Կնոջ օրգանիզմում արտադրվող էստրոգեն հորմոնը պատասխանատու է մի շարք կարևոր գործառույթների համար, որոնցից գլխավորը երեխա լույս աշխարհ բերելն է։ Այս հորմոնի հավասարակշռությունը կարևոր նշանակություն ունի կնոջ առողջության համար։

Էստրոգենը պատասխանատու է ոչ միայն մայրանալու, այլև կնոջ վարքաբանական առանձնահատկությունների համար, որ ժողովուրդը հաճախ անվանում է աղջկական։

Էստրոգենի պակասը հանգեցնում է անպտղության

Էստրոգենի պակասը կարող է մազաթափության, օստեոպորոզի, անպտղության, ինչպես նաև քաղցկեղի պատճառ դառնալ։ Անհրաժեշտ է մշտապես հավասարակշիռ վիճակում պահել այս հորմոնը՝ խուսափելով ճարպոտ և քաղցր սննդից, ինչպես նաև հետևելով առողջ սննդակարգի կանոններին։

Էստրոգենն արտադրվում է ձվարաններում և ճարպային բջիջներում։ Կնոջ օրգանիզմը ճարպային բջիջներն օգտագործում է արական հորմոններից էստրոգեն ստանալու համար։ Շատ կարևոր է առողջ քաշի պահպանումը, քանի որ գեր կանանց օրգանիզմն ավելորդ քանակությամբ էստրոգեն է արտադրում, իսկ նվազ քաշով կանանցը՝ քիչ քանակությամբ։

Այս հորմոնի անբավարարությունը կամ ավելցուկը կարող է հանգեցնել անպտղության։ Առողջ քաշի պահպանման և էստրոգենի ավելորդ քանակությունից խուսափելու համար հրաժարվեք ճարպերով հարուստ սննդից, օգտագործեք օգտակար, չհագեցած ճարպեր՝ ձուկ և ձիթապտղի յուղ, մեծացրեք մրգերի և բանջարեղենի քանակը։

Կարդացեք՝  Ինչպե՞ս լրացնել էստրոգենների քանակը սննդի միջոցով

Ինչպե՞ս է էստրոգենն ազդում մազերի և ոսկորների վրա

Մի շարք հետազոտություններ վկայում են, որ մազաթափություն են ունենում այն կանայք, ում օրգանիզմում էստրոգենը և անդրոգենը չեն հավասարակշռում։ Շատերը մազաթափություն են ունենում հղիությունից հետո։

Էստրոգենների հավասարակշռությունը նպաստում է նաև առողջ ոսկրային հյուսվածքի ձևավորմանը։ Երբ կնոջ օրգանիզմում սկսվում է դաշտանադադարը, էստրոգենի քանակը նվազում է։ Դրա պակասը կարող է հանգեցնել օստեոպորոզի՝ ոսկրային հյուսվածքի քայքայման։ Ոսկորները թուլանում են, մեծանում է կոտրվածքների և դրանց հետևանքով առաջացած բարդությունների վտանգը։

Կարդացեք՝  Օստեոպորոզը և կլիմաքսը

Օստեոպորոզի կանխարգելման և բուժման մեթոդներից մեկը փոխարինող հորմոնային թերապիան է, որով բժիշկները դեղորայքի միջոցով վերահսկում են էստրոգենի մակարդակը՝ հավասարակշռելով հորմոնների մակարդակը։