Լեյկոպլակիան վուլվայի հիպերպլազիայի դրսևորումն է։ Հաճախ դիտվում է մենոպաուզայի կամ էլ կլիմաքսի շրջանում։ Լեյկոպլակիայի դեպքում հնարավոր է, որ ատիպիկ բջիջներ ի հայտ գան՝ վերափոխվելով չարորակ գոյացության։

Պատճառները

Ռիսկի գործոններից են՝

• սեռական օրգանների քրոնիկ-բորբոքային հիվանդության առկայություն, 
• 40 տարեկանից մեծ տարիք, 
• արգանդի պարանոցի դիսպլազիա, 
• նյութափոխանակության խանգարումներ՝ շաքարայի դիաբետ, ճարպակալում, 
• վերարտադրողական կարճ շրջան, 
• անձնական հիգիենայի չարաշահում, 
• վիտամին A-ի պակաս, 
• վուլվայի լորձաթաղանքի բազմակի վնասում, 
• հոգեհուզական խանգարումներ և այլն։ 

Ախտանշանները

Հնարավոր է, որ հիվանդությունն ընթանա առանց ախտանշանների։ Լեյկոպլակիայի նշաններն ի հայտ են գալիս ծլիկի շրջանում և փոքր ամոթաշուրթերի հատվածում։ Սպիտակավուն կետեր են առաջանում, հետագայում եղջերանալու պատճառով դառնում են կոշտ և շոշափելի, մոխրագույն երանգի։ Վուլվայի հյուսվածքի ինֆեկցման և սկլերոզացման դեպքում մշտական քոր, այրոց է առաջանում, որոնք ուժգնանում են գիշերը, սեռական ակտի, շարժվելու, միզարձակման ժամանակ։

Ախտորոշումը

Ախտորոշումը հիմնվում է կնոջ գանգատների, գինեկոլոգիական զննման, լաբորատոր և գործիքային հետազոտությունների վրա։

Բուժումը

Լեյկոպլակիայի բուժումը համալիր է և երկարատև, հաշվի է առնվում տարիքը և ուղեկցող հիվանդություններ։ Թերապիան ներառում է դիետա, դեղորայքային թերապիա, ֆիզիոթերապիա, երբեմն՝ հոգեբանի խորհրդատվություն։ Անհրաժեշտության դեպքում վիրահատական միջամտություն է կատարվում։ Նշանակվում է տեղային հակաբորբոքային թերապիա, քորի դեմ ուղղված անտիսեպտիկներ, հորմոնային քսուքներ և այլ միջոցներ։