Կաթի անբավարար քանակություն
Կաթի անբավարար քանակություն
Լակտացիայի հաստատման գործընթացները մոր օրգանիզմում սկսվում են երեխայի ծնվելուց անմիջապես հետո: Լակտացիայի արագացման համար ծննդատներում գործնականում կիրառվում է նորածնին մոր կրծքին դնելու մեթոդը, որը նպաստում է գործընթացի բնական զարգացմանը։
Ինչո՞ւ է անհրաժեշտ կրծքով կերակրումը
Կրծքով կերակրումը ոչ միայն սննդի աղբյուր է, այլև ունի
հոգեբանական նշանակություն՝ ազդում է մայր-երեխա հարաբերությունների զարգացման վրա՝ հետագա տարբեր տարիքային ժամանակահատվածներում: Համաձայն Ավստրալիայում անցկացված ուսումնասիրությունների՝ երեխայի հոգեբանական զարգացման գործոնները, ինչպիսիք են՝ տարիքը, կրթությունը,
մոր վատ սովորությունները, կրծքով կերակրման բացակայությունը՝ առնվազն մինչև
6 ամսականը, 1,5 անգամ ավելի մեծ ազդեցություն ունեն երեխայի հոգեբանական անառողջության վրա, քան մնացածը:
Ընթերցեք նաև՝ Կրծքի կաթի պահպանումը
Ինչի՞ց է կախված լակտացիան
Լակտացիան հաստատելու և ընթացքում պահպանելու ամենակարևոր կանոնը՝ կրծքով կերակրման ամբողջ ժամանակահատվածում մոր ճիշտ հոգեբանական վերաբերմունքն է և երեխային կրծքով կերակրելու ցանկությունը։ Դուք պետք է միշտ հիշեք և համոզված լինեք, որ երեխայի համար լավագույն սնունդը կրծքի կաթն է: Կրծքով կերակրման տարածվածությունը և տևողությունը վերահսկվող գործընթաց է, որը կախված է մի կողմից՝ հղի կնոջ՝ մայրանալուն և առաջիկա մեկ տարվա ընթացքում երեխային կրծքով կերակրելուն հոգեբանորեն պատրաստ լինելուց, մյուս կողմից՝ ընտանիքի և մանկաբարձության ու մանկության բուժ-պրոֆիլակտիկ հաստատությունների աջակցությունից: Բուժ-պրոֆիլակտիկ հաստատությունները պետք է ստեղծեն լակտացիայի մեկնարկի համար ճիշտ պայմաններ և աջակցություն ցուցաբերեն երեխայի կյանքի առաջին տարվա ընթացքում։
Անբավարար լակտացիայի նշաններ
Լակտացիան գնահատելու համար պահանջվում է երեխայի վարքի մանրազնին վերլուծություն, ինչպես նաև միզելու հաճախականության և կղազատման բնույթի ուսումնասիրություն։
Անբավարար լակտացիայի նշաններից են`
- կերակրման ընթացքում կամ անմիջապես հետո երեխայի լացն ու անհանգստությունը
- կրծքին հաճախակի մոտեցնելու անհրաժեշտությունը
- երկարատև կերակրումը, որի ընթացքում երեխան անընդհատ ուտելու շարժումներ է կատարում՝ առանց կուլ տալու
- մոր կողմից կաթնագեղձերի արագ լցվելու զգացողությունը երեխայի ակտիվ ուտելու ընթացքում, երբ, սակայն, կերակրելուց հետո կաթ չի լինում
- անհանգիստ քուն, հաճախակի կրկնվող լաց, քաղցածության աղաղակ
- երեխայի քաշի բարձրացման ցածր մակարդակ
- ոչ հաճախակի կղազատում և միզարձակում
Կրծքով կերակրման սկիզբը
Ծննդաբերությանը հաջորդող մի քանի օրերին կարևոր է հետևել այս սկզբունքներին.
Երեխային կերակրե՛ք ըստ պահանջի (օրական մինչև 10-12 անգամ)․ նորածինն ինչքան շատ է ուտում, այնքան ավելի շատ կաթ է արտադրվում մոր կաթնագեղձերում։ Երեխան ինքն է «թելադրում» կաթնագեղձին, թե որքան կաթ պետք է արտադրվի ոչ միայն առաջին, այլև հաջորդ բոլոր օրերին և ամիսներին:
Հրաժարվե՛ք ծծակ, շիշ օգտագործելուց: Եթե երեխային սկսում են արհեստական կաթնախառնուրդով կերակրել ծնվելուց հետո առաջին 3-4 օրվա ընթացքում, ապա կրծքով կերակրումը հաջողելու մակարդակը կրճատվում է:
Կանխել ճաքերը և կաթնագեղձերի խցանումը (լակտոստազ):
Լակտացիայի հաջորդ փուլերը
Լակտացիայի հաջորդ փուլերում կարևոր է.
- առանձնահատուկ ուշադրություն դարձնել գիշերային կերակրումներին․ պրոլակտին հորմոնը (պատասխանատու է կրծքի կաթի արտադրման համար) առավելագույն քանակով արտադրվում է առավոտյան՝ ժամը 4-ից 7-ը
- ճիշտ սնվել․ անհրաժեշտության դեպքում սննդակարգում ներառել լակտացիային նպաստող մթերքներ՝ լակտոգոնիկ ազդեցությամբ
- սահմանել ռացիոնալ ռեժիմ լիարժեք քնի և հանգստի համար
- պահպանել հանգստություն և դրական տրամադրվել, որպեսզի ցանկացած իրավիճակում հնարավոր լինի կերակրել
Կերակրող մայրերի դիետան
Կրծքով կերակրման ընթացքում մոր օրգանիզմում մեծանում է սննդանյութեր ստանալու անհրաժեշտությունը:
Հետևաբար, անհրաժեշտ է ապահովել լիարժեք սննդակարգ. սպիտակուցների քանակը պետք է ավելանա մինչև 120 գ՝ մեկ օրում, ճարպերը՝ 100-120 գ, ածխաջրերը`450-500 գ: Սննդակարգի կալորիականությունը բարձրանում է մինչև 3200-3500 կկալ։ Կերակրող մայրը պետք է օրական 5-6 անգամ սնվի, ցանկալի է երեխային կերակրելուց որոշ ժամանակ առաջ, որպեսզի ավելանա կաթի քանակը։