Ծննդալուծումը տեսողական խնդիրների դեպքում
43510
Տեսողական որոշ խնդիրների դեպքում հղի կնոջը ցուցվում է կեսարյան հատում, իսկ երբեմն էլ նույնիսկ հղիությունն է հակացուցվում: Պատճառը ծննդաբերության ընթացքում բարդությունների առաջացման վտանգն է: Դրանից խուսափելու համար կարևոր է հղիության պլանավորման փուլում անցնել աչքի հետազոտություն:
Վատ տեսողությունն (կարճատեսություն, հեռատեսություն) այնքան վտանգավոր չէ, որքան աչքի ցանցաթաղանթի վիճակը: Թույլ ցանցաթաղանթը հանգեցնում է բացասական հետևանքների. այն կարող է շերտազատվել, պատռվել կամ դիստրոֆիայի ենթարկվել: Սա նշանակում է, որ ծննդականին տեսողության վատթարացման կամ տեսողությունը կորցնելու վտանգ է սպառնում:
Ժամանակին բժշկին դիմելը կօգնի խուսափել ծննդաբերության և հետծննդյան շրջանի բարդություներից: Սովորաբար ցանցաթաղանթի ամրապնդման համար ակնաբույժի կողմից նշանակվում է լազերային կոագուլացիա: Սա կարելի է իրականացնել ցանկացած ժամանակ՝ նախքան հղիությունը, իսկ հղիության ընթացքում՝ մինչև 35-րդ շաբաթը:
Կատարակտա
Կատարակտան աչքի ոսպնյակի պղտորումն է: Այս հիվանդությունը նույնպես վտանգներ է կրում: Շատ կարևոր է այն հայտնաբերել նախքան հղիությունը, քանի որ դրա բուժումը միայն վիրահատական եղանակով է կատարվում: Այն համարվում է լուրջ վիրահատություն և հետվիրահատական բարդություններից խուսափելու համար խորհուրդ է տրվում դիմել բարձր տեխնիկական ապահովությամբ կլինիկա:
Հղիության ընթացքում անհրաժեշտ է պարբերաբար այցելել ակնաբույժի և գնահատել ցանցաթաղանթի վիճակը, որպեսզի չնչին փոփոխության դեպքում հնարավոր լինի դրա ամրապնդմանն ուղղված միջոցներ ձեռք առնել:
Կեսարյան հատում հիմնականում ցուցվում է հետևյալ դեպքերում:
- Եթե մեկ տարվա ընթացքում տեսողությունը վատթարացել 2 և ավելի դիօպտրիա:
- Եթե աչքի հատակի պաթոլոգիական փոփոխություններ են ի հայտ եկել՝ 6 դիօպտրիա և ավելի կարճատեսության դեպքում:
- Եթե հղիության ընթացքում առաջացել է աչքի ցանցաթաղանթի պատռվածք կամ դիստրոֆի:
- Եթե հղի կնոջ մոտ հայտնաբերվել է դիաբետիկ ռետինոպաթիա, այդ դեպքում նույնպես ցուցվում է կեսարյան հատում:
Այսպիսով, հղի կնոջը ցուցվում է կեսարյան հատում, եթե կան աչքի ցանցաթաղանթի վնասման վտանգներ, քանի որ բնական ճանապարհով ծննդաբերության դեպքում ճիգերի ժամանակ թույլ ցանցաթաղանթը կարող է շերտազատվել, պատռվել կամ դիստրոֆիայի ենթարկվել, աչքի մեջ արյունազեղում առաջանալ, ինչը կանդրադառնա տեսողության վրա: Ծննդալուծման եղանակը որոշվում է ծննդաբերությունից անմիջապես առաջ՝ հաշվի առնելով աչքի ցանցաթաղանթի վիճակը, դիստրոֆիկ օջախների առկայությունը:
