Պրոլակտինն արտազատվում է հիպոֆիզի առաջնային մասի լակտոտրոպ բջիջների կողմից։ Կառուցվածքով նման է աճի հորմոնին (սոմատոտրոպ հորմոն) և պլացենտար լակտոգենին։ Կենսաբանական հիմնական դերը կաթնագեղձերի աճն ու զարգացումն է, ինչպես նաև ինտենսիվ կաթնարտադրությունը։

Ոչ հղի կանանց ձվարաններում պրոլակտինի նորմալ մակարդակն անհրաժեշտ է դեղին մարմնի կողմից պրոգեստերոնի սինթեզի համար, այն դեպքում, երբ պրոլակտինի բարձր մակարդակը ճնշում է ստերոիդոգենեզը և անօվուլյատոր (առանց ձվազատման ընթացքող ցիկլ) ցիկլի պատճառներից մեկն է։

Կարդացեք՝ Պրոլակտին հորմոն

Կանանց անհատական զարգացման ընթացքում հորմոնի բարձր մակարդակ է նկատվում սեռական հասունացման շրջանում և ցածր մակարդակ՝ մենոպաուզայի շրջանում։

Պրոլակտինի մակարդակը բարձրանում է առավոտյան և իջնում երեկոյան։ Այն սթրեսային հորմոն է, այսինքն՝ արյան մեջ դրա պարունակությունն աճում է ծանրաբեռնվածության, հոգնածության, հոգետրավմաների ու սթրեսների, միջավայրի անբարենպաստ պայմանների ազդեցությամբ։

Պրոլակտինի մակարդակի որոշման ցուցումները՝

• ֆունկցիոնալ անպտղություն, 
• լակտացիայի խանգարում, 
• գալակտորեայի և ամենորեայի համախտանիշ, 
• պրոլակտինոմայի և հիպոֆիզի այլ ուռուցքների ախտորոշում և բուժման մարտավարության ընտրություն։ 

Անալիզը ցանկալի է հանձնել դաշտանի 2-5-րդ օրը:

Հետազոտության համար անհրաժեշտ շիճուկի քանակը՝ 0.1մլ, հետազոտության տևողությունը՝ 2-3 ժամ։