Սնունդը պոլիկիստոզային ձվարանների համախտանիշի դեպքում

Պոլիկիստոզային ձվարանների համախտանիշը բնորոշվում է կնոջ հորմոնային համակարգի լուրջ խանգարումներով: Այս հիվանդության պահպանողական կամ օպերատիվ բուժմանը զուգահեռ շատ կարևոր է նաև ճիշտ սննդակարգի պահպանումը: Վերջինս կկարգավորի նյութափոխանակությունը, կնվազեցնի ՊՁՀ-ի արտաքին դրսևորումները և կնպաստի ապաքինմանը:

Սնվելու հիմնական կանոնները

1. Սնունդը պետք է հավասարակշռված լինի և 1500-1800 կկալից ոչ ավել: Ցանկալի է հենց սկզբում օգտվել հատուկ աղյուսակներից (կամ կալորիականության հաշվիչներից), որոնցում նշված են մթերքների կիլոկալորիաները:

2. Ձուկը և միսը նախընտրելի է շոգեխաշել կամ խորովել: Բանջարեղենը և մրգեղենն առավել օգտակար են հում վիճակում:

3. Անհրաժեշտ է սնվել հաճախ և փոքր չափաբաժիններով:

• Արթնանալուն պես 1 բաժակ սառը ջուր խմել
• Վեր կենալուց 1 ժամ անց նախաճաշել
• Ճաշից 2 ժամ առաջ շատ թեթև մի բան ուտել
• Ճաշ
• Ընթրիք
• Քնելուց 2 ժամ առաջ թեթև մի բան ուտել

Ձվարանների պոլիկիստոզի դեպքում խստորեն արգելվում է դիետաներ պահելը և ժամը 18:00-ից հետո ոչինչ չուտելը: Հաճախակի սնվեք, սակայն քիչ քանակով: Ճիշտ մթերքներ ընտրեք:

4. Մթերքները պետք է ունենան ցածր գլիկեմիական ինդեքս: Այդպիսի մթերքներն օրգանիզմում դանդաղ են ճեղքվում՝ թույլ չտալով, որ շաքարի մակարդակը բարձրանա: Դրա շնորհիվ ենթաստամոքսային գեղձի կողմից արտադրվող ինսուլինի մակարդակը կայուն կլինի ամբողջ օրվա ընթացքում: Կարիք չկա ամողջովին հրաժարվել ածխաջրեր պարունակող մթերքներից, դա հանգեցնում է վատ հետևանքների:

ՊՁՀ-ի դեպքում ավելի նախընտրելի են այն մթերքները, որոնց գլիկեմիական ինդեքսը 50-ից ցածր է: Դրանցից են՝

• Խնձոր, նարինջ, նուռ, սալոր, սերկևիլ, դեղձ, ծիրան, թուրինջ, տանձ, հաղարջ, հապալաս, մանդարին, բալ, ելակ:
• Կանաչ ոլոռ (և՛ պահածոյացված, և՛ թարմ), ծիրանաչիր, սալորաչիր, լոբի, սխտոր, գազար, լոլիկ, բադրիջան, բրոկոլի, կաղամբ, բրյուսելյան կաղամբ, վարունգ, ծնեբեկը, իմբիր, սունկ, սոխ, ձիթապտուղ, հազար:
• Մակարոնեղեն, վարսակաձավար, վայրի բրինձ, նուշ, հնդկական ընկույզ, պնդուկ:
• Յոգուրտ, կաթնաշոռ, կաթ, կեֆիր:

Մսի բոլոր տեսակները սպիտակուցային մթերքներ են և գրեթե ածխաջրեր չեն պարունակում: Այդպիսով նրանց գլիկեմիական ինդեքսը 0 է:

Թույլատրվում է փոքր քանակությամբ օգտագործել նաև միջին գլիկեմիական ինդեքսով (50-ից 70) մթերքներ: Դրանցից են՝

• Անանաս, բանան, դդում, կիվի, մանգո, խուրմա:
• Չամիչ, տարեկանի հաց, ցորենի ամբողջական հատիկից հաց, պահածոյացված բանջարեղեն, ցորենի կոշտ տեսակից պատրաստված մակարոնեղեն, մայոնեզ, վարսակաձավարի ապուր, սուշի, կետչուպ, բրինձ, բասմատի:
• Հարկավոր է ամբողջովին հրաժարվել մեծ քանակությամբ ածխաջրեր պարունակող մթերքներից: Այդպիսիք են բարձր և առաջին կարգի ալյուրից պատրաստված հացը և հացաբուլկեղենը, չիփսը, քաղցր ձողիկները, քաղցր կրեմային խմորեղենը, մուրաբան, ջեմերը:

5. Խորհուրդ է տրվում միաժամանակ օգտագործել նաև վիտամիններ և հանքանյութային համալիրներ, ոպեսզի օրգանիզմն ստանա իրեն անհրաժեշտ բոլոր սննդանյութերը: Մի շարք վիտամիններ և մակրո ու միկրոտարրեր նպաստում են անդրոգենների և ինսուլինի մակարդակի կարգավորմանը: Դրանց շարքին են դասվում В խմբի վիտամինները, վիտամին D-ն, մագնիումը, ցինկը, քրոմը, սելենը և կոէնզիմ 10-ը: