Պրոգեստերոնը ստերոիդային հորմոն է: Սինթեզվում է հատիկաձև բջիջների և դեղին մարմնի, ընկերքի և մակերիկամների կեղևի կողմից լյուտեինիզացնող հորմոնի ազդեցությամբ, իսկ հղիության դեպքում՝ մարդու խորիոնային գոնադոտրոպինի կողմից։ Արյան մեջ առկա է ինչպես ազատ, այնպես էլ սպիտակուցների հետ կապված վիճակում։

Պրոգեստերոնը էնդոմետրիումում փոփոխություններ է առաջացնում՝ այն նախապատրաստելով սաղմի ամրացմանը, նպաստում է հղիության պահպանմանը՝ ճնշելով արգանդի հարթ մկանունքի ակտիվությունը և ձվարաններում ֆոլիկուլների զարգացումը, խթանում է կաթնագեղձերի զարգացումը, նվազեցնում է միոմետրիումի հարթմկանային բջիջների գրգռվողականության շեմը, պահպանում է արգանդի պարանոցի տոնուսը։

Կարդացեք՝ Պրոգեստերոն․ մայրական բնազդի հորմոն

Պրոգեստերոնի մակարդակի որոշման ցուցումները՝

• ձվազատման հաստատում, 
• դեղին մարմնի աշխատանքի վերահսկում, 
• անպտղության, դաշտանային ցիկլի խանգարման, արգանդային դիսֆունկցիոնալ արնահոսության տարբերակիչ (դիֆերենցիալ) ախտորոշում և ընթացիկ բուժման վերահսկում։

Արյան մեջ պրոգեստերոնի բնական քանակը՝

• ֆոլիկուլային փուլում՝ 0,1-6,4 նմոլ/լ (0,03-2,0 նգ/մլ), 
• լյուտեինային փուլում՝ 10-40 նմոլ/լ (3,1-12,4 նգ/մլ): 

Պետք է հաշվի առնել, որ նշված ցուցանիշները կարող են տատանվել՝ կախված լաբորատորիայից։ Հարկավոր է առաջնորդվել տվյալ լաբորատորիայի սահմանած ցուցանիշներով։

Պրոգեստերոնի սեկրեցիան սկսում է աճել նախաօվուլյատոր շրջանում՝ առավելագույնին հասնելով լյուտեինային փուլի մեջտեղում (մինչև 44,0-55,5 նմոլ/լ):

Հետազոտության համար անհրաժեշտ շիճուկի քանակը՝ 0,1 մլ, հետազոտության տևողությունը՝ 3-4 ժամ։