Բազմապտուղ հղիություն
43844
Բազմապտուղ է կոչվում այն հղիությունը, երբ ապագա մայրիկի արգանդում զարգանում է մեկից ավել պտուղ, հիմնականում երկվորյակ: Այս երեխաները կարող են լինել միևնույն կամ տարբեր ձվաբջիջներից: Համապատասխանաբար նրանք անվանվում են միաձվանի և երկձվանի: Կխոսենք այդպիսի երկվորյակների մասին, թեև նշվածները ճիշտ են թե եռյակների, և թե ավել պտուղների դեպքում:
Եթե երկվորյակները միաձվանի են, ապա՝
- նրանք երկուսն էլ նույն սեռը կունենան,
- նրանք կունենան միևնույն արյան խումբը,
- ամենայն հավանականությամբ նրանք կունենան նման մարմնակազմություն, մաշկի, մազերի նույն գույն, թեև պարտադիր չէ, որ ամբողջովին նման լինեն:
Տարբեր ձվաբջիջներից զարգացող երեխաները կոչվում են երկձվանի (տարաձվանի): Այս դեպքում տարբեր սերմնաբջիջներից բեղմնավորվում է մեկից ավել ձվաբջիջ: Եթե ընտանիքում եղել են տարաձվանի երկվորյակներ, ապա հավանականությունը մեծ է, որ ձեր դեպքում էլ այդպես կլինի:
Եթե երկվորյակները տարաձվանի են, ապա՝
- ինչպես նույն, այնպես էլ տարբեր սեռի կլինեն,
- կունենան նույն կամ տարբեր արյան խումբ,
- սովորաբար տարբեր տեսք են ունենում, նման են ինչպես մի քանի տարվա տարբերությամբ ծնված սովորական քույրն ու եղբայրը:
Բեղմնախթանիչ դեղեր ընդունելու և ԱՄԲ-ի դեպքում մեծանում է բազմապտուղ հղիության հավանականությունը: Բեղմնախթանիչ դեղերը նպաստում են մի քանի ձվաբջջի առաջացմանը: Սա նշանակում է, որ հավանականությունը մեծ է, որ մեկից ավելի ձվաբջիջ կբեղմնավորվի, իսկ ԱՄԲ-ի դեպքում բժիշկը մի քանի բեղմնավորված ձվաբջիջ է տեղադրում արգանդում, որպեսզի դրանցից որևէ մեկով հղիություն զարգանա: Այս դեպքում էլ, սակայն, հնարավոր է, որ բոլոր ձվաբջիջներն էլ զարգանան և բազմապտուղ հղիություն սկսվի:
Բազմապտուղ հղիութան հավանականությունը մեծանում է նաև, եթե՝
- կնոջ տարիքը 35-ից բարձր է,
- կնոջ մայրիկի ազգում եղել է բազմապտուղ հղիության դեպք,
- կինն արդեն ունեցել է նման հղիություն,
- վերջերս է դադարեցրել բեղմնականխիչ դեղորայքի ընդունումը:
Բազմապտուղ հղիության վտանգները
Ցանկացած դեպքում հղիության ընթացքում հնարավոր է բարդություններ առաջանան, իսկ դրա վտանգը կարելի է ասել կրկնապատկվում է բազմապտուղ հղիության պարագայում: Ավելի մեծ է հետևյալ բարդությունների առաջացման հավանականությունը՝
- խնդիրներ, որոնք բարձրացնում են արյան ճնշումը (պրեէկլամպսիա),
- գեստացիոն կամ հղիության դիաբետ,
- վաղաժամ ծննդաբերություն,
- մեկ կամ երկու պտղի վիժում,
- երեխաների բնածին արատներ, որոնց պատճառը գեների կամ քրոմոսոմների շեղումներն են: Ժառանգական խանգարումներն ավելի հավանական են բազմապտուղ հղիության դեպքում:
Բազմապտուղ հղիությունն ախտորոշվում է ուլտրաձայնային հետազոտության ընթացքում: Բժիշկը նշանակում է հաճախակի այցեր, որպեսզի համոզված լինի, որ պտուղների զարգացումը բնական է ընթանում: Յուրաքանչյուր այցի ժամանակ կատարում է ֆիզիկական զննում, ուլտրաձայնային հետազոտություն, զարկերակային ճնշման ստուգում, ինչպես նաև արյան և մեզի հետազոտություններ: Ավելի լավ է խնդիրները հայտնաբերել վաղ շրջանում և բուժել:
Բազմապտուղ հղիությունը գուցե կրկնակի անհանգստության պատճառ լինի ապագա մայրիկի համար, սակայն վախենալ պետք չէ: Առողջ երեխաներ լույս աշխարհ բերելու համար անհրաժեշտ է, որ նա ինքն առողջ լինի: Հղիության ընթացքում անհրաժեշտ է՝
- բաց չթողնել մակնաբարձ-գինեկոլոգի այցերը,
- օգտագործել առողջ սնունդ՝ հարուստ կալորիաներով և ֆոլաթթվով, երկաթով, կալցիումով,
- չծխել, չօգտագործել ալկոհոլ, թմրանյութեր,
- խուսափել կոֆեինից,
- առանց բժշկի նշանակման չօգտագործել դեղորայք, վիտամիններ կամ խոտաբույսեր,
- խորհրդակցել բժշկի հետ թույլատրելի ֆիզիկական ակտիվության վերաբերյալ,
- հաճախ հանգստանալ:
Երեխաների ծնունդից հետո հավանաբար գերհոգնածություն կզգացվի: Պետք չէ անհանգստանալ, որ չեք հասցնի նրանց խնամել: Կարելի է դիմել ընտանիքի անդամների կամ ընկերների օգնությանը:
