Միզուղիների վարակները (ՄՈՒՎ) կանանց շրջանում բավական տարածված խնդիր են։ Շատ կանայք կյանքի ընթացքում առնվազն մեկ անգամ բախվում են ցիստիտի կամ միզուղիների այլ վարակի հետ։ Սակայն որոշ դեպքերում վարակները սկսում են կրկնվել՝ զգալիորեն ազդելով կյանքի որակի վրա։

Կրկնվող վարակների դեպքում կարևոր է ոչ միայն հերթական անգամ վերացնել ախտանիշները, այլև հասկանալ՝ ինչու են դրանք առաջանում և կա՞ արդյոք կրկնության նպաստող գործոն։

Ե՞րբ է վարակը համարվում կրկնվող
Կրկնվող միզուղիների վարակ է համարվում այն վիճակը, երբ արձանագրվում է առնվազն 2 վարակ 6 ամսվա ընթացքում կամ 3 վարակ մեկ տարվա ընթացքում։Կանանց մեծ մասի մոտ կրկնվող վարակները կապված են միզուղիների՝ հատկապես միզապարկի վարակի հետ։

Ինչո՞ւ են կանանց մոտ ՄՈՒՎ-երը հաճախ կրկնվում
Կանանց անատոմիական առանձնահատկությունները՝ հատկապես միզուկի համեմատաբար կարճ երկարությունը, հեշտացնում են մանրէների անցումը դեպի միզուղիներ։

Կրկնության ռիսկը կարող են մեծացնել նաև՝

• սեռական ակտիվությունը,
• սպերմիցիդների օգտագործումը,
• նոր սեռական զուգընկերոջ առկայությունը,
• միզուղիների կառուցվածքային կամ ֆունկցիոնալ որոշ խնդիրներ,
• միզապարկի ոչ լիարժեք դատարկումը,
• հղիությունը,
• դաշտանադադարի շրջանում էստրոգենի մակարդակի նվազումը։

Կարևոր է նաև տարբերակել նոր վարակը նախորդ վարակի կրկնությունից կամ բուժման նկատմամբ կայունությունից, քանի որ դրանց դեպքում մոտեցումը կարող է տարբեր լինել։

Որո՞նք են հիմնական ախտանիշները
Ցիստիտին բնորոշ են՝

• հաճախակի միզելու ցանկություն,
• միզարձակման ժամանակ այրոց կամ ցավ,
• փոքր քանակությամբ մեզի հաճախակի արտազատում,
• ստորորովայնային անհարմարություն,
• երբեմն՝ մեզի մեջ արյան առկայություն։

Եթե վարակը տարածվում է դեպի երիկամներ, կարող են առաջանալ բարձր ջերմություն, դող, կողային կամ գոտկային հատվածի ցավ, սրտխառնոց և ընդհանուր թուլություն։ Նման ախտանիշների դեպքում անհրաժեշտ է շտապ բժշկական գնահատում։

Ինչպե՞ս է հաստատվում ախտորոշումը
Կրկնվող վարակների դեպքում հատկապես կարևոր է ճիշտ ախտորոշումը։ Բժիշկը կարող է նշանակել մեզի ընդհանուր քննություն և, անհրաժեշտության դեպքում, մեզի ցանք՝ հակաբիոտիկների նկատմամբ զգայունության որոշմամբ։Սա հնարավորություն է տալիս պարզել հարուցիչը և ընտրել նպատակային բուժում՝ հատկապես կրկնվող կամ բարդ դեպքերում։

Ինչպե՞ս նվազեցնել կրկնության հավանականությունը
Կանանց խորհուրդ է տրվում բավարար քանակությամբ հեղուկ օգտագործել, չհետաձգել միզարձակումը և պահպանել ճիշտ ինտիմ հիգիենա։

Որոշ կանանց մոտ վարակները կապված են սեռական հարաբերությունների հետ։ Այդ դեպքում բժիշկը կարող է քննարկել անհատական կանխարգելիչ մոտեցումներ։

Դաշտանադադարի շրջանում, եթե առկա են միզասեռական համակարգի ատրոֆիկ փոփոխություններ և համապատասխան ցուցումներ, բժիշկը կարող է քննարկել տեղային էստրոգենային թերապիայի հնարավորությունը։

Կրկնվող վարակների դեպքում հակաբիոտիկների ինքնուրույն և հաճախակի օգտագործումը ցանկալի չէ, քանի որ այն կարող է նպաստել հակաբիոտիկակայունության զարգացմանը։