Արգանդի պարանոցի պոլիպը գինեկոլոգիական այն խնդիրներից է, որը հաճախ հայտնաբերվում է պատահաբար՝ սովորական գինեկոլոգիական զննման ժամանակ։ Շատ դեպքերում այն բարորակ գոյացություն է և որևէ գանգատ չի առաջացնում։ Սակայն երբեմն պոլիպը կարող է դառնալ միջդաշտանային արյունահոսության, սեռական հարաբերությունից հետո արյունային արտադրության կամ անսովոր արտադրության պատճառ։

Հատկապես կարևոր է հասկանալ՝ արդյո՞ք արգանդի պարանոցի պոլիպը կարող է խանգարել հղիանալուն, ինչպե՞ս է որոշվում դրա հեռացման անհրաժեշտությունը, և արդյո՞ք յուրաքանչյուր հայտնաբերված պոլիպ պահանջում է վիրահատական միջամտություն։

Ի՞նչ է արգանդի պարանոցի պոլիպը և ինչո՞ւ է առաջանում

Արգանդի պարանոցի պոլիպը լորձաթաղանթից առաջացող փոքր գոյացություն է, որը սովորաբար տեղակայվում է արգանդի պարանոցի խողովակում կամ նրա արտաքին բացվածքի շրջանում։ Այն կարող է լինել տարբեր չափերի՝ մի քանի միլիմետրից մինչև մի քանի սանտիմետր։

Պոլիպների առաջացման հստակ պատճառը միշտ չէ, որ հնարավոր է որոշել։ Դրանց զարգացման հետ կարող են կապված լինել տեղային բորբոքային փոփոխությունները, լորձաթաղանթի գրգռումը և հորմոնալ գործոնները։

Պոլիպները հաճախ հանդիպում են վերարտադրողական տարիքում, սակայն կարող են հայտնաբերվել նաև դաշտանադադարի շրջանում։

Կարևոր է տարբերակել արգանդի պարանոցի պոլիպը արգանդի խոռոչի էնդոմետրիալ պոլիպից։ Չնայած անվանումների նմանությանը՝ դրանք տարբեր տեղակայում ունեցող գոյացություններ են, և դրանց ախտորոշման ու բուժման մոտեցումները կարող են տարբերվել։

Ի՞նչ ախտանշաններ կարող է առաջացնել պոլիպը

Արգանդի վզիկի պոլիպը հաճախ ընթանում է առանց ախտանշանների։ Սակայն որոշ դեպքերում կարող են նկատվել՝

• արյունային արտադրություն սեռական հարաբերությունից հետո,
• միջդաշտանային արյունահոսություն,
• դաշտանային արյունահոսության հետ չկապված բծային արտադրություն,
• լորձային արտադրության ավելացում,
• հազվադեպ՝ երկարատև կամ կրկնվող արյունային արտադրություն։

Այս ախտանշանները բնորոշ չեն միայն պոլիպին։ Դրանց առկայության դեպքում անհրաժեշտ է պարզել պատճառը և բացառել արգանդի վզիկի այլ փոփոխությունները։

Կարո՞ղ է արգանդի պարանոցի պոլիպը խանգարել հղիանալուն

Սա այն հարցերից է, որն առավել հաճախ անհանգստացնում է հղիություն պլանավորող կանանց։Արգանդի պարանոցի փոքր, բարորակ պոլիպների մեծ մասը չի համարվում անպտղության հաստատված պատճառ։ Դրանց առկայությունը ինքնին չի նշանակում, որ կինը չի կարող հղիանալ։

Այնուամենայնիվ, որոշ իրավիճակներում պոլիպը կարող է անուղղակիորեն նշանակություն ունենալ։ Օրինակ՝ մեծ գոյացությունը, դրա հետ կապված բորբոքային փոփոխությունները կամ ուղեկցող այլ գինեկոլոգիական խնդիրները կարող են պահանջել լրացուցիչ գնահատում։

Եթե կինը երկար ժամանակ չի հղիանում, ճիշտ չէ անպտղությունը բացատրել միայն արգանդի պարանոցի պոլիպի առկայությամբ։ Անհրաժեշտ է գնահատել նաև ձվազատումը, արգանդի խոռոչը, արգանդափողերի անցանելիությունը և տղամարդու վերարտադրողական առողջությունը՝ ըստ կլինիկական ցուցումների։

Կարևոր է նաև չշփոթել արգանդի պարանոցի պոլիպը արգանդի խոռոչի էնդոմետրիալ պոլիպի հետ։ Վերջինս որոշ դեպքերում կարող է ավելի անմիջական նշանակություն ունենալ պտղաբերության և սաղմի իմպլանտացիայի համար։

Պոլիպի հեռացումը սովորաբար քննարկվում է, եթե՝

• առկա է կրկնվող կամ անհասկանալի արյունահոսություն,
• գոյացությունն առաջացնում է գանգատներ,
• պոլիպը մեծ է կամ ունի կասկածելի արտաքին տեսք,
• անհրաժեշտ է հյուսվածաբանական հետազոտություն,
• հնարավոր չէ վստահորեն հաստատել գոյացության բնույթը։

Միաժամանակ կարևոր է հիշել, որ նույնիսկ այն պոլիպները, որոնք հեռացվում են բարորակ գոյացության կասկածով, պետք է ուղարկվեն հյուսվածաբանական հետազոտության։ Դա թույլ է տալիս հաստատել ախտորոշումը և բացառել ավելի լուրջ փոփոխությունները։

Իսկ հղիության ընթացքում հայտնաբերված պոլի՞պը

Հղիության ընթացքում արգանդի պարանոցի պոլիպի հայտնաբերումը պահանջում է առանձնահատուկ մոտեցում։Այդ շրջանում արգանդի վզիկը դառնում է ավելի անոթավորված, և որոշ գոյացություններ կարող են ավելի հեշտ արյունահոսել։ Հեռացման որոշումը պետք է կայացվի անհատական՝ հաշվի առնելով հղիության ժամկետը, արյունահոսության առկայությունը, գոյացության բնույթը և միջամտության հնարավոր ռիսկերը։

Ուստի հղիության ընթացքում հայտնաբերված պոլիպը միշտ չէ, որ անհրաժեշտ է անմիջապես հեռացնել։ Որոշ դեպքերում նախընտրելի է հսկողությունը, իսկ միջամտության անհրաժեշտությունը գնահատվում է մասնագետի կողմից։

Ի՞նչ հետազոտություններ են անհրաժեշտ
Ախտորոշման առաջին քայլը գինեկոլոգիական զննումն է։ Անհրաժեշտության դեպքում բժիշկը կարող է առաջարկել՝

• կոլպոսկոպիա՝ արգանդի վզիկի մանրամասն գնահատման համար,
• ՊԱՊ թեստ և HPV թեստ՝ ըստ տարիքի, նախկին արդյունքների և ցուցումների,
• ուլտրաձայնային հետազոտություն, եթե կասկած կա արգանդի խոռոչի պոլիպի կամ այլ պաթոլոգիայի վերաբերյալ,
• հեռացված գոյացության հյուսվածաբանական հետազոտություն։

Հետազոտությունների ընտրությունը կախված է ոչ միայն պոլիպի առկայությունից, այլև կնոջ գանգատներից և ընդհանուր կլինիկական պատկերից։