Ինչպե՞ս տարբերակել իրական ալկոհոլային խմիչքը կեղծից

Կեղծված ալկոհոլը կարող է պարունակել կյանքի համար վտանգավոր նյութեր, ուստի ընտրելիս պետք է հաշվի առնել մի շարք փաստեր։

1. Ուշադրություն դարձրեք, թե որտեղից եք գնում ալկոհոլային խմիչքը։
Մի՛ գնեք կասկածելի խանութներից, շուկայից, անհատներից կամ համացանցի միջոցով։
Նկատի ունեցեք, որ խանութը պետք է ունենա ալկոհոլի վաճառքը թույլատրող հավաստագիր։

2. Հաշվի առեք գինը
Պետությունը սահմանում է նվազագույն վաճառքի գներ ալկոհոլային թունդ խմիչքների (28 %-ից բարձր)` օղու, կոնյակի, վիսկիի և այլ խմիչքների համար: Սա նշանակում է, որ չափազանց էժան գինը վկայում է կեղծարարության մասին:

3. Ուշադրություն դարձրեք շշի տեսքին
Եթե կեղծ արտադրողներն իրենք են շշերը պատրաստել, դրանք կարող են տարբերվել բնօրինակներից:
Կարող եք համացանցում գտնել տվյալ խմիչքից լուսանկարներ և համեմատել:

4. Ստուգեք պիտակի և տեղեկատվության առկայությունը
Նախևառաջ ստուգեք, թե արդյոք պիտակը ամուր է ամրացված, կան արդյոք անհարթություններ կամ վնասված հատվածներ: Եթե ամեն ինչ հստակ է, ուսումնասիրեք տեղեկատվությունը: Պիտակի վրա պետք է նշված լինի հետևյալը.

• Ապրանքի անվանումը
• Արտադրողի իրավաբանական հասցեն, արտադրության և շշալցման հասցեն
• Փաստաթղթեր, որոնց համաձայն արտադրվել է խմիչքը
• Ծավալը և ալկոհոլի պարունակությունը տոկոսով
• Կազմը և սննդային արժեքը
• Շաքարի պարունակությունը
• Արտադրող երկիրը և արտադրության գտնվելու վայրը
• Տեղեկատվություն հակացուցումների ու օգտագործման վտանգների մասին
• Պահպանման ժամկետը, եթե այդպիսիք կան
• Շշալցման ամսաթիվը

5. Ուսումնասիրեք նաև ակցիզը

Ապրանքանիշի ակցիզը տպվում է հատուկ թղթի վրա՝ գունավոր, դրա վրա բոլոր համարներն ու կոդերը պարզ են, հստակ տեսանելի, և հեշտությամբ կարելի է կարդալ:
Ակցիզը պետք է տեղադրված լինի հավասարաչափ:

Ինչպե՞ս տարբերակել կեղծ խմիչքը, եթե արդեն բացել եք շիշը։
Շատ կարևոր է արտադրանքի որակը: Ալկոհոլի գույնը, բույրը, նստվածքը, համը կօգնեն ձեզ տարբերակելու կեղծը իրականից, եթե, իհարկե, համտեսի փորձ ունեք։

Ինչո՞ւ է վտանգավոր մեթիլային սպիրտը, ինչպե՞ս է հնարավոր այն տարբերակել։
Մեթիլային սպիրտը թունավոր նյութ է, որի պատճառով հնարավոր է մասամբ կամ ամբողջությամբ կորցնել տեսողությունը, ստանալ լյարդի կամ երիկամային անբավարարություն և այլ լուրջ խնդիրներ:

Ինչպե՞ս հասկանալ, որ դուք թունավորվել եք մեթիլային սպիրտից։
Թունավորման ախտանիշները կարող են հայտնվել այն ընդունելուց հետո՝ 40 րոպեից մինչև 72 ժամվա ընթացքում:

Ախտանիշներն են՝
• սրտխառնոց,
• փսխում,
• որովայնի ցավ,
• մշուշ աչքերի դիմաց,
• թուլություն, գլխապտույտ,
• գիտակցության խանգարում,
• սրտի արագ բաբախ,
• շնչարգելություն։

Ախտանիշների առկայության դեպքում հարկավոր է անմիջապես դիմել մասնագիտական օգնության։

 

Աղբյուրը
 
Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին, Յութուբյան ալիքին