Ջուրը կյանքի առանցքային աղբյուրն է․ այն մասնակցում է օրգանիզմի բոլոր կենսական գործընթացներին։ Հղիության և կրծքով կերակրման ընթացքում հեղուկի պահանջը աճում է, քանի որ ջուրը անհրաժեշտ է ոչ միայն մոր օրգանիզմին, այլև զարգացող պտղին և կրծքի կաթի արտադրությանը։

Ջրի նշանակությունը հղիության ընթացքում

Հղիության ընթացքում օրգանիզմում արյան ծավալը ավելանում է մոտ 40–50%-ով, և այս աճին աջակցում է հենց ջուրը։ Բավարար հեղուկի ընդունումը նպաստում է․

• Պտղի ամնիոտիկ հեղուկի (պտղաջրերի) նորմալ կազմի պահպանմանը
• Սննդանյութերի և թթվածնի մատակարարմանը պտղին
• Փորկապության կանխարգելմանը
• Փքվածության և միզուղիների վարակների ռիսկի նվազեցմանը
• Տաք եղանակին գերծանրաբեռնվածության կանխարգելմանը

 Ջրի դերը կրծքով կերակրման ժամանակ

Կրծքով կերակրման ընթացքում հեղուկի պահանջը կրկին մեծանում է։ Մայրական օրգանիզմը արտադրում է օրական միջինում 700–900 մլ կաթ, որի հիմնական բաղադրիչը՝ ավելի քան 85%-ը, ջուրն է։

Հետևաբար՝ բավարար հեղուկի ընդունումը

• Աջակցում է կաթի արտադրությանը և որակին
• Կանխում է ջրազրկումը
• Օգնում է պահպանել մայրական էներգիան և ընդհանուր առողջությունը

Որքա՞ն ջուր է անհրաժեշտ

• Հղի կանանց խորհուրդ է տրվում օրական միջինում 2.0–2.5 լիտր հեղուկ (մաքուր ջուր, թեյեր, սուպեր, մրգեր)։
• Կրծքով կերակրող կանանց՝ մոտ 2.5–3 լիտր։
  Ցանկալի է հեղուկը ստանալ ոչ միայն ջրից, այլ նաև ջրով հարուստ մթերքներից՝ ձմերուկ, վարունգ, նարինջ, ելակ։

Պետք է հիշել,որ

• Ջուրը պետք է ընդունել փոքր քանակներով, բայց հաճախակի, և ոչ մեծ ծավալով անմիջապես ուտելուց հետո։
• Քաղցր ըմպելիքները և գազավորված ջրերը չեն կարող փոխարինել մաքուր ջրին։
• Ջրի ավելցուկը նույնպես ցանկալի չէ․ չափազանց մեծ քանակները կարող են ծանրաբեռնել երիկամները։

Ջուրը հղիության և կրծքով կերակրման ընթացքում ոչ միայն ծարավը հագեցնող հեղուկ է, այլև առողջ մայրության ու պտղի զարգացման առանցքային պայման։ Բավարար ջրային ընդունումը ապահովում է էներգիա, լավ ինքնազգացողություն և առողջ սկիզբ երեխայի կյանքի համար։