Արգանդի թափածակում (պերֆորացիա)

Արգանդի թափածակում (պերֆորացիա)

Արգանդի թափածակումը յատրոգեն հիվանդություն է: Դա վիրահատկան միջամտության ժամանակ (օրինակ`աբորտ) արգանդի պատի ծակումն է:

Ներարգանդային միջամտությունների հետևանքով արգանդի թափածակում ախտորոշվում է հիվանդների 1 տոկոսի դեպքում, 0,7%- ի դեպքում դա արհեստական աբորտի, ախտորոշիչ քերում կատարելու, հիստերասկոպիայի արդյունք է, իսկ 0,3% –ի դեպքում՝ ներարգանդային հակաբեղմնավորիչի տեղադրման արդյունք:

Կանխարգելում

Սա ներառում է ներարգանդային միջամտությունների ընթացքում տեխնիկայի կանոնների խիստ պահպանում:

Դասակարգում

Արգանդի թափածակումը կարող է լինել՝

  • ամբողջական (վնասվում է արգանդի պատն ամբողջապես),
  • չբարդացած (առանց փոքր կոնքի և որովայնի խոռոչի օրգանների վնասման),
  • բարդացած (աղիների, միզապարկի, արգանդի հավելումների և այլ օրգանների վնասվածքներով),
  • ոչ ամբողջական (այս պարագայում արգանդի արտաքին լորձաթաղանթն անվնաս է մնում):

Պատճառագիտություն

Արգանդի թափածակման պատճառը ներարգանդային վիրահատությունների տեխնիկայի խախտումն է: Դրա զարգացման վտանգի գործոններ կարող են համարվել արգանդի սուր և քրոնիկական բորբոքումները, միջամտություններից հետո արգանդի վրա առաջացած սպին, արգանդի հաճախակի կամ ոչ այնքան վաղ շրջանում կատարված վիրահատությունը՝ ներառյալ վիրահատական աբորտները և ախտորոշիչ քերումը:

Ախտածագում

Ամենավտանգավորն աբորտցանգով և կյուրետկայով թափածակումն է, քանի որ դրանք ունեն սուր ծայրեր և կարող են նույնիսկ ներքին օրգանները վնասել: Արգանդը լայնացնող գործիքը (հեգարը) ունի կլորավուն ծայր, այդ պատճառով դրա վնաս հասցնելու հավանականությունը քիչ է:

Կլինիկական պատկերը

Հիվանդները սովորաբար գանգատվում են որովայնի ստորին հատվածի կտրուկ ցավից, սեռական ուղիներից եկող արյունային արտադրությունից, ջերմաստիճանի բարձրացումից (սովորաբար մինչև 37,5 °С), թուլությունից և գլխապտույտից: Ուժգին արյունահոսության դեպքում կարող է դիտվել զարկերակային ճնշման նվազում, տախիկարդիա, մաշկի գունատություն: Եթե թափածակված հատվածը ծածկված է փոքր կոնքի կամ որովայնի որևէ հարևան օրգանով՝ օրինակ ընդերացանցով (сальник), կլինիկական պատկերը դառնում է չարտահայտված ախտանշաններով:

Ախտորոշումը

Քանի որ ներարգանդային մանիպուլյացիաները հիմնականում կատարվում են անզգայացման ներքո, և հիվանդները չեն գանգատվում, ապա արգանդի թափածակման դեպքում մտածելու տեղիք կա, երբ միջամտության ընթացքում հանկարծ վիրահատական գործիքն առանց արգանդի պատին հանդիպելու ներթափանցում է խորք: Վիրահատության ընթացքում բժշկի ուշադիր վերաբերմունքը բոլոր մանիպուլյացիաների հանդեպ թույլ կտա գրեթե ամբողջությամբ բացառել արգանդի պատի թափածակումը չնկատելու վտանգը:

Կլինիկական տվյալների անամնեզից ելնելով՝ (արհեստական աբորտ, ներարգանդային հակաբեղմնավորիչի տեղադրում) հեշտությամբ բացահայտվում է արգանդի թափածակումը: Կասկածելու դեպքում կատարվում է հիվանդի ընդհանուր վիճակի գնահատում՝ հաշվի է առնվում մաշկի և տեսանելի լորձաթաղանթների գույնը, ստուգվում է պուլսը, զարկերակային ճնշումը, կատարվում է որովայնի զննում, պալպացիա: Սովորաբար նկատվում է մաշկի և տեսանելի լորձաթաղանթների գունատություն, սառը քրտինք, տախիկարդիա, զարկերակային ճնշումը կարող է լինել նորմալ կամ ցածր: Որովայնի ստորին հատվածներում նկատվում է լարվածություն, կարող է դիտվել ցավ, որովայնի գրգռվածության ախտանշաններ: Լրացուցիչ կատարվում է փոքր կոնքի օրգանների տրանսվագինալ ՈւՁՀ, որի ընթացքում որոշվում է փոքր կոնքում ազատ հեղուկի առկայությունը:

Եթե կասկածվում է որովայնի խոռոչի օրգանների վնասում, անհրաժեշտ է խորհրդակցել վիրաբույժի հետ:

Բուժումը

Բուժման նպատակը արգանդում թափածակված հատվածի վերացումն է:

Հոսպիտալացման ցուցումները

Արգանդի թափածակում կասկածելու դեպքում ցուցվում է անհապաղ հոսպիտալացում գինեկոլոգիական բաժանմունք: Մինչհոսպիտալացման փուլում անհրաժեշտ է կատարել որովայնի ստորին հատվածի սառեցում, ինֆուզիոն թերապիա և այլ լուծումներ՝ կախված հիվանդի ընդհանուր վիճակից:

Բուժման մեթոդները

Բուժման հիմնական մեթոդը վիրահատական միջամտությունն է: Դեղորայքային բուժում չի կիրառվում: Թե արգանդի թափածակումը ախտորոշելու և թե այն բուժելու համար կատարվում է լապարասկոպիա, որի ընթացքում վիրաբույժը կատարում է փոքր կոնքի և որովայնի խոռոչի օրգանների վերստուգում, որպեսզի գնահատի դրանց վիճակը:

Վիրահատությունը սովորաբար չի լինում մեծածավալ, կարում են վերքի ծայրերը և լվանում որովայնի խոռոչը: Հետվիրահատական շրջանում բոլոր հիվանդներին ցուցվում է կանխարգելիչ հակաբակտերիալ թերապիա:

Արգանդային զոնդով թափածակման դեպքում, ինչպես նաև ներքին արյունահոսության կլինիկական և ուլտրաձայնային նշանների բացակայության պարագայում հնարավոր է սպասողական տակտիկա վարել՝ արգանդը կրճատող միջոցների նշանակում, դինամիկ հսկողություն, ուլտրաձայնային վերահսկում:

Աբորտի ժամանակ աբորտցանգով և կյուրետով արգանդի մեծ չափի լայնացում կատարելիս առաջացած թափածակման դեպքում ցուցվում է վիրաբուժական միջամտություն (լապարասկոպիկ կամ լապարատոմիկ միջամտություն):

Որովայնի խոռոչի օրգանների վնասման դեպքում ցուցվում է վիրաբույժի կամ ուրոլոգի խորհրդատվություն՝ կախված վնասվածքի տեղակայումից:

Չբարդացած ամբողջական թափածակման դեպքում աշխատունակությունը վերականգնվում է 7 օր անց:

Հետագա ցուցումներ

Այն կանայք, ովքեր թափածակումից հետո արգանդի վրա սպի են ունեցել, հետագայում հղիանալուց պետք է գտնվեն հատուկ հսկողության տակ: Հնարավոր է ներարգանդային միջամտությունը բարդացնի արգանդի թափածակումը: Դրանից խուսափելու համար անհրաժեշտ է անցնել համապատասխան նախապատրաստում, հատկապես վտանգի գոտում հայտնված կանանց դեպքում: Իսկ այդ խմբում են համարվում կանայք, ովքեր գտնվում են հետկլիմաքսային շրջանում, և նրանք, ովքեր անամնեզում ունեն՝

  • սուր և քրոնիկական էնդոմետրիտ,
  • մեծաքանակ ներարգանդային վիրահատություններ (ախտորոշիչ քերում, բժշկական աբորտներ),
  • վիրահատությունից հետո արգանդի սպի (կեսարյան հատում, պահպանողական միոմեկտոմիա),
  • նվազագույնը 6 ամիս առաջ կատարված ներարգանդային վիրահատական միջամտություն:

Վիրահատության նախապատրաստման տևողությունն ու ծավալը որոշում է բժիշկը:

Կանխատեսումներ

Ժամանակին կատարված ախտորոշման և համապատասխան բժշկական օգնության դեպքում կյանքի և առողջության կանխատեսումները բարենպաստ են:

Երիտասարդության գաղտնիքը հորմոնների ներդաշնակությունն է

Երիտասարդության գաղտնիքը հորմոնների ներդաշնակությունն է

Երբ հորմոնալ համակարգի հետ կապված խնդիրներ են առաջանում, չափազանց դժվար է դառնում վերլուծել և վերահսկել սեփական զգացմունքներն ու հույզերը

Ինչպե՞ս կարող է հոդատապն (պոդագրա) ազդել ձեր կյանքի որակի վրա, և ինչպե՞ս խուսափել դրանից

Ինչպե՞ս կարող է հոդատապն (պոդագրա) ազդել ձեր կյանքի որակի վրա, և ինչպե՞ս խուսափել դրանից

Հոդատապը հիվանդություն է, որը զարգանում է պուրինի նյութափոխանակության խանգարման հետևանքով, ինչի արդյունքում հիմնականում հոդերում առաջանում են միզաթթվի բյուրեղներ

Ինչպե՞ս սովորել կենտրոնանալ սեքսի վրա

Ինչպե՞ս սովորել կենտրոնանալ սեքսի վրա

Ժամանակակից աշխարհում կան չափազանց շեղող գործոններ՝ երկար ժամանակ ինչ-որ բանի վրա կենտրոնանալու համար, այդ թվում նաև սեքսի

Ինտիմ հատվածի բիոռեվիտալիզացիա

Ինտիմ հատվածի բիոռեվիտալիզացիա

Ժամանակի ընթացքում մարմնի հյուսվածքները ենթարկվում են տարիքային փոփոխությունների՝ նվազում է առաձգականությունը, առաջանում է մաշկի և լորձաթաղանթների չորություն: