Հղիության 32-րդ շաբաթ

Քայլելն ավելի է դժվարանում, երեխան շարունակում է ակտիվորեն շարժվել։

Պտղի զարգացում

Պտղի երկարությունը հասնում է 40-42 սմ-ի, կշիռը`մոտ 1800-2000գր-ի: Ի հայտ է գալիս աչքը բոլոր ուղղություններով շարժելու ունակությունը և տեսողական ուշադրությունը: Աչքերը որոշ ժամանակ բաց են և փակվում են քնելիս, գույնը սովորաբար կապույտ է:

Ստեղծվում է ենթամաշկային ճարպաշերտ, ինչի շնորհիվ մաշկային ծածկույթներն ավելի բաց գույն են ստանում: Եղունգները երկարում են: Սկսում է զարգանալ իմունային համակարգը:

Երեխայի հակազդումները

Երեխան հրաշալի լսում է ձայները, որոնցից շատերը սովորական են դարձել՝ մոր անոթներով հոսող արյան ձայնը, նրա սրտի բաբախյունները, շնչառությունը, ձայնը։ Կարողանում է ճանաչել հոր ձայնը, կենցաղային ձայները։ Ահա թե ինչու է կարևոր, որ մայրն այդ շրջանում հաճախ խոսի փոքրիկի հետ և մանկական երգեր երգի։ Ծնվելուց հետո նորածինն անմիջապես ճանաչում է հոր և մոր ձայնը։

Կարդացեք՝ Երեխայի ներարգանդային զարգացումը և նրահետ շփումը նախքան ծնունդը

Գերջրությունը երեսուներկուերորդ շաբաթում

Հարկավոր է ժամանակին բաց չթողնել և չհետաձգել բժշկի այցը։ Երեսուներկուերորդ շաբաթում հաճախ է գերջրություն զարգանում, այն պաթոլոգիա է համարվում։ Պետք չէ խուճապի մատնվել, բժիշկը համապատասխան միջոցներ ձեռք կառնի։

Կարդացեք՝ Գերջրություն

Պլանային ՈւՁՀ

32-33-րդ շաբաթում հաճախ նշանակվում է երրորդ պլանային ՈւՁՀ, որի օգնությամբ բժիշկը գնահատում է երեխայի ներքին օրգանների վիճակը, նրա առաջադրությունը, ստուգում պորտալարի վիճակը, ընկերքի հասունության աստիճանը, պտղաջրի և արգանդի պարանոցի վիճակը։