Պտուղընկերքային (ֆետոպլացենտար) անբավարարություն․ ախտանշանները, ախտորոշումը, բուժումը

Պտուղընկերքային (ֆետոպլացենտար) անբավարարություն․ ախտանշանները, ախտորոշումը, բուժումը

Կարդացեք՝  Պտուղընկերքային (ֆետոպլացենտար) անբավարարություն․ պատճառները և տեսակները

ՊԸԱ-ի նշանները կախված են դրա տեսակից: Կոմպենսացված քրոնիկական ձևի դեպքում ախտանշաններ չեն արտահայտվում: Ապագա մայրիկը լավ ինքնազգացողություն է ունենում: Հիվանդության մասին կինն իմանում է միայն ՈւՁՀ-ի արդյունքներից:

Ավելի արտահայտիչ ախտանշաններ դիտվում են դեկոմպենսացված քրոնիկական և սուր ձևերի ժամանակ: Կինը կարող է նկատել, որ փոքրիկն ինչ-որ ժամանակահատվածում ակտիվորեն շարժվում է: Այնուհետև այդ ակտիվությունը կտրուկ նվազում է: Հարկ է նշել, որ ապագա մայրիկը հղիության 28-րդ շաբաթից սկսած պետք է զգա փոքրիկի խաղը օրական ամենաքիչը 10 անգամ: Եթե նրա ակտիվությունն այս ցուցանիշից պակաս է, ապա կարիք կա բժշկի այցելելու: Հնարավոր է, որ դա ինչ-որ խնդրի մասին վկայի (օրինակ՝ ՊԸԱ):

Դեկոմպենսացված քրոնիկական ընկերքային անբավարարության լրացուցիչ նշաններ կարող են լինել կնոջ որովայնի մեծացման դանդաղում, պտղի աճի դանդաղում: Գործնականում հնարավոր չէ ինքնուրույն բացահայտել այդ փոփոխությունները: Միայն բժիշկը կարող է նկատել խնդիրն ընթացիկ զննումների ժամանակ: ՊԸԱ ամենավտանգավոր նշանը հեշտոցից արյունային արտադրությունն է: Դա նկատելով՝ անհրաժեշտ է անհապաղ դիմել բժշկի, քանի որ տվյալ ախտանշանը վկայում է ընկերքի վաղաժամ շերտազատման մասին:

Ընկերքային անբավարարության ախտորոշումը

Ինչպես արդեն նշվել է, պտուղընկերքային անբավարարությունը կարող է առաջանալ բազմաթիվ պատճառներով: Դրա համար էլ ախտորոշումը պետք է լինի հղի կնոջ համալիր հետազոտության տեսքով:

Բժիշկը, հիվանդության պատմությունը հավաքելով, պարզում է գլխավոր գործոնը, որը նպաստել է այս խնդրի առաջացմանը (տարիք, ապրուստի կամ մասնագիտական պայմաններ, վատ սովորություններ, արտաքին սեռական օրգանների և գինեկոլոգիական հիվանդություններ և այլն): Հղի կինը ՊԸԱ դեպքում կարող է գանգատվել որովայնի ցավերից, հեշտոցից արյունային արտադրությունից, պտղի չափազանց ակտիվությունից կամ դրա բացակայությունից, արգանդի բարձր տոնուսից:

Նախքան ընկերքային անբավարարություն ախտորոշելը, բժշկական զննման ընթացքում գինեկոլոգը չափում է ապագա մայրիկի որովայնի շրջակայքը, գնահատում է արգանդի հատակի վիճակը, գրանցում է կնոջ քաշը: Ստացված տվյալների միջոցով կարելի է հասկանալ պտղի զարգացումն ընթանում է բնականոն հունով, թե՞ կան խանգարումներ:

Գինեկոլոգիական զննման արդյունքում կարելի է գնահատել արտադրության բնույթը, բացահայտել բորբոքումը, նյութն ուղարկել մանրադիտակային և մանրէաբանական հետազոտության:

Ախտորոշման հարցում մեծ դեր ունի ուլտրաձայնային հետազոտությունը: Դրա շնորհիվ կարելի է որոշել պտղի չափերը (գլխի, վերջույթների, իրանի) և համեմատել դրանք հղիության տվյալ փուլին բնորոշ ցուցանիշների հետ, ինչպես նաև չափել ընկերքի հաստությունը և որոշել դրա հասունացման աստիճանը:

Ընկերքային անբավարարություն կասկածելու դեպքում բժիշկը կատարում է կարդիոտոկագրաֆիա և ֆոնոտոկագրաֆիա, որպեսզի գնահատի փոքրիկի սրտի աշխատանքը: Կարող են դիտվել թթվածնաքաղցի նշաններ՝ առիթմիա, բրադիկարդիա, տախիկարդիա:

Արգանդային արյան հոսքի դոպլերագրաֆիան թույլ է տալիս գնահատել արյան շրջանառությունն արգանդի, պորտալարի, ընկերքի պտղային հատվածների անոթներում:

Ընկերքային անբավարարության բուժումը

Հաշվի առնելով այն հանգամանքը, որ ՊԸԱ կարող է հրահրվել տարբեր պատճառներով, դրա բուժման ստանդարտ սխեմա գոյություն չունի: Առաջին հերթին բժիշկը ձգտում է վերացնել պատճառաբանական գործոնը և բոլոր միջոցներն ուղղել կոմպենսատոր մեխանիզմների պահպանմանը: Եթե առկա է անբավարարության կոմպենսացված ձևը և պտղի կյանքին սպառնացող վտանգ չկա, ապա իրականցվում է ամբուլատոր բուժում: Մյուս ձևերի դեպքում պահանջվում է հոսպիտալացում և ինտենսիվ թերապևտիկ միջոցառումների իրականացում:

Եթե ընկերքային ցածր անբավարարության դեպքում գոյություն ունի հղիության ընդհատման վտանգ, ապա բժիշկը նշանակում է տոկոլիտ դեղանյութերի շարքից դեղորայք: Ընկերքում անոթային տոնուսի խանգարումների և կնոջ արյան միկրոշրջանառության խանգարումների դեպքում բժիշկը նշանակում է հակակոագուլյանտներ և հակաագրեգատներ: Հեմոդինամիկ խանգարումների բացահայտման դեպքում նշանակվում են սրտամկանի կծկողական ֆունկցիան կարգավորող, օրգանների պերֆուզիան բարելավող, հիպոտենզիվ հատկությամբ դեղամիջոցներ: Եթե բացահայտվել է արգանդամկանի հիպերտոնուս, ապա պահանջվում են սպազմալիտիկ դեղամիջոցներ: Ընկերքի փոխադրային ֆունկցաիայի կարգավորման և հակաօքսիդանտային պաշտպանության համար նշանակվում են տարատեսակ վիտամիններ:

Ապագա մայրիկը չպետք է առանց բժշկի նշանակման դեղորայք ընդունի՝ ընկերուհիների կամ այլոց խորհուրդներով, քանի որ դրանք կարող են հանգեցնել սարսափելի հետևանքների: Բժիշկն անհատական կարգով կազմում է բուժման սխեմա: Պետք է հետևել միայն բժշկի հրահանգներին: Հղի կանանցից շատերին հետաքրքրում են ընկերքային անբավարարության բուժման ավանդական ձևերը: Այստեղ դժվար կլինի որևէ հստակ բան խորհուրդ տալ, քանի որ մի կնոջ այն կարող է օգնել, իսկ մյուսին՝ հակառակը, վիճակը վատթարացնել: Այդ պատճաով խորհուրդ չի տրվում հետևել ավանդական բժշկությանը: Որևէ հստակ բան խորհուրդ տալ կարող է միայն բժշկական կրթություն ստացած մասնագետը:

Ծննդալուծումը ՊԸԱ դեպքում

Ծննդալուծումը որոշում է բժիկը՝ բուժման արդյունավետությունից կախված: Կոմպենսացված ձևի դեպքում կինը կարող է ինքնուրույն ծննդաբերել: Սուբկոմպենսացվածի դեպքում հաճախ կատարվում է կեսարյան հատում: Դեկոմպենսացված անբավարարությունը համարվում է արտակարգ վիրաբուժական ծննդալուծման ցուցում:

Ընկերքային անբավարարության կանխարգելումը

Հղիության պլանավորումը կանխարգելման գլխավոր և շատ կարևոր միջոցներից է: Ցավոք զույգերից շատերը չեն հասկանում դրա կարևորությունը: Հաճախ հղիությունն ասնպասելի է տեղի ունենում: Ապագա մայրիկը դեռ նախքան բեղնավորումը պետք է անցնի անհրաժեշտ զննումները, որոնց շնորհիվ կբացահայտվեն վտանգի բոլոր գործոնները: Խնդիրների բացահայտման դեպքում դրանք անհրաժեշտ է վերացնել կամ նվազեցնել դրանց ազդեցությունը: Հղիության պլանավորումը կփրկի հետագայում ՊԸԱ առաջացումից:

Պարտադիր պետք է բացառել վատ սովորությունների գործոնը՝ ծխելը, ալկոհոլի և դեղորայքային միջոցների ընդունումը: Հղիությունից առաջ և դրա ընթացքում անհրաժեշտ է բուժել քրոնիկական հիվանդությունները, պաշտպանվել վարակներից: Հղիության ընթացքում կնոջը խորհուրդ է տրվում կարգավորել սննդակարգը և քունը (քնել նվազագույնը 8 ժամ օրական):

Հղիության 14-16 և 28-34-րդ շաբաթների ընթացքում հնարավոր է նշանակվի կանխարգելիչ դեղորայքային կուրս: Հղիության բարդացումների դեպքում պահանջվում է ընկերքային անբավարարության կանխարգելում՝ հղիության ընթացքի բժշկական բարձր վերահսկում, պտղի վիճակի և զարգացման մշտական մոնիթորինգ:

Ամփոփելով՝ հարկ է նշել, որ ՊԸԱ-ն լուրջ խնդիր է, որին բախվում են հղի կանանցից շատերը: Ինչո՞վ է վտանգավոր ընկերքային անբավարարությունը: Այս հարցին միանշանակ պատասխան չկա: Հետևանքները կախված են բազմաթիվ գործոններից: Հնարավոր է, որ երեխան առողջ լույս աշխարհ գա կամ խնդիրներով, կամ էլ կարող է դեռ մոր արգանդում մահանալ: Այս խնդրին չբախվելու համար անհրաժեշտ է նախօրոք պլանավորել հղիությունը և վերանայել ապրելակերպը։

Հարց ու պատասխան նոր կորոնավիրուսային վարակի, հղիության, ծննդաբերության և կրծքով կերակրման վերաբերյալ

Հարց ու պատասխան նոր կորոնավիրուսային վարակի, հղիության, ծննդաբերության և կրծքով կերակրման վերաբերյալ

ՔՈՎԻԴ-19-ից խուսափելու համար հղիության ընթացքում կանայք պետք է ձեռնարկեն միևնույն նախազգուշական միջոցները, ինչ մյուս ....

Ալկոհոլը կրծքով կերակրման ընթացքում

Ալկոհոլը կրծքով կերակրման ընթացքում

Լակտացիայի շրջանում ալկոհոլի օգտագործումը քիչ ուսումնասիրված հարց է։ Մայրիկները հաճախ են լսում հակասական խորհուրդներ, թե ինչպես է ազդում ալկոհոլը երեխայի վրա․․․

Ցիստիտը հղիության ընթացքում

Ցիստիտը հղիության ընթացքում

Հղիության ընթացքում ցիստիտի դեպքում դեղամիջոցների և անգամ որոշ խոտաբույսերի ընդունումն արգելվում է, քանի որ ոչ բոլորն են բարենպաստ ազդեցություն թողնում երեխայի առողջության վրա․․․

Մագնիումի դերը հղիության ընթացքում

Մագնիումի դերը հղիության ընթացքում

Մագնիումի պակասն առանձնահատուկ զգացվում է հղիության շրջանում, քանի որ այն մասնակցում է փոքրիկի պրակտիկորեն բոլոր օրգանների կազմավորմանը և․․․․