Կնոջ գեղեցկությունը հարատև չէ: Հարթ մաշկ, բարեկազմ իրան, փայլուն, փարթամ մազեր, այս ամենը տալիս է բնությունը, բայց միայն 10-20 տարով: Այնուհետև սկսում են կնճիռներ առաջանալ, դեմքի մաշկը փոխվում է, կորչում է կազմվածքի նրբագեղությունը։ Ժամանակի ընթացքում ավելի մեծ ջանքեր են պահանջվում կազմվածքը պահպանելու համար, իսկ ժամանակը կանգ չի առնում, և մոտենում է դաշտանադադարը:

Կյանքը կանխատեսելի է, ուստի՝ ձանձրալի: Մեր ունեցածի հանդեպ մշտական դժգոհությունը մղում է ինքնախաբեության, և հաճախ ենք լսում շրջապատից՝ «ինչպես է նա երիտասարդացել» արտահայտությունը: Ուրեմն իսկապե՞ս մեծ տարիքում հղիանալը կարող է երիտասարդացնել: Փորձենք պարզել միասին:

Հղիության ընթացքում տեղի է ունենում հորմոնների լրացուցիչ արտադրություն, և արդեն իսկ առկա հորմոնների մակարդակը բարձրանում է: Հիմնական հորմոններն են պրոգեստերոնը, էստրոգենը, մարդու խորիոնային գոնադոտրոպինը (ՄԽԳ), խորիոնային սոմատոտրոպինը, մարդու աճի հորմոնը: Այդ բոլոր հորմոնները նպաստում են կնոջ տեսքի բարելավմանը՝

• պրոգեստերոնը նպաստում է կրծքագեղձերի աճին, 
• էստրոգենը բարելավում է արյան շրջանառությունը և կարգավորում զարկերակային ճնշումը, 
• ՄԽԳ-ն անուղղակիորեն արագացնում է նյութափոխանակությունը, մազերը փայլ են ձեռք բերում և արագ երկարում, հարթեցնում է դեմքի կնճիռները, և առհասարակ մաշկի վիճակի ընդհանուր բարելավումը այս հորմոնի շնորհիվ է, 
• մարդու աճի հորմոնը (սոմատոտրոպին) արագացնում է նյութափոխանակությունը և որոշ հյուսվածքների (մասնավորապես շարակցական) աճն է խթանում, նպաստում է ճարպային հյուսվածքների քայքայմանը:

Հորմոնների այս հատկություններն սկսել են օգտագործել կոսմետոլոգիայում: Կանայք, շտապելով հետաձգել ծերությունը, անվերահսկելիորեն օգտագործում են մաշկի ֆլորայի տարբեր ներկայացուցիչներից պատրաստված տարատեսակ հորմոնների կենսաբանական նմանակներ՝ առանց մտածելու դրանց հետևանքների մասին: Այդպիսի միջամտություններ, ծառայություններ առաջարկողները (առողջարանական կենտրոններում) հաշվի չեն առնում հաճախորդի հորմոնային ֆոնը, որպեսզի վտանգներից հնարավորին խուսափեն:

Իհարկե այստեղ բոլորը հիշում են այն դեղամիջոցները, որոնք խոստանում են մեղմել դաշտանադադարի նշանները և պարունակում են արհեստական էստրոգեն: Այնինչ ոչ բոլորը գիտեն այդ «երիտասարդացնող» ներարկումների և հաբերի մեջ պարունակվող հորմոնների չափաբաժինների տարբերությունը:

Արդյո՞ք հղիությունը ֆիզիկապես երիտասարդացնում է կնոջը

Պատասխանը բացասական է: Հորմոնային վիճակի փոփոխությունների արդյունքում մարմնի որոշ հատվածներ ավելի երիտասարդ տեսք են ունենում, բայց դա ժամանակավոր բնույթ է կրում: Երբ հորմոնային ֆոնը դառնում է այնպիսին, ինչպիսին նախքան հղիությունն էր, օրգանիզմն անցնում է իր «անձնագրային» տարիքին:

Այլ հարց է, որ 35-ը բոլորած կանայք սկսում են ավելի ուշադիր հետևել իրենց տեսքին: Կանոնավոր մարզասրահ այցելելը, գեղեցկության սրահներում ծառայություններից օգտվելը, ճիշտ սննդակարգը, խելամիտ ընտրված կոսմետիկան և հագուստը կնոջն ավելի երիտասարդ տեսք են հաղորդում: Կինը հասցնում է ձեռք բերած հիվանդությունները բուժել և վերահսկել առողջական խնդիրները: Հաճախ առողջության տեսանկյունից նա ավելի պատրաստ է հղիությանը, քան քսան տարեկան կինը: Հղիության հանդեպ պատասխանատու մոտեցումը և առողջ ապրելակերպն առհասարակ չեն կարող կնոջ արտաքին տեսքի վրա դրականապես չազդել:

Այնուամենայնիվ մեծ տարիքում հղիանալը պետք չէ համարել բառի բուն իմաստով երիտասարդացնող միջոց, իսկ ահա հոգեբանորեն հղիությունն իսկապես երիտասարդացնում է: Միանշանա՛կ: Ընտանիքի նոր անդամի լույս աշխարհ գալուն պատրաստվելու «հոգսերը» ապագա մայրիկին դրական զգացմունքներ են հաղորդում և ստիպում շողալ:

 

Աղբյուրը