Երեխայի սեռը. աղջի՞կ, թե՞ տղա
160602
Իմանալով, որ հղի է՝ առաջին բանը, որի մասին սկսում է մտածել կինը, երեխայի սեռն է: Նա շարունակ փորձում է գուշակել աղջի՞կ լույս աշխարհ կգա, թե՞ տղա: Երեխայի սեռի վերաբերյալ կասկածներն ու տարաբնույթ ենթադրությունները հանգիստ չեն տալիս ապագա մայրիկին ամբողջ ինն ամիսների ընթացքում, չնայած որ արդի ժամանակներում երեխայի սեռի որոշումն այլևս խնդիր չէ:
Երեխայի սեռի որոշումն այսօր միանգամայն ընդունված և իրագործելի երևույթ է: Սեռը հնարավոր է պարզել՝ 12-15 շաբաթական հղիության շրջանում անցնելով ուլտրաձայնայնային հետազոտություն: Հենց այս շրջանում են պարզորոշ երևում երեխայի սեռային պատկանելությունը փաստող օրգանները: Լինում են սակայն դեպքեր, երբ բժիշկը դժվարանում է հստակ պատասխան տալ, այդ պատճառով էլ ավելի ճիշտ պատասխան հնարավոր կլինի ստանալ ՈւՁՀ-ի հաջորդող այցերի ընթացքում:
Երբեմն պատահում է նաև այնպես, որ կինը, գտնվելով ծննդարանում, դեռևս չգիտի, թե ինչ սեռի երեխա է լույս աշխարհ գալու: Պատճառները մի քանիսն են՝
- Նա կանխամտածված չի ցանկացել իմանալ երեխայի սեռը՝ դրանով անակնկալ մատուցելով և՛ իրեն, և՛ ընտանիքի անդամներին:
- ՈւՁՀ-ի ընթացքում երեխան մշտապես այնպիսի դիրքում է եղել, որ հնարավոր չի եղել պարզել սեռը:
- Ապագա մայրիկը այս կամ այն պատճառներով չի կարողացել օգտվել երեխաի սեռի որոշման հնարավորություններից:
Արդյո՞ք երեխայի սեռը որոշելու համար կիրառվող ժամանակակից մեթոդիկաներն անսխալ են: Անխոս սխալմունքներ ևս լինում են, սակայն հազվադեպ: Ընդհանուր առմամբ այսօր երեխայի սեռը պարզելը դյուրին է և հուսալի:
