Ճի՞շտ է, որ կեսարյան հատումը բացասական ազդեցություն է ունենում կնոջ օրգանիզմի վրա
26159
Վերջին տարիներին շատ կանայք նախընտրում են ծննդաբերության հարցը լուծել կեսարյան հատմամբ՝ դրա արագության, վիրահատության թվացյալ «թեթևության» և կազմվածքը պահպանելու ցանկության թելադրանքով:
Ճի՞շտ է, որ կեսարյան հատումը բացասական ազդեցություն է ունենում կնոջ օրգանիզմի վրա:
Կեսարյան հատում պետք է կատարվի ըստ ցուցման և անհրաժեշտության: Ժամանակակից բժշկությունը կեսարյան հատման բարդությունների վտանգը հասցրել է նվազագույնի, սակայն բոլորն էլ գիտեն, որ ոչ մի վիրահատություն չի անցնում առանց հետևանքների, այն անպայման հետք է թողնում մարդու օրգանիզմում: Բացառություն չէ նաև կեսարյան հատումը: Ինչպես ցանկացած վիրահատություն, որը ենթադրում է անզգայացում, կտրվածք և այլն, սա ևս ունի ռիսկեր: Հետագայում բարդությունների առաջացումը պայմանավորված է տարբեր գործոններով՝ բժշկի՝ կեսարյան հատում անելու պրոֆեսիոնալիզմ, ուղեկցող բարդություններ կամ հիվանդություններ, օրգանիզմի դիմադրողականություն և այլն:
Կեսարյան հատում կատարվում է միայն բժշկական ցուցումների հիման վրա, որոնք լինում են բացարձակ և հարաբերական: Վիրահատական միջամտության բացարձակ ցուցումներն են՝ երեխայի՝ ծննդուղիներով անցնելու անհնարինությունը, երբ պտղի և մոր կոնքի չափսերը չեն համապատասխանում իրար, ինչպես նաև հղիության և ծննդաբերության այնպիսի բարդություններ, ինչպիսիք են՝ ծանր գեստոզը, ընկերքի առաջադրությունը, նորմալ տեղակայված ընկերքի վաղաժամ շերտազատումը, արգանդի պատռվածքի վտանգը, փոքր կոնքի օրգանների ուռուցքները, պտղի սուր թթվածնաքաղցը և այլն:
Վիրահատական միջամտության հարաբերական ցուցումներ են համարվում այն պայմանները կամ հանգամանքները, երբ հաջող և անվտանգ ծննդալուծումը կասկածի տակ է առնվում: Այդպիսիք են՝ պտղի սխալ դիրքը կամ առաջադրությունը, ծննդկանի տարիքը, կնոջ սոմատիկ հիվանդությունները և այլն:
Կեսարյան հատման դիմելու որոշումը պետք է կայացնել կանխամտածված, մոր և երեխայի կյանքին վտանգ սպառնացող բոլոր գործոնները կշռադատելուց հետո:
