Հղիությունից հղիություն ընդմիջման լավագույն չափը

Հղիությունից հղիություն ընդմիջման լավագույն չափը

Մի շրջան ծննդաբերության մասին հիշողություններն այնքան թարմ էին, որ դուք անգամ մտածել չէիք ուզում երկրորդ երեխայի մասին: Որոշ ժամանակ անց, սակայն, ևս մեկ երեխա լույս աշխարհ բերելու բուռն ցանկություն է առաջանում: Հարց է ծագում՝ որքան է երեխաների միջև նախընտրելի տարիքային տարբերությունը:

Ինչ են ասում բժիշկները

Ֆիզիոլոգիական տեսանկյունից կինը կարող է կրկին հղիանալ անմիջապես ծննդաբերությունից հետո և, ինչպես հայտնի է, կրծքով կերակրումը ոչ միշտ է խոչընդոտում դրան: Օրինակ՝ ծննդաբերությունից հետո ամենավաղ ձվազատումն արձանագրվել է 7-րդ շաբաթում՝ կերակրող կնոջ դեպքում և 4-րդ շաբաթում՝  չկերակրող կնոջ դեպքում: Անմիջապես ծննդաբերությունից հետո հղիանալը մեծ ծանրաբեռնվածություն է դեռևս չվերականգնված օրգանիզմի համար:

Հղիությունների ընդմիջումը բնական ծննդաբերությունից հետո

Բարդություններից խուսափելու համար բժիշկները խորհուրդ են տալիս ծննդաբերությունը և հաջորդ հղիությունն ընդմիջել նվազագույնը 1 տարով, իսկ լավագույնը 2-2,5 տարին է: Ինչո՞ւ հենց այդքան: Հաշվի է առնվում 1 տարվա ընթացքում կրծքով կերակրումը, վերականգնումը լակտացիայից հետո 9 ամսվա ընթացքում և մոտ կես տարի էլ օրգանիզմում սննդարար նյութերի պաշարը լրացնելու համար: Սա, սակայն, չի նշանակում, որ չկերակրող կանայք ընդմիջման կարիք չունեն, քանի որ ծննդաբերությունից հետո պետք է կարգավորվեն վերարտադրողական համակարգի բոլոր օրգանները, կոնքի հատակի մկանները, կաթնագեղձերը, հորմոնային համակարգը, արյան քանակն ու կազմը, ինչպես նաև պետք է համալրվեն օրգանիզմի ներքին պաշարները:

Կեսարյան հատումից հետո

Ինչ վերաբերում է կեսարյան հատմամբ ծննդաբերած կանանց, ապա բժիշկների կարծիքով նրանք ավելի մեծ ընդմիջում պետք է անեն, քանի որ կայուն վիրահատական սպիի ձևավորման համար նվազագույնը 2 տարի է պահանջվում: Այն պետք է կարողանա դիմանալ հաջորդ հղիության և ծննդաբերության ծանրաբեռնվածությանը: Լավագույն չափը 3-5 տարին է, քանի որ ժամանակի ընթացքում սպին բարակում է: Բոլոր դեպքերում բեղմնավորումից առաջ հարկավոր է ՈւՁՀ-ի միջոցով ստուգել սպիի վիճակը:

Հնարավոր խնդիրները

Հղիությունների միջև շատ կարճ ընդմիջումների հետևանքով հնարավոր է, որ առաջանան ստորև նշված խնդիրները:

  • Ոտքերի և արտաքին սեռական օրգանների թրոմբոֆլեբիտ և թրոմբոզ
  • Վաղաժամ ծննդաբերություն
  • Պտղի և ընկերքի միջև արյան հոսքի խանգարում
  • Նվազ քաշով երեխա
  • Արյունահոսություններ հղիության ընթացքում և հետծննդաբերական շրջանում

Եթե կինը չափազանց շատ է ձգձգում երկրորդ երեխայի ծնունդը (15-20 տարի), ապա հղիության ընթացքը բարդանում է տարիքին զուգահեռ կուտակված հիվանդությունների պատճառով:

Ի՞նչ են ասում մայրերը

Որոշ մայրեր կարծում են, որ ավելի լավ է առանց ընդմիջման ծննդաբերել, և երբ երեխաները մանկապարտեզ գնան, հնարավոր կլինի շարունակել աշխատելը, զբաղվել մասնագիտական աճով առանց հերթական արձակուրդի: Բացի այդ, երեխաներն ավելի շատ ընհանուր հետաքրքրություններ կունենան, քան 2 տարվա ընդմիջման պարագայում:

Ի տարբերություն նրանց, կարճատև ընդմիջման կողմնակիցները խոսում են մայրիկի համար կրկնակի ծանրաբեռնվածության մասին: Նրանք նշում են, որ հոգեպես և ֆիզիկապես հյուծված մայրն ի վիճակի չի լինում լիարժեքորեն հոգ տանել ծծկեր երեխայի մասին և միաժամանակ բավարար ուշադրություն դարձնել ավագ երեխային:

Այլ մայրեր կարծում են, որ տարիների ընթացքում անքուն գիշերներն ավելի հեշտ են հաղթահարվում, ներքին խաղաղություն է ի հայտ գալիս, և կյանքի նկատմամբ փիլիսոփայական մոտեցում է ձևավորվում, որը թույլ է տալիս ավելի հանգիստ հոգեբանական հանգամանքներում դաստիարակել երկրորդ երեխային: Բացի այդ, փոքրկին խնամելու հոգսի մի մասը «մեծացած ու կոփված» հայրերը վերցնում են իրենց ուսերին, իսկ ավագ երեխան հրաշալի դայակ է դառնում:

Կա՞ ոսկե միջին

Այն ամենը, ինչ նշվեց վերևում, ստիպում է մտածել, որ հղիությունների միջև կատարյալ ընդմիջման վերաբերյալ միասնական կարծիք չկա: Պետք չէ միտումնավոր մի քանի տարի սպասել, ինչ է թե ինչ-որ մեկի կարծիքով այդպես ավելի լավ է, բայց պետք չէ նաև բռնության ենթարկել սեփական օրգանիզմը, ինչ է թե այդպես ավելի հարմար կլինի հետագայում:

Յուրաքանչյուր ընտանիք ինքն է որոշում, թե երբ է պատրաստ հաջորդ երեխայի ծնունդին: Ցանկալի երեխան, ում սիրում և սպասում է ամբողջ ընտանիքը, իսկական երջանկություն է, իսկ թե որքան ժամանակ կանցնի նախորդ հրաշքի ծնունդից, այնքան էլ կարևոր չէ:

Գրիպը քրոնիկ հիվանդությունների ժամանակ

Գրիպը քրոնիկ հիվանդությունների ժամանակ

Գրիպի ֆոնի վրա գրեթե ցանկացած քրոնիկ հիվանդություն ակտիվանում է՝ վատթարացնելով անձի առողջական վիճակը, որը կարող է հանգեցնել մինչև իսկ մահվան

Ե՞րբ է անհրաժեշտ այցելել ուրոլոգի, ինչպե՞ս խուսափել շագանակագեղձի ադենոմայի առաջացումից

Ե՞րբ է անհրաժեշտ այցելել ուրոլոգի, ինչպե՞ս խուսափել շագանակագեղձի ադենոմայի առաջացումից

Տղամարդն ուրոլոգիական առաջին զննումն անցնում է կյանքի առաջին ամիսներին, երբ մանկաբույժը զննում է իրականացնում՝ ամորձապարկի զարգացման պաթոլոգիաները բացառելու նպատակով։

Հարբեցողություն

Հարբեցողություն

Ալկոհոլի անվտանգ չափաբաժնի մասին ուսումնասիրությունները վկայում են, որ ֆիզիոլոգիայի տեսանկյունից այն գոյություն չունի: Սակայն հարկ է նշել, որ ալկոհոլն ազդում է նաև հոգեվիճակի վրա

Սրտի հիվանդությունները մեծացնում են դեմենցիայի առաջացման վտանգը

Սրտի հիվանդությունները մեծացնում են դեմենցիայի առաջացման վտանգը

Ձախ նախասրտի կառուցվածքային փոփոխությունները մեծացնում են դեմենցիայի առաջացման հավանականությունը, նույնիսկ եթե հիվանդները չունեն սրտի գործառույթի խանգարումներ