Տագնապային խանգարումները հղի կանանց մոտ․ պատճառները և բուժումը
Երեխային սպասելը ուրախ և հուզումնալի ժամանակահատված է: Եվ ցանկալի է, որ այդ շրջանում որևէ բացասական ազդեցություն չլինի պտղի վրա, հատկապես՝ մոր հիվանդությունը: Այս հարցում լավագույն տարբերակը հղիության պլանավորումն է՝ բուժելով բոլոր սուր և թուլացնելով քրոնիկ հիվանդությունները։ Հարկավոր է բեղմնավորումից երկու-երեք ամիս առաջ դադարեցնել այն դեղամիջոցների ընդունումը, որոնք կարող են վնասել
երեխային, կարգավորել աշխատանքի և հանգստի ռեժիմները, սկսել վիտամիններ ընդունելը: Այսպիսով, բեղմնավորումը տեղի կունենա բարենպաստ պայմաններում: Բայց, ցավոք, միշտ չէ, որ հնարավոր է պատրաստվել մայրությանը, և ցանկալի հղիությունը կարող է լինել նաև հիվանդության պայմաններում: Օրինակ, կանանց ժամանակակից «սխրագործությունը» խուճապի մասնիկ ունեցող վեգետատիվ-անոթային դիստոնիան է։
Տագնապի նոպաները այնքան էլ հազվադեպ չեն հղիների մոտ, եթե նախկինում ևս եղել են դեպքեր։ Հիվանդությունն ինքնին կյանքին չի սպառնում, բայց զգալիորեն մռայլեցնում է այն: Այնուամենայնիվ, նոպայի ինքնավար բաղադրիչները` սրտի ուժգին բաբախը, շնչարգելությունը, արյան ճնշման տատանումները պտղի համար անցանկալի են: Բացի այդ, խուճապի նոպաների համար նախատեսված բուժման դեղամիջոցների օգտագործումն անընդունելի է հղիության ընթացքում: Խուճապի նոպաներով հղիությունը, ընդհանուր առմամբ, հնարավոր է. այդ հիվանդությունը հակացուցված չէ հղիության ընթացքում: Սակայն, եթե չի հաջողվում կանխել խուճապի խանգարումը, ապա չի կարելի թույլ տալ, որ հիվանդությունն ընթանա իր հունով: Հղին անպայման հոգեթերապևտի օգնությանը պիտի դիմի։
Տագնապային խանգարումների պատճառները հղի կանանց մոտ
Հղիության ընթացքում խուճապի նոպաներ կարող են առաջանալ մի քանի պատճառներով: Նախ` դա շարունակական խուճապային խանգարում է, որը մինչ հղիությունը չի բուժվել: Միևնույն ժամանակ, շատ են դեպքերը, երբ հղիության ընթացքում խուճապի նոպաները լիովին անհետանում են և կնոջն այլևս չեն անհանգստացնում: Եվ հակառակը՝ վաղուց հաղթահարված խուճապային խանգարումը հղիության ընթացքում կարող է կրկնվել։ Պատահում է նաև, որ հիվանդությունն առաջանում է հղիության հետ միաժամանակ:
Հղիության ընթացքում այս հիվանդության թե՛ մեկնարկը, թե՛ կրկնությունը բացատրվում է նրանով, որ կնոջ հորմոնալ համակարգը անհավասարակշիռ վիճակում է լինում հղիության ժամանակ, անհանգստությունը մեծանում է, և առաջանում է վախ ապագա երեխայի համար: Այս ամենը սթրես ու խուճապի զարգացման խթան է կնոջ համար, իսկ հղիության ժամանակ անհանգիստ, անկայուն վիճակը հիմք է հանդիսանում հիվանդության համար:
Հղիության ընթացքում խուճապի նոպաները հազվադեպ չեն, ուստի կան բուժման արդյունավետ մեթոդներ, որոնք հատուկ նախատեսված են հղիների և կերակրող մայրերի համար․ դրանք կարող են կնոջը փրկել խուճապի հարձակումներից՝ առանց վնասելու երեխային:
Ինչպե՞ս օգնել տագնապային խանգարում ունեցող հղի կնոջը
Հղի և կերակրող կանանց մոտ խուճապի նոպաների դեմ պայքարի հիմնական միջոցը հոգեթերապիան է: Թերապիայի համար օգտագործվող հակադեպրեսանտները խիստ անցանկալի են հղիության առաջին եռամսյակում, իսկ երկրորդ և երրորդ եռամսյակներում դրանք նշանակվում են միայն խուճապային խիստ խանգարման դեպքում, երբ մոր բուժումն ավելի կարևոր է, քան պտղի համար նախատեսված ռիսկերը (կնոջ վիճակը դա պահանջում է):
Հոգեթերապևտի հետ աշխատանքը կօգնի բացահայտելու խուճապային խանգարման թաքնված պատճառները: Բուժման արդյունքում. բացասական վերաբերմունքը տարբեր երևույթների նկատմամբ մշակվում և փոխարինվում է դրականով, բացահայտվում են թաքնված վախերը, վերականգնվում է ինքնավստահությունը, բարձրանում ինքնագնահատականը:
Մասնագետը կբացատրի, թե ինչու են խուճապի նոպաներ լինում հղիության
ընթացքում, ինչ անել նոպայի ժամանակ, և կսովորեցնի մտքերն և հույզերը տիրապետելու հմտություններ, կօգնի դադարեցնելու վերահաս նոպան՝ հաղորդելով հանգստություն և վերահսկողություն: Հարձակումների հաճախականությունն ու ինտենսիվությունը աստիճանաբար կնվազեն, իսկ հղիությունն ու մայրությունը միայն դրական հույզեր կպարգևեն։
Մի՛ զբաղվեք ինքնաբուժությամբ, խորհրդակցե՛ք մասնագետի հետ՝ Ձեզ և Ձեր երեխային խաղաղություն և երջանկություն պարգևելու համար:
16449
