Սոխ․ օգտակար հատկություններն ու հակացուցումները

Սոխն աշխարհի գրեթե բոլոր խոհանոցներում ամենահայտնի բանջարեղեններից մեկն է։ Այն օժտված է ոչ միայն համային հրաշալի որակներով, այլև բուժիչ հատկություններով, որոնց շնորհիվ հնարավոր է պաշտպանվել կամ բուժել բազմաթիվ հիվանդություններ։

Սոխն առավել օգտակար է թարմ վիճակում, քանի որ ջերմային մշակման ընթացքում բազմաթիվ օգտակար հատկություններ կորչում են։ Այն պարունակում է A, C, E, PP, ինչպես նաև B խմբի վիտամիններ, շաքար, ֆիտոնցիդներ, ազոտային նյութեր, օրգանական թթուներ, մակրոտարրեր և միկրոտարրեր՝ կալիում, կալցիում, երկաթ, ֆոսֆոր, մագնիում, կոբալտ և օրգանիզմի համար օգտակար այլ նյութեր։

Երկաթի պարունակությամբ սոխը չի զիջում գազարին, իսկ շաքարի պարունակությամբ (որոշ տեսակները միայն) գերազանցում է ձմերուկին։

Սոխի կալորիականությունը 100գր սոխի կալորիականությունը 40կկալ է, իսկ կանաչ սոխինը՝ 20կկալ։

Օգտակար հատկությունները

• Սոխը սխտորի և քրքումի պես բնական հակաբիոտիկ է համարվում։ 
• Օժտված է վառ արտահայտված հակասեպտիկ և մանրէասպան ազդեցությամբ, ոչնչացնում է բազմաթիվ վնասակար մանրէներ։ 
• Նպաստում է օրգանիզմի դիմադրողական համակարգի ամրապնդմանը։ 
• Օգնում է կանխարգելել և հաղթահարել հարբուխը։ 
• Կանոնավոր օգտագործման դեպքում դրականորեն է ազդում սրտանոթային համակարգի վրա, նպաստում է խոլեստերինի մակարդակի իջեցմանը, ամրացնում է անոթների պատերը։ 
• Օգտակար է շաքարային դիաբետ ունեցող մարդկանց համար։ 
• Գրգռում է ախորժակը, նպաստում է սննդի լավ յուրացմանը։ 
• Ունի միզամուղ թույլ հատկություն։ 
• Կանոնավոր օգտագործումը բարենպաստ է ազդում մազերի, մաշկի, եղունգների ու ատամների առողջության վրա։ 
• Ուժեղացնում է սեռական ֆունկցիան։

Սոխի հակացուցումները

Խոհարարական չափաքանակով օգտագործելու դեպքում սոխը հակացուցումներ չունի։ Չափից շատ օգտագործելու դեպքում կարող է բացասական հետևանքների հանգեցնել։ Ներքին օրգանների լուրջ հիվանդությունների և սոխը բուժման նպատակով օգտագործելու դեպքում պարտադիր պետք է դիմել բժշկի խորհրդատվության։

Թարգմանությունը և խմբագրումը՝ www.sotskiy.am