Ձվարանի պոլիկիստոզը ձվարանների կառուցվածքային և ֆունկցիոնալ պաթոլոգիա է, որն անմիջականորեն կապված է նյութափոխանակության և հորմոնային համակարգի խանգարման հետ: Մեծամասամբ այն զարգանում է էստրոգենների սինթեզի, ֆոլիկուլագենեզի խանգարումների, ինչպես նաև կնոջ օրգանիզմում անդրոգեն հորմոնների բարձր մակարդակի ֆոնին: Այս հիվանդությունն առաջացնում է դաշտանային ցիկլի խանգարումներ, ձվազատման բացակայություն, գիրացում, մազակալում, ծանր դեպքերում կարող է հանգեցնել անպտղության:

Պոլիկիստոզի բուժման նպատակներով կիրառվում են տարբեր դեղորայքներ: Տարբերակներից մեկը ձվազատումը խթանող դեղամիջոցներն են, օրինակ՝ կլոստիլբեգիտը: Այս դեղամիջոցն ունի վառ արտահայտված հակաէստրոգենային հատկություն: Այն հանդիսանում է գոնադոտրոպինի արդյունավետ խթանիչ: Եթե պոլիկիստոզն ուղեկցվում է էստրոգենների թվի նվազմամբ, կլոստիլբեգիտի ազդեցությունն էստրոգենների վրա չնչին է, իսկ դրանց բարձր մակարդակի դեպքում դեղամիջոցը ցուցաբերում է հակաէստրոգենային լուրջ էֆեկտ:

Դեղամիջոցի բաղադրության մեջ մտնող գլխավոր ակտիվ նյութը կլոմիֆենի ցիտրատն է: Այս բաղադրիչն ակտիվ հակաէստրոգեն է, որն ուղղված է ձվազատումը խթանելուն: Այն սովորաբար լավ է յուրացվում կնոջ օրգանիզմի կողմից:

Ինչպես նշվեց, կլոստիլբեգիտի ընունումն ուղղված է ձվարաններում և հիպոֆիզում հորմոնների արտադրության ուժգնացմանը, աճի խթանմանը և հետագայում դոմինանտ ֆոլիկուլի հասունացմանը: Դեղի չափաքանակը որոշում է բուժող բժիշկը: Սովորաբար այն ընդունում են օրական 1-2 դեղահաբով, բուժման կուրսը սկսում են դաշտանային ցիկլի 3-5-րդ օրը և ընդունումը շարունակում են 5 օր:Այս ընթացքում հնարավոր է պահանջվի կլինիկական և լաբորատոր հետազոտությունների անցկացում՝ բուժման արդյունավետությունը գնահատելու նպատակով: Եթե ձվազատում տեղի չի ունենում, անցկացվում է բուժման կրկնակի կուրս:

Կլոստիլբեգիտի հակացուցումները

Կլոստիլբեգիտի ընդունումն արգելվում է հետևյալ դեպքերում.

• մակերիկամների կամ վահանաձև գեղձի ֆունկցիայի որոշ խանգարումներ, 
• երիկամային կամ լյարդային անբավարարություն, 
• ձվարանի կիստա, հիպոֆիզի ֆունկցիայի տարատեսակ խանգարումներ, հիպոֆիզում նորագոյացություններ, 
• տեսողական որոշ խնդիրներ, 
• էնդոմետրիոզ կամ սեռական օրգանների շրջանում բարորակ/չարորակ նորագոյացություններ, 
• լակտազային անբավարարություն, գալակտոզի անտանելիություն և գլյուկոզայի թերի ներծծում, 
• հղիություն, կրծքով կերակրում, 
• անհատական անտանելիություն որևէ բաղադրիչի նկատմամբ:

Հնարավոր է կլոստիլբեգիտի ընդունման ընթացքում կնոջ օրգանիզմում ի հայտ գան կողմնակի ազդեցություններ: Որոշ դեպքերում այն կարող է առաջացնել սրտխառնոց, փսխում, մետեորիզմ (փորափքանք), որովայնային ցավ, ախորժակի փոփոխություն, գլխապտույտ, գլխացավ և այլն: Հազվադեպ այն կարող է ալերգիկ ռեակցիա առաջացնել:

Կլոստիլբեգիտով բուժման դեպքում հնարավոր է ձվարանների չափերի մեծացում դիտվի, ինչի դեպքում դեղամիջոցի ընդունումը դադարեցվում է մինչև չափերի կարգավորումը: Շաքարային դիաբետի դեպքում այս դեղամիջոցի ընդունումը զգուշություն է պահանջում, քանի որ այն պարունակում է լակտոզա: Այլ դեղորայքի հետ չի փոխազդում և որևէ կերպ չի նվազեցնում դրանց արդյունավետությունը: