Մարմնի բարձր կամ ցածր ջերմաստիճանը հղիության ընթացքում

Մարմնի բարձր կամ ցածր ջերմաստիճանը հղիության ընթացքում

Ինչպես արդեն գիտենք, հղիությունն ամբողջապես փոխում է կնոջ օրգանիզմի գործունեությունը: Առաջին ամիսներից տեղի են ունեմ կարևորագույն գործընթացներ՝ ապագա փոքրիկի բոլոր օրգանների ձևավորումը, և նրա առողջության հիմքը հենց այս ժամանակներից է դրվում: Հղիության ինն ամիսների ընթացքում կինը պետք է հատկապես ուշադիր լինի իր առողջական վիճակին:

Հղիության առաջին շաբաթներին հնարավոր է մարմնի ջերմաստիճանը բարձրանա կամ նվազի: Սովորաբար, ջերմաստիճանի բարձրացումն ավելի հաճախ է հանդիպում, և այն ոչ միշտ է առընչություն ունենում որոշակի հիվանդության հետ: Ցանկացած դեպքում կինը պետք է իմանա, թե որոնք են հղիության ընթացքում ջերմաստիճանի բարձրացման պատճառները:

Որքան էլ տարօրինակ թվա՝ հղիությունն իրենով պատճառ է դառնում, որպեսզի մարմնի ջերմաստիճանը թեթևակի բարձրանա: Դա բացատրվում է նրանով, որ օրգանիզմի կողմից հղիությունն ընդունվում է որպես նոր և անծանոթ վիճակ: Հղիության վաղ ժամկետներում կնոջ հորմոնային համակարգն ամբողջությամբ փոխվում է, սկսվում է մեծ քանակությամբ պրոգեստերոն հորմոն արտադրվել, ինչը հենց առաջացնում է ջերմաստիճանի բարձրացում:

Հղիության սկզբում բնական է իմունիտետի նվազումը, ինչը տեղի է ունենում, որպեսզի կնոջ օրգանիզմի կողմից պտուղը՝ որպես օտար մարմին չմերժվի: Իսկ իմունիտետի ցանկացած փոփոխության դեպքում դիտվում է մարմնի ջերմաստիճանի բարձրացում: Այն սովորաբար չի գերազանցում 37 աստիճանը, ինչն ըստ բժշկական ցուցանիշների համարվում է բնական: Այս վիճակը ոչ մի կերպ չի ազդում պտղի ներարգանդային զարգացման վրա, և այն չպետք է անհանգստացնի ապագա մայրիկին, եթե իհարկե չի ուղեկցվում այլ գանգատներով: Շատ հնարավոր է՝ ջերմաստիճանի բարձրացման պատճառը պարզապես ամառային շոգ եղանակը լինի կամ տաք հագուստը:

Իսկ ահա 38 աստիճանից բարձր ջերմությունն ամենայն հավանականությամբ խոսում է կնոջ օրգանիզմում որևէ հիվանդության զարգացման մասին: Մրսածությունը, վիրուսային կամ այլ հիվանդությունները հաճախ են հանդիպում հղիության ինչպես սկզբում, այնպես էլ ողջ ընթաքում: Դրանք վտանգավոր են և պարտադիր պետք է այցելել բժշկի: Նա կնշանակի համապատասխան բուժական թերապիա: Հնարավոր է նույնիսկ պահանջվի հոսպիտալացում, ինչից հրաժարվել պետք չէ, քանի որ հնարավոր է այն օգնի պահպանել հղիությունը:

Ցանկացած դեպքում, կինը պետք է իր գինեկոլոգին տեղեկացնի մարմնի ջերմաստիճանի փոփոխությունների մասին: Իսկ դեղորայքի ընդունումից վախենալ պետք չէ, քանի որ գրագետ ընտրված բուժումը երեխային չի վնասի, ինչը չի կարելի ասել բարձր ջերմության հետևանքների մասին:

Բարձր ջերմության հնարավոր հետևանքները

Բարձր ջերմությունը նախ և առաջ խոսում է օրգանիզմի ինքնաթունավորման մասին, ինչը հնարավոր է բացասական հետևանք ունենա սրտանոթային համակարգի աշխատանքի վրա:

Երկարատև բարձր ջերմության դեպքում առաջանում է սպիտակուցի սինթեզի փոփոխություն: Այն բացասական ազդեցություն է ունենում նաև ընկերքի վրա և հանգեցնում է վիժման: Բացի այդ, երկարատև ջերմության դեպքում խանգարվում է պտղի բոլոր օրգան-համակարգերի ճիշտ զարգացումը, իսկ դա գուցե ազդեցություն ունենա երեխայի նյարդային համակարգի և մտավոր կարողությունների վրա: Այնպես որ, հղիության ընթացքում բարձր ջերմությունը չպետք է թողնել առանց ուշադրության:

Ին՞չ մեթոդներով նվազեցնել բարձր ջերմությունը

Կարելի է կիրառել դեղորայքային և ոչ դեղորայքային մեթոդներ: Սովորաբար, խորհուրդ է տրվում ջերմությունը նվազեցնել աստիճանաբար և ցանկալի է՝ ավանդական փորձված միջոցներով: Նախ և առաջ կինը պետք է շատ հեղուկ օգտագործի, բայց պետք չէ չարաշահել, որպեսզի վերջույթների այտուց չառաջանա: Չնայած վերջինս հազվադեպ է հանդիպում հղիության առաջին եռամսյակում՝ այնուամենայնիվ պետք է զգույշ լինել:

Կարդացեք՝ Ինչպես վարժվել ավելի շատ ջուր խմելուն

Հղի կնոջ համար ըմպելիքի շատ տարբերակներ չկան, հիմնականում կիտրոնով թեյ (կարելի է շաքարավազ ավելացնել), լորենու կամ երիցուկի ոչ թունդ եփուկ, տարբեր մրգահյութեր, եռացրած ջրի մեջ ավելացրած ազնվամորու մուրաբա, մեղրով կամ կակաոյի յուղով կաթ: Անհրաժեշտ է ուշադիր լինել, որպեսզի բոլոր ըմպելիքները լինեն ոչ շատ տաք:

Տարատեսակ խոտաբույսերով թուրմերն անհրաժեշտ է զգուշությամբ կիրառել, քանի որ ոչ բոլորն են թույլատրելի հղիության ընթացքում: Օգտակար կլինեն նաև սառը թրջոցները ճակատին: Եթե ավանդական միջոցներով չի հաջողվում ջերմությունը նվազեցնել, անհրաժեշտ է դիմել դեղորայքայինի: Սա պետք է անել ոչ թե ընկերների կամ ծանոթների խուրհրդով, այլ բացառապես բժշկի նշանակմամբ:

Սովորաբար, հղիության վաղ ժամկետներում բժիշկները ասպիրին չեն նշանակում, քանի որ այն հնարավոր է հղիության ընդհատման պատճառ դառնա կամ հանգեցնի պտղաձվի զարգացման զանազան արատների: Պարացետամոլի հիմքով դեղորայքը սովորաբար նշանակվում է մեկ անգամյա ընդունմամբ, որպեսզի երիկամների և լյարդի գործունեությունը չխանգարվի:

Հղիության պատասխանատու 40 շաբաթների ընթացքում լավ կլինի կիրառել կանխարգելիչ միջոցներ և թույլ չտալ ջերմության բարձրացում:

Ինչպե՞ս կանխարգելել ջերմության բարձրացումը

Նախ և առաջ հղի կինը պետք է խուսափի մարդաշատ վայրերից, հատկապես տարատեսակ սեզոնային վիրուսների տարածման շրջանում: Անհրաժեշտ է ամեն օր լավ օդափոխել բնակարանի բոլոր սենյակները: Նաև պետք չէ մոռանալ անձնական հիգիենայի կանոններին հետևելու մասին. տուն վերադառնալուց պարտադիր լվանալ ձեռքերն օճառով, մաքրել քիթը ջրով և ողողել բերանը: Ինչպես նաև կարևոր է ճիշտ սննդակարգն ու անհրաժեշտ վիտամինների ընդունումը:

Վերոնշյալ խորհուրդներին հետևելով դուք կնվազեցնեք ջերմության բարձրացման վտանգը:

Ի՞նչ է նշանակում ջերմության նվազումը

Հղիության ընթացքում կարող են դիտվել ինչպես ջերմության բարձրացումներ, այնպես էլ նվազումներ: Երբեմն, նվազումը տվյալ օրգանիզմի առանձնահատկության հետևանքն է: Նման վիճակը ոչ մի կերպ չի փոխազդում պտղի զարգացմանը:

Հնարավոր է, որ ջերմության բնական ցուցանիշներից նվազումը կապված լինի տոքսիկոզի և գերհոգնածության հետ, ինչպես նաև այն կարող է մատնանշել հորմոնային համակարգի խանգարումներ, ինչը հանգեցնում է մի շարք անցանկալի հիվանդությունների: Երկարատև ցածր ջերմությունը առաջացնում է թուլություն, գլխապտույտ և նույնիսկ ուշագնացություն, այդ պատճառով պարտադիր է նման դեպքում դիմել բժշկի:

Ընդհանուր առմամբ, ջերմության տատանումներից խուսափելու համար անհրաժեշտ է հետևել առողջական վիճակին ինչպես հղիության սկզբում, այնպես էլ ողջ ընթացքում: Օրգանիզմում կատարվող փոփոխությունները նկատելու համար անհրաժեշտ է յուրաքանչյուր օր չափել մարմնի ջերմաստիճանը, իսկ շեղումներ հայտնաբերելու դեպքում՝ առանց վարանելու դիմել բժշկի:

Նորածինների մոտ առկա որոշակի տարօրինակություններ, որոնք առաջին հայացքից կարող են վախեցնել անփորձ ծնողներին

Նորածինների մոտ առկա որոշակի տարօրինակություններ, որոնք առաջին հայացքից կարող են վախեցնել անփորձ ծնողներին

Ծնվելուց հետո առաջին չորս շաբաթվա ընթացքում երեխայի օրգանիզմը ներարգանդային կյանքից անցում է կատարում դեպի հետծննդյան շրջան

Ինչպե՞ս հեռացնել սպիները էպիզիոտոմիայից  (շեքահատում) և ծննդաբերական այլ վնսվածքներից հետո

Ինչպե՞ս հեռացնել սպիները էպիզիոտոմիայից (շեքահատում) և ծննդաբերական այլ վնսվածքներից հետո

Հետծննդաբերական նույնիսկ փոքր սպին կարող է վատթարացնել սեռական կյանքի որակը

Ի՞նչ է հարկավոր վերցնել Ձեզ հետ ծննդատուն գնալիս

Ի՞նչ է հարկավոր վերցնել Ձեզ հետ ծննդատուն գնալիս

Առանձին թղթապանակում հարկավոր է հավաքել բոլոր անհրաժեշտ փաստաթղթերը և դրանց կրկնօրինակները

Ճիշտ շնչառությունը ծննդաբերության ընթացքում

Ճիշտ շնչառությունը ծննդաբերության ընթացքում

Ծննդաբերության ընթացքում ճիշտ շնչառությունը հեշտացնում է կծկանքների ընթացքը և բարելավում է մայրիկի և երեխայի ինքնազգացողությունը: