Այն դժվար փորձություն կարող է լինել ամուսինների համար, որին կարող է հաջորդել կրկին հղիանալու բուռն ցանկությունը։

Վիժման պատճառները տարբեր են լինում՝

• հորմոնային համակարգի խնդիրներ,
• թունավոր նյութերի ազդեցություն,
• գենետիկ անոմալիաներ,
• թրոմբոֆիլիա,
• ծանր ապրումներ և սթրեսներ,
• նախկինում կատարած աբորտներ,
• մեխանիկական վնասվածքներ և այլն։

Վիժման մասին մանրամասներ նկարագրված են ստորև նշված հոդվածում։

Կարդացեք՝ Ինքնաբեր վիժում

Հաճախ է պատահում, որ կանայք, որոնց դեպքում վիժումը եղել է հղիության վաղ ժամկետում, ցանկանում են հղինալ վիժումից անմիջապես հետո։ Տեսականորեն հնարավոր է, բայց պետք է սպասել։

Ինչո՞ւ։ Որովհետև վիժումը սթրես է ոչ միայն հոգեկանի, այլև վերրտադրողական համակարգի համար։ Երբ մարդ ոտքը ոլորում է, որոշ ժամանակ զգուշորեն է քայլում, չէ՞, չի վազում, ֆիզիկական վարժություններ չի անում, այնպիսի ռիսկերի չի դիմում, որոնք կարող են վատացնել վիճակը։ Նույն սկզբունքը գործում է նաև այս դեպքում․ անհաջող հղիության փորձությունն անցնելով՝ վերարտադրողական համակարգը վերականգնվելու համար որոշակի ժամանակ է պահանջում։

Որքա՞ն է պետք սպասել։ Սովորաբար թույլատրվում է կրկին հղիանալ 3-6 ամիս անց, լավագույն դեպքում՝ 6 ամիս անց։ պետք է նկատի ունենալ մի միտում․վիժումից հետո որքան շուտ է լինում հղիությունը, այնքան մեծ է լինում կրկին վիժելու վտանգը։

Ինչպե՞ս վարվել մինչև հաջորդ հղիությունը

Առողջ հղիություն ապահովելու համար կարգավորեք քնի և հանգստի ռեժիմը, սննդակարգը, փորձեք զերծ մնալ սթրեսներից, լիարժեք հետազոտվեք։