ՈւՁՀ-ն հղիության ընթացքում

25.02.201432270

ՈւՁՀ-ն տեղեկատվության առումով բարձր, անվտանգ, անվնաս եղանակ է, ինչը հնարավորություն է ընձեռում հսկել պտղի զարգացումը նրա աճի տարբեր փուլերում:

Ինչու՞ է պետք ՈւՁՀ-ն հղիության ժամանակ

ՈւՁՀ-ն հղիության ժամանակ պետք է հետևյալ նպատակների համար՝

  • հղիության փաստը պարզելու, արտարգանդային հղիությունը հերքելու, 
  • պտղաձվերի քանակը որոշելու,պտղի բնածին հնարավոր շեղումներն ախտորոշելու:

Ուլտրաձայնային հետազոտությունը հղիության ժամանակ ներառում է ապագա երեխայի անատոմիայի, ինչպես նաև ընկերքի, պորտալարի, պտղաջրերի, արգանդի ու հավելումների ուսումնասիրությունը: Հղի կինը պետք է ուլտրաձայնային երեք պլանային (սկրինինգային) հետազոտություն անցնի:

Պլանային ՈւՁՀ-ն պետք է հղիության հետևյալ ժամկետներում՝

  • 10-14 շաբաթական,
  • 20-24 շաբաթական,
  • 32-34 շաբաթական:

Ըստ բժշկի նշանակման՝ արտապլանային ՈւՁՀ կարելի է կատարել հղիության ցանկացած ժամկետնում:

Ինչպե՞ս է կատարվում

ՈւՁՀ-ն կատարվում է ինչպես որովայնային (որովայնի առաջային պատով), այնպես էլ հեշտոցային (հեշտոցով) ճանապարհով: Այս եղանակներից ամեն մեկն իր ախտորոշիչ նշանակությունն ունի:

Պլանային ՈւՁՀ-ն հղիության 10-14 շաբաթականում։ Հղի կանանց առաջին ՈւՁՀ-ն թույլ է տալիս ճշտել հղիության ժամկետը (եթե վերջին դաշտանի ամսաթիվն անհայտ է), պտղի դիրքն արգանդում, ընկերքի վիճակը: Բժիշկը չափում է սաղմը, համեմատում այն հղիության ժամկետին համապատասխանող նորմայի հետ: 10-14 շաբաթականում կատարված ՈւՁՀ-ի ժամանակ բժիշկը գնահատում է պտղի օձիքային տարածության հաստությունը (սույն հետազոտությունը թույլ է տալիս բացառել պտղի զարգացման արատները վաղ փուլերում): Այդ ժամկետում օձիքային տարածության 3 մմ-ից ավել հաստության դեպքում լրացուցիչ հետազոտություն է նշանակվում: Այդ ժամկետում, կնոջ ցանկությամբ, բժիշկը կարող է ասել նաև պտղի սեռը:

Պլանային ՈւՁՀ-ն հղիության 20-24 շաբաթականում նույնպես ներառում է պտղի չափումը, ընկերքի վիճակը և պտղաջրերի քանակը: Զննման ժամանակ բժիշկը համոզվում է պտղի քրոմոսոմային հիվանդությունների նշանների բացակայության մեջ: Այդ ժամկետում է կատարվում նաև ստուգիչ դոպլերագրաֆիա, ինչը հնարավորություն է ընձեռում գնահատել արգանդային արյան հոսքը, պտղի, պորտալարի արյան շրջանառության վիճակը և այլն: Դոպլերոգրաֆիան հնարավորություն է տալիս ախտորոշել պտղի հիպօքսիայի և/կամ սկսվող գեստոզի վաղ նշանները:

Պլանային ՈւՁՀ-ն հղիության 32-34 շաբաթականում։ Պլանային երրորդ ՈՒՁՀ-ի գլխավոր նպատակը ծննդաբերությունից առաջ պտղի վիճակի ու դիրքի ճշտումն է: Բժիշկը կնայի, թե որն է ձեր պտղի առաջատար մասը՝ գլու՞խը, թե՞ կոնքը, կհամոզվի՝ պորտալարը փաթաթված չէ՞ արդյոք: Այդ ՈՒՁՀ-ի ժամանակ են բացահայտվում հղիության ուշ շրջաններում ի հայտ եկող զարգացման արատները: Մանիտորի վրա կարող եք տեսնել ձեր ապագա բալիկի դեմքը, ով արդեն գրեթե նորածնի տեսք ունի:

Արտապլանային ՈՒՁՀ-ներ

Հղիության ցանկացած ժամկետում բժիշկը կարող է նշանակել արտապլանային ՈւՁՀ:
Արտապլանային ՈՒՁՀ-ների թիվը կարող է շատ տարբեր լինել: Հաճախ առաջին ՈՒՁՀ-ն արվում է հղիության առաջին շաբաթներում՝ հղիության ժամկետը հստակեցնելու և դրա` արգանդային տեղակայման մեջ համոզվելու համար: Լրացուցիչ ՈՒՁՀ նշնակվում է արյունահոսության, հղիության սպառնացող ընդհատման, արտարգանդային հղիության կասկածի (վաղ ժամկետներում) և այլ դեպքերում: Եղեք ձեր բժշկի հսկողության տակ, հետևեք ձեր առողջությանը, իսկ գանգատների դեպքում անհապաղ դիմեք բժշկի: