Ինչեր ասես, որ չես անի նվիրական նպատակին հասնելու համար՝ հետազոտություններ, ներարկումներ, դեղահաբեր, իսկ հղիանալ այդպես էլ չի ստացվում: Բժիշկները հաճախ հանձնվում են՝ ասելով, որ բժշկությունն անզոր է, իսկ հավատալ դրան չես ուզում: Ինչևէ, այդպիսի դատավճիռը մարդկանց ստիպում է երեխա ունենալու այլ եղանակներ փնտրել: Այս պատճառով բազմաթիվ զույգեր դիմում են ոչ ավանդական բժշկության կլինիկաների, որոնք հաճախ դառնում են բուժվելու միակ հույսը:

Այլընտրանքային բուժման արդյունավետ եղանակներից մեկն է հիրուդոթերապիան կամ տզրուկաբուժությունը, որը կիրառվում է արդեն 2000 տարի: Տզրուկաբուժության առանձնահատկությունը պայմանավորված է օրգանիզմի համակողմանի ապաքինմամբ: Արդյունքը որոշվում է կարևոր մի քանի գործոններով՝ կենսաբանական (տզրուկն արյան մեջ է արտազատում իր թուքը, որը հարուստ է ակտիվ նյութերով), ռեֆլեկտոր (տզրուկներին դնում են մաշկի ռեֆլեքսածին կետերի վրա), մեխանիկական (ներծծում է արյունը): Խոսենք սրանցից յուրաքանչյուրի մասին:

Կենսաբանական գործոն

Բժշկական տզրուկների թուքը համարում են մի ամբողջ «բնական լաբորատորիա»: Հիրուդին ֆերմենտը դանդաղեցնում է արյան մակարդելիությունը, ունի հակաբորբոքային և ցավազրկող հատկություն, վնասված հյուսվածքներում լավացնում է միկրոշրջանառությունը: Արյան հոսքի ուժեղացման և օրգանիզմը թթվածնով հարստացնելու արդյունքում արագանում է նյութափոխանակությունը, բարձրանում է դիմադրողականությունը, լավանում է քունը և ախորժակը: Հիալուրանիդազ ֆերմենտը ներծծող ազդեցություն է գործում և լավացնում բջիջների մեջ այլ ակտիվ նյութերի ներթափանցումը: Վերջիններս հակամանրէային ազդեցություն ունեն և դրականորեն են անդրադառնում արյան կազմի վրա:

Ռեֆլեկտոր գործոն

Կենսաաբանորեն ակտիվ կետերում խայթոցը նման է ասեղնառեֆլեքսաթերապիային: Արդյունքում ակտիվանում է այն օրգանների և համակարգերի աշխատանքը, որոնց բուժմանն ուղղված է հիրուդոթերապիան:

Մեխանիկական գործոն

Տզրուկի խայթոցը թեթևացնում է արյան հոսքը, հիանալի կանխարգելում երակների վարիկոզ լայնացումը:

Այս բոլոր գործոնների փոխազդեցությունը ոչ միայն բուժում է հիվանդությունը, այլև կանխարգելում զարգացման մեխանիզմը:

Հիրուդոթերապիան անպտղության դեպքում

Բացի ընդհանուր կազդուրիչ ազդեցությունից, տզրուկներն ազդում են նաև վերարտադրողական համակարգում առկա խնդիրների վրա:

Կանանց դեպքում՝

• փոքր կոնքի օրգաններում լավանում է արյան շրջանառությունը, 
• քչանում են կպումներն արգանդում և արգանդափողերում, 
• կարգավորվում է սեռական հորմոնների մակարդակը,
•  նվազում է դաշտանային ցավի ուժգնությունը և նախադաշտանային համախտանիշի արտահայտվածությունը,
•  փոքրանում են արգանդի և ձվարանների բարորակ ուռուցքները, 
• բարելավվում է արգանդի լորձաթաղանթի վիճակը, 
• ներծծվում են էնդոմետրիոզի օջախները, 
• մեծանում է ԱՄԲ-ի հաջողության հավանականությունը:  

Տղամարդկանց դեպքում՝

• փոքր կոնքի օրգաններում լավանում է արյան շրջանառությունը, 
• մեղմվում են շագանակագեղձի բորբոքային պրոցեսները,
•  պրոստատիտի դեպքում նվազում է ցավը, 
• բարելավվում է էրեկցիան և սպերմատոգենեզը:

Կախված հիվանդության ծանրության աստիճանից՝ տզրուկներին օգտագործում են որպես ինքնուրույն կամ օժանդակ բուժման միջոց: Այս պարագայում խոսքն անպտղության այն տեսակների մասին է, որոնք պայմանավորված չեն արգանդի, ձվարանների կամ արգանդափողերի բացակայությամբ: Այսպիսի դեպքերում հիրուդոթերապիան կարող է օրգանիզմի վրա թողնել միայն ընդհանուր կազդուրիչ ազդեցություն:

Ինչպես է անցկացվում տզրուկաբուժությունը

Վերարտադրողական համակարգի հիվանդությունների դեպքում տզրուկները հաճախ տեղադրվում են շեքի, հետանցքի և հեշտոցի հատվածներում: Տղամարդկանց դեպքում՝ անուսի և շեքի հատվածում: Տզրուկների քանակը որոշում է բժիշկը՝ հաշվի առնելով այցելուի տարիքը, օրգանիզմի առանձնահատկությունները և ուղեկցող հիվանդությունների առկայությունը: Սեանսների քանակը և պարբերականությունը կախված է ախտորոշումից, տևում է 20-60 րոպե:

Կան որոշ կանոններ, որոնցով պետք առաջնորդվել բուժման ժամանակ:

1. Սեանսից առաջ չի կարելի օծանելիք կամ հոտավետ կրեմ օգտագործել, քանի որ բույրը կարող է վախեցնել տզրուկներին: 
2. Հարկավոր է սեանսն անցկացնել օրվա երկրորդ կեսին, քանի որ դրանից հետո հակացուցված է ֆիզիկական աշխատանքը: 

Տզրուկի խաթոցի ցավը մի փոքր ուժեղ է մոծակի խայթոցից: 4-5-րդ օրը խայթոցի կետն սկսում է ուժեղ քոր գալ և այտուցվել, ինչը նորմալ է: Քորը մեղմելու համար կարելի է հատուկ քսուք օգտագործել կամ պարզապես դիմանալ:

Հակացուցումները և բարդությունները

Բարեբախտաբար խիստ հազվադեպ են բարդություններ առաջանում: Դրանցից են ալերգիան, որի դեպքում բուժումը դադարեցվում է, վերքի վարակումը, ինչն առաջանում է քորելու և հիգիենայի կանոնները խախտելու հետևանքով:

Հակացուցումների դեպքում չարժի վտանգել առողջությունը և բուժման կուրս անցնել: Հակացուցումներից են՝ արյան մակարդման հետ կապված հիվանդություններ, օնկոլոգիական հիվանդություններ, սակավարյունություն, ստամոքսաղիքային համակարգի խոց, սուր վարակիչ հիվանդություններ և մարմնի ջերմաստիճանի բարձրացում, թոքախտ, հյուծում, հղիություն, հիպոտոնիա:

Բուժումն իրականացնում է միայն մասնագետը. անփորձ ձեռքերում ցանկացած դեղամիջոց կարող է միայն վնասել: Նշենք նաև, որ ոչ մի մասնագետ չի կարող 100%-ով երաշխավորել, որ անպտղությունը կբուժվի: Այդուհանդերձ փորձը ցույց է տվել, որ կան բազմաթիվ օրինակներ, երբ բնության այս փոքրիկ բուժարար օրգանիզմներն օգնել են հուսահատ ամուսիններին ծնող դառնալ և իսկական ընտանեկան երջանկություն ձեռք բերել: