Պարզվել է, որ մարդու բնավորության առանձնահատկություններն ազդում են նրա ուտելու սովորությունների վրա։ Օրինակ՝ նևրոտիկ գծերով է բացատրվում պանրի և շոկոլադի հանդեպ մեծ սերը։

Շվեյցարիայի ֆեդերալային տեխնոլոգիական ինստիտուտի գիտնականները պատահական հասցեներով երեք հարցարան են ուղարկել։ Առաջինը նվիրված է եղել մարդու բնավորության առանձնահատկությունների բացահայտմանը, երկրորդը՝ այն սովորություններին, որոնք կապ ունեն ուտելու հետ, երրորդը՝ նախընտրած սննդատեսակներին։ Հետազոտության հեղինակներին հետաքրքրում էր հնգագործոն մոդելի անձնային գծերի (էքստրավերտություն, բարյացակամություն, բարեխղճություն, լայնախոհություն և նևրոտիկություն) կապը սննդի ընտրության հետ։

Մենք այն ենք, ինչ ուտում ենք

Հետազոտողները հայտնաբերել են, որ օրինակ բարեխղճության ցածր ցուցանիշ գրանցած մարդիկ ուտում են իմպուլսիվորեն և համեղ կերակուր տեսնելիս հաճախ կորցնում են ինքնավերահսկողությունը։ Նևրոտիկները հաճախ մեծ կալորիականությամբ սնունդ ն ուտում՝ փորձելով հաղթահարել բացասական ապրումները։ Պարզվել է, որ էքստրավերտությունը, որը, ի տարբերություն անբարեխղճության և նևրոտիկության, սովորաբար դրական որակ է համարվում, նույնպես կարող է անառողջ վարքի հանգեցնել։ Էքստրավերտները սովորաբար չափից շատ են ուտում արտաքին պատճառների հետևանքով՝ հաճելի համի կամ բույրի, ինչպես նաև այն պատճառով, որ հաճախ են վնասակար սնունդ ուտում դրսում։

Ընդհանուր առմամբ կարելի է ենթադրել, որ անձննային այս կամ այն որակները կարող են դիտվել որպես ռիսկի գործոն, որը սխալ վերաբերմունք է ձևավորում սննդի հանդեպ։ «Այս արդյունքները ևս մեկ անգամ ապացուցում են, որ սեփական առողջության, մասնավորապես՝ սնվելու հանդեպ մարդու վերբերմունքը սերտորեն կապված է այնպիսի անձնային հատկանիշների հետ, ինչպիսիք են բարեխղճությունը և նևրոտիկությունը։ Արդեն իսկ հասկանալի է, որ մարդու՝ հույզերը կառավարելու և ինքնավերահսկելու ունակությունը ևս կարևոր է առողջ սնվելու հարցում, այնքան կարևոր, որքան կալորիաների հաշվարկը և վնասակար մթերքներից հրաժարվելը,- ասում է Թիմ Բոգը, Միչիգանի Ուեյնի համալսարանի հոեբան»։

Այլ կերպ ասած՝ մարմնի քաշը բնականոն վիճակում պահպանելու համար շատ կարևոր է ինքնավերլուծությունը, հասկանալը, թե ինչպես ենք արձագանքում սթրեսին կամ ինչպես ենք մեզ պահում երեկույթի ընթացքում, երբ համեղ ուտելիքներ ենք տեսնում։ Ֆիոնա Ջոնսոնը՝ Լոնդոնի համալսարանական քոլեջից, ով ուսումնասիրում է սննդային վարքը, ավելացնում է, որ անձնային գծերը գրեթե չեն փոխվում կյանքի ընթացքում և նրանց բացասական ազդեցությունը հաղթահարելը դժվար կլինի։